2013ની ભયાનક કેદારનાથ દુર્ઘટનામાં ગુમ થયેલા અને પરિવારે મૃત માની જેમના અંતિમ સંસ્કાર કરી દીધા હતા, તે શિવમ 12 વર્ષ પછી જીવતા મળી આવ્યા છે. જાણો કેવી રીતે એક સ્કૂલના નામે પરિવાર સાથે તેમનું ભાવુક પુનર્મિલન કરાવ્યું.
ઉત્તરાખંડ, મંગળવાર
કહેવાય છે કે જેને રામ રાખે તેને કોણ ચાખે! આ કહેવત રૂરકીના એક પરિવાર માટે સાચી પડી છે. જે પુત્રને 12 વર્ષ પહેલા કેદારનાથની ભયાનક હોનારતમાં મૃત માનીને પરિવારે તેના અંતિમ સંસ્કાર કરી દીધા હતા, તે આજે જીવતો તેમની સામે ઉભો છે. આ ઘટના કોઈ ફિલ્મી વાર્તાથી ઓછી નથી, જેમાં શ્રદ્ધા, પીડા અને અંતે ચમત્કારનું સુખદ મિલન થયું છે.
વર્ષ 2013: એ કાળમુખો દિવસ
જૂન 2013માં ઉત્તરાખંડમાં આવેલી કુદરતી આફતે હજારો લોકોના જીવ લીધા હતા અને સેંકડો પરિવારોને વિખૂટા પાડી દીધા હતા. આ દુર્ઘટનામાં રૂરકીના રહેવાસી શિવમ પણ કેદારનાથ યાત્રા દરમિયાન લાપતા થઈ ગયા. પરિવારે દિવસો સુધી તેમની શોધખોળ કરી, પરંતુ કોઈ પત્તો ન મળ્યો. આખરે, હારી-થાકીને અને ભારે હૃદયે, પરિવારે શિવમને મૃત માની લીધા અને તેમના પ્રતિકાત્મક અંતિમ સંસ્કાર કર્યા. સરકારી ચોપડે પણ શિવમનું નામ મૃતકોની યાદીમાં નોંધાઈ ગયું હતું.
એક કડી જેણે બધું બદલી નાખ્યું
વર્ષો વીતી ગયા, પરંતુ કુદરતને કંઈક બીજું જ મંજૂર હતું. શિવમ કોઈક રીતે મહારાષ્ટ્રના સંભાજીનગર (ઔરંગાબાદ) પહોંચી ગયા હતા અને ત્યાં એક મંદિરમાં રહેતા હતા. વર્ષ 2021માં મંદિરમાં થયેલી ચોરીના કેસમાં પોલીસે શિવમનું નામ પણ શંકાસ્પદ તરીકે જોડી દીધું.
જ્યારે તેમને કોર્ટમાં રજૂ કરવામાં આવ્યા, ત્યારે ન્યાયાધીશે તેમની માનસિક સ્થિતિ સારી ન હોવાનું પારખી લીધું. કોર્ટે તેમને પુણેની માનસિક હોસ્પિટલમાં દાખલ કરવાનો આદેશ આપ્યો, જ્યાં ડોક્ટરોએ જણાવ્યું કે તેઓ “અવ્યવસ્થિત સ્કિઝોફ્રેનિયા” નામની ગંભીર માનસિક બીમારીથી પીડાઈ રહ્યા હતા, જેના કારણે તેમની યાદશક્તિ અને વિચારવાની ક્ષમતા પર ગંભીર અસર થઈ હતી. જોકે, કોર્ટે તેમને ચોરીના આરોપમાંથી મુક્ત કરી દીધા હતા.
શાળાના નામથી મળ્યો પરિવાર
હોસ્પિટલમાં સારવાર દરમિયાન, વર્ષ 2023 માં એક દિવસ અચાનક શિવમના મોઢેથી તેમની શાળાનું નામ નીકળ્યું – “પ્રેમ વિદ્યાલય, રૂરકી”. આ એક નાનકડો શબ્દ તેમના પરિવાર સુધી પહોંચવાની ચાવી બની ગયો. હોસ્પિટલના સામાજિક કાર્યકર રોહિણી ભોંસલેએ તરત જ રૂરકી પોલીસનો સંપર્ક કર્યો. પોલીસે શાળાના રેકોર્ડના આધારે શિવમના પરિવારને શોધી કાઢ્યો. ઓળખની ખાતરી કરવા માટે DNA ટેસ્ટ કરવામાં આવ્યો, જે પોઝિટિવ આવ્યો.
12 વર્ષ પછી ભાવુક પુનર્મિલન
તમામ કાયદાકીય પ્રક્રિયાઓ પૂર્ણ થયા પછી, 5 ડિસેમ્બર, 2025 ના રોજ, 55 વર્ષીય શિવમ 12 વર્ષના લાંબા ગાળા પછી તેમના ભાઈ સાથે રૂરકી પાછા ફર્યા. પરિવાર માટે આ ક્ષણ આનંદ અને આઘાત બંને લઈને આવી. જે દીકરાને તેઓ કાયમ માટે ગુમાવી ચૂક્યા હતા, તે જીવતો પાછો ફર્યો હતો, પરંતુ તે 12 વર્ષ સુધી ક્યાં અને કઈ હાલતમાં રહ્યો, એ વાતનો વિચાર કરીને પરિવાર ભાવુક થઈ ગયો.
