WhatsAppએ ભારતમાં નવું મોબાઈલ રિચાર્જ ફીચર લોન્ચ કર્યું છે. હવે તમે PayUની મદદથી Jio, Airtel અને Vi ના પ્લાન્સ સીધા WhatsAppમાં જ રિચાર્જ કરી શકશો. જાણો આ સુવિધાનો ઉપયોગ કરવાની રીત.
અમદાવાદ, શુક્રવાર
જો તમે અત્યાર સુધી મોબાઈલ રિચાર્જ કરવા માટે Google Pay, PhonePe કે Paytm જેવી એપ્સનો ઉપયોગ કરતા હતા, તો હવે તમારા માટે એક સારા સમાચાર છે. દુનિયાભરમાં લોકપ્રિય મેસેજિંગ એપ WhatsApp હવે તમારી રોજિંદી જરૂરિયાતો પૂરી કરવા માટે એક સુપર એપ બની રહી છે. કંપનીએ ભારતીય યુઝર્સ માટે સીધું મોબાઈલ રિચાર્જ કરવાનું નવું ફીચર લોન્ચ કર્યું છે.
PayU સાથે કરી ભાગીદારી
WhatsAppએ આ સેવાની શરૂઆત પેમેન્ટ કંપની PayU સાથે હાથ મિલાવીને કરી છે. આ સુવિધાને કારણે યુઝર્સ હવે એપની બહાર નીકળ્યા વગર જ પોતાનું કે પોતાના પરિવારનું રિચાર્જ કરી શકશે. આ ફીચર હાલમાં રોલઆઉટ થઈ રહ્યું છે અને આવનારા થોડા અઠવાડિયામાં તમામ Android અને iOS યુઝર્સના ફોનમાં જોવા મળશે.
તમામ મોટા ઓપરેટર્સના પ્લાન્સ એક જ જગ્યાએ
આ ફીચરની સૌથી મોટી ખાસિયત એ છે કે રિચાર્જ કરતી વખતે તમારે પ્લાન ચેક કરવા માટે ઓપરેટરની એપ પર જવું નહીં પડે. Reliance Jio, Bharti Airtel અને Vodafone Idea (Vi) જેવા દેશના મુખ્ય ટેલિકોમ ઓપરેટર્સના તમામ લેટેસ્ટ પ્લાન્સ હવે WhatsAppની અંદર જ જોઈ શકાશે. તમે તમારી જરૂરિયાત મુજબ ડેટા કે કોલિંગ પ્લાન પસંદ કરી શકશો.
હોમ સ્ક્રીન પર દેખાશે ‘₹’ આઈકન
WhatsAppએ પેમેન્ટને સરળ બનાવવા માટે એપના મેઈન પેજ પર જ એક ₹ (રૂપિયા) નું આઈકન આપ્યું છે. આ આઈકન પર ક્લિક કરતા જ તમે સીધા પેમેન્ટ સેક્શનમાં પહોંચી જશો. અહીંથી માત્ર મોબાઈલ રિચાર્જ જ નહીં, પરંતુ UPI પેમેન્ટ અને મેટ્રો ટિકિટ બુકિંગ જેવી સુવિધાઓનો પણ લાભ લઈ શકાશે.
WhatsAppથી મોબાઈલ રિચાર્જ કરવાની રીત:
જો તમે પણ WhatsApp દ્વારા રિચાર્જ કરવા માંગો છો, તો નીચેના સરળ સ્ટેપ્સ ફોલો કરો:
સૌથી પહેલા તમારા WhatsAppમાં દેખાતા ‘₹’ (Rupee) આઈકન પર ક્લિક કરો.
ત્યાં તમને Mobile Prepaid Recharge નો વિકલ્પ મળશે, તેના પર ટેપ કરો.
હવે જે નંબર પર રિચાર્જ કરવું હોય તે નંબર એન્ટર કરો અથવા કોન્ટેક્ટ લિસ્ટમાંથી પસંદ કરો.
તમારો ઓપરેટર (Jio, Airtel કે Vi) કન્ફર્મ કરો.
હવે સ્ક્રીન પર દેખાતા પ્લાન્સમાંથી તમારો મનપસંદ પ્લાન પસંદ કરો.
પેમેન્ટ માટે તમે UPI, ડેબિટ કાર્ડ કે ક્રેડિટ કાર્ડ માંથી કોઈ પણ એક વિકલ્પ પસંદ કરી શકો છો.
પેમેન્ટ સક્સેસફુલ થતા જ તમારો મોબાઈલ રિચાર્જ થઈ જશે.
કેમ લેવાયો આ નિર્ણય?
Meta Platforms ઇન્ડિયાના બિઝનેસ મેસેજિંગ ડિરેક્ટર રવિ ગર્ગના જણાવ્યા અનુસાર, ભારતમાં લોકો પહેલેથી જ ટિકિટ બુકિંગ અને બિલ પેમેન્ટ માટે WhatsAppનો ઉપયોગ કરી રહ્યા છે. લોકોની આ જિંદગીને વધુ સરળ બનાવવા માટે હવે રિચાર્જ સુવિધા પણ ઉમેરવામાં આવી છે. PayUના ચીફ બિઝનેસ ઓફિસર હેમંગ દત્તાણીનું કહેવું છે કે, યુઝર્સને એવા પ્લેટફોર્મ પર સુવિધાઓ આપવી વધુ યોગ્ય છે જ્યાં તેઓ પહેલેથી જ સૌથી વધુ સમય વિતાવે છે.
WhatsApp જે રીતે નવી સેવાઓ ઉમેરી રહ્યું છે, તે જોતા લાગે છે કે તે ટૂંક સમયમાં ભારતીયો માટે ઓલ-ઇન-વન સોલ્યુશન બની જશે. હવે તમારે એક રિચાર્જ માટે અલગ-અલગ પાંચ એપ્સ ડાઉનલોડ કરવાની કે ફોનની મેમરી રોકવાની જરૂર નહીં પડે. બધું જ કામ હવે તમારી ફેવરિટ ચેટિંગ એપ પરથી જ પતી જશે.
