ઈરાન અને ઈઝરાયેલ વચ્ચેના જંગમાં હવે G7 દેશોની એન્ટ્રી થઈ છે. હોર્મુઝમાં તેલ પુરવઠો ખોરવાતા અને ટ્રમ્પના કડક વલણ બાદ લશ્કરી એસ્કોર્ટની તૈયારીઓ તેજ થઈ ગઈ છે. જાણો શું છે પૂરી વિગત.
નવી દિલ્હી, રવિવાર
મિડલ ઈસ્ટમાં ચાલી રહેલો સંઘર્ષ હવે માત્ર બે દેશો વચ્ચે મર્યાદિત રહ્યો નથી, પરંતુ તે વિશ્વયુદ્ધ જેવી ગંભીર સ્થિતિ તરફ આગળ વધી રહ્યો છે. ઈરાન અને ઈઝરાયેલ વચ્ચેના યુદ્ધે હવે વૈશ્વિક સ્તરે મોટું સ્વરૂપ ધારણ કર્યું છે. અમેરિકી પ્રમુખ ડોનાલ્ડ ટ્રમ્પના કડક અલ્ટિમેટમ બાદ હવે દુનિયાની સાત સૌથી મોટી અર્થવ્યવસ્થાઓ (G7) અને યુરોપિયન યુનિયને મેદાનમાં ઉતરીને ઈરાનને સ્પષ્ટ શબ્દોમાં છેલ્લી ચેતવણી આપી દીધી છે.
હોર્મુઝમાં લશ્કરી એસ્કોર્ટની તૈયારી
સૌથી ચિંતાજનક બાબત હોર્મુઝ સ્ટ્રેટ પર સર્જાયેલી કટોકટી છે. આ દરિયાઈ માર્ગ દુનિયાના ઓઈલ સપ્લાય માટે કરોડરજ્જુ સમાન છે. અહેવાલો મુજબ, G7 દેશોએ એક સ્પેશિયલ વર્કિંગ ગ્રુપ બનાવ્યું છે જે હોર્મુઝમાં વેપારી જહાજોને લશ્કરી સુરક્ષા પૂરી પાડવા પર કામ કરી રહ્યું છે. જો ઈરાન તેલ પુરવઠો રોકવાનો પ્રયાસ કરશે, તો G7 દેશો હવે લશ્કરી તાકાતનો ઉપયોગ કરતા પણ અચકાશે નહીં.
G7 દેશોએ ઈરાનના હુમલાને ગણાવ્યા અયોગ્ય
કેનેડા, ફ્રાન્સ, જર્મની, ઈટાલી, જાપાન, બ્રિટન અને અમેરિકાના વિદેશ મંત્રીઓએ એક સંયુક્ત નિવેદન જાહેર કર્યું છે. આ દેશોએ સ્પષ્ટ કર્યું છે કે ઈરાન અને તેના પ્રોક્સી સંગઠનો દ્વારા કરવામાં આવેલા હુમલાઓ કોઈ પણ રીતે ચલાવી લેવામાં આવશે નહીં. ઈરાને નાગરિક અને ઉર્જા માળખા પર જે હુમલા કર્યા છે તેની સખત નિંદા કરવામાં આવી છે. G7 દેશો હવે ઈઝરાયેલ અને તેમના પ્રાદેશિક સાથીઓ સાથે મજબૂતીથી ઉભા છે.
24 માર્ચે પેરિસમાં કટોકટી બેઠક
આ યુદ્ધની શરૂઆત 28 ફેબ્રુઆરીથી થઈ હતી અને ત્યારથી સ્થિતિ સતત બગડી રહી છે. હવે આ કટોકટીનો ઉકેલ લાવવા માટે આગામી 24 અને 25 માર્ચે પેરિસમાં G7 દેશોની એક ખાસ બેઠક મળવા જઈ રહી છે. આ બેઠકમાં મુખ્યત્વે બે મુદ્દાઓ પર ચર્ચા થશે:
વધતા જતા ક્રૂડ ઓઈલના ભાવ પર અંકુશ મેળવવો.
હોર્મુઝ સ્ટ્રેટમાં ઈરાનની નાકાબંધીનો કડક જવાબ આપવો.
વૈશ્વિક અર્થતંત્ર પર અત્યારે મોટું જોખમ તોળાઈ રહ્યું છે. જો હોર્મુઝમાં યુદ્ધ ફાટી નીકળે તો તેની અસર ભારતના પેટ્રોલ-ડીઝલના ભાવ પર પણ પડી શકે છે. ટ્રમ્પના નેતૃત્વમાં પશ્ચિમી દેશો હવે ઈરાન સામે સીધા લશ્કરી પ્રતિભાવ માટે તૈયાર દેખાઈ રહ્યા છે, જે સૂચવે છે કે આગામી દિવસોમાં મિડલ ઈસ્ટનું ગણિત સાવ બદલાઈ જશે.
