કેન્દ્રીય પ્રદૂષણ નિયંત્રણ બોર્ડ (CPCB)ના આંકડા મુજબ, સોમવારે સાંજે ૪ વાગ્યે દિલ્હીનો ૨૪ કલાકનો સરેરાશ એર ક્વોલિટી ઇન્ડેક્સ (AQI) ૩૪૫ નોંધાયો હતો
દિવાળીની રાત્રે દિલ્હીની હવાની ગુણવત્તા ફરી એકવાર ‘ઝેરી’ સ્તરે પહોંચી ગઈ હતી. કેન્દ્રીય પ્રદૂષણ નિયંત્રણ બોર્ડ (CPCB)ના આંકડા મુજબ, સોમવારે સાંજે ૪ વાગ્યે દિલ્હીનો ૨૪ કલાકનો સરેરાશ એર ક્વોલિટી ઇન્ડેક્સ (AQI) ૩૪૫ નોંધાયો હતો, જે ‘ખૂબ ખરાબ’ શ્રેણીમાં આવે છે. રાતભર AQI ૩૪૪ થી ૩૫૯ વચ્ચે રહ્યો અને મંગળવારે બપોર સુધીમાં સરેરાશ ૩૫૧ નોંધાયો હતો.
સૌથી વધુ ચિંતાજનક બાબત એ છે કે દિવાળીની રાત્રે PM2.5નું સ્તર ૬૭૫ માઇક્રોગ્રામ પ્રતિ ઘન મીટર સુધી પહોંચી ગયું હતું, જે છેલ્લા ચાર વર્ષમાં સૌથી વધારે છે. નિષ્ણાતો માને છે કે બંગાળની ખાડીમાં બનેલા ડિપ્રેશનને કારણે હવાની ગતિ ઘટી, જેનાથી પ્રદૂષકો હવામાં જ તરતા રહ્યા અને ફેલાઈ શક્યા નહીં.
પ્રદૂષણની સાથે ધ્વનિ પ્રદૂષણ પણ ચરમસીમાએ હતું. દિલ્હી પ્રદૂષણ નિયંત્રણ સમિતિ (DPCC) ના આંકડા અનુસાર, શહેરના ૨૬માંથી ૨૩ નોઇઝ મોનિટરિંગ સ્ટેશનો પર ધ્વનિનું સ્તર નિર્ધારિત મર્યાદા કરતાં ઉપર નોંધાયું હતું. સૌથી વધુ ઘોંઘાટ કરનારા વિસ્તારોમાં કરોલ બાગ હતું, જ્યાં રાત્રે ૧૧ વાગ્યે ૯૩.૫ ડેસિબલ(A) અવાજ નોંધાયો હતો, જ્યારે અનુમતિ મર્યાદા ૫૫ ડેસિબલ(A) છે.
કમિશન ફોર એર ક્વોલિટી મેનેજમેન્ટ (CAQM) એ રવિવારે જ GRAP ના સ્ટેજ-II ને સક્રિય કરી દીધું હતું. જોકે, પૂર્વ CPCB અધિકારી દીપાંકર સાહાએ આશા વ્યક્ત કરી છે કે હવાની ગતિ વધવાથી આવનારા દિવસોમાં પ્રદૂષણના સ્તરમાં ઘટાડો થઈ શકે છે.
