બેલ્જિયમની એન્ટવર્પ સ્થિત કોર્ટે શુક્રવારે ભાગેડુ હીરા વેપારી મેહુલ ચોક્સી (Mehul Choksi) ને ભારત પ્રત્યાર્પણ (Extradition) કરવા માટેનો આદેશ આપ્યો છે.
ભારતને પંજાબ નેશનલ બેંક (PNB) ના ₹ 13,000 કરોડના કૌભાંડ કેસમાં મોટી સફળતા મળી છે. બેલ્જિયમની એન્ટવર્પ સ્થિત કોર્ટે શુક્રવારે ભાગેડુ હીરા વેપારી મેહુલ ચોક્સી (Mehul Choksi) ને ભારત પ્રત્યાર્પણ (Extradition) કરવા માટેનો આદેશ આપ્યો છે. કોર્ટે ભારતની વિનંતી પર બેલ્જિયન સત્તાવાળાઓ દ્વારા ચોક્સીની ધરપકડને કાયદેસર ઠેરવી છે.
આ નિર્ણય ચોક્સી વિરુદ્ધ ભારતના કેસને મજબૂત રીતે માન્યતા આપે છે. જોકે, ચોક્સી પાસે હજી પણ બેલ્જિયમની સર્વોચ્ચ અદાલત (Supreme Court) માં આ નિર્ણયને પડકારવાનો વિકલ્પ ખુલ્લો છે, જેના માટે તેને 15 દિવસનો સમય આપવામાં આવ્યો છે.
ચોક્સીને આ વર્ષે એપ્રિલમાં સેન્ટ્રલ બ્યુરો ઑફ ઇન્વેસ્ટિગેશન (CBI) ની વિનંતી પર એન્ટવર્પમાં અટકાયત કરવામાં આવ્યો હતો અને ત્યારથી તે જેલમાં છે. ભારતે બેલ્જિયમ સરકારને ખાતરી આપી છે કે જો ચોક્સીનું પ્રત્યાર્પણ થશે, તો તેને મુંબઈની આર્થર રોડ જેલ (Arthur Road Jail) ના બેરેક નંબર 12માં યુરોપિયન માનવાધિકાર ધોરણોનું પાલન થાય તેવી માનવીય પરિસ્થિતિઓમાં રાખવામાં આવશે.
અધિકારીઓએ જણાવ્યું કે કોર્ટના આ નિર્ણયથી ચોક્સીને ભારત પરત લાવવાની દિશામાં પ્રથમ અને મહત્ત્વપૂર્ણ કાનૂની પગલું સ્પષ્ટ થઈ ગયું છે. CBI અને વિદેશ મંત્રાલયના અધિકારીઓએ બેલ્જિયન પ્રોસિક્યુટર્સને કેસમાં મદદ કરી હતી, જેમાં ચોક્સીના ફ્લાઇટ રિસ્ક (Flight Risk) હોવાની દલીલ પણ કરવામાં આવી હતી.
