રિલાયન્સ રિટેલે પ્રિયંકા ચોપરાની પ્રખ્યાત હેરકેર બ્રાન્ડ Anomaly ને હસ્તગત કરી છે. ઈશા અંબાણીના આ વ્યૂહાત્મક નિર્ણયથી હવે આ બ્રાન્ડ ભારતના સામાન્ય ગ્રાહકો સુધી પહોંચશે. જાણો આ ડીલની પૂરી વિગત.
મુંબઇ, શનિવાર
ભારતીય રિટેલ માર્કેટમાં રિલાયન્સ ગ્રુપ ફરી એકવાર મોટો ધડાકો કર્યો છે. રિલાયન્સ રિટેલ લિમિટેડ (RRL) એ બોલિવૂડ અને હોલીવૂડ સ્ટાર પ્રિયંકા ચોપરા જોનાસની જાણીતી હેરકેર બ્રાન્ડ એનોમલી (Anomaly) ને ખરીદવાની સત્તાવાર જાહેરાત કરી છે. 30 એપ્રિલ 2026 ના રોજ થયેલી આ ડીલ સાથે જ રિલાયન્સે બ્યુટી અને પર્સનલ કેર સેક્ટરમાં પોતાની પકડ વધુ મજબૂત બનાવી છે.
શું છે આ ડીલમાં ખાસ?
આ બિઝનેસ ડીલ હેઠળ રિલાયન્સ રિટેલે એનોમલી બ્રાન્ડના તમામ ટ્રેડમાર્ક્સ, સંપત્તિઓ અને તેની ડિજિટલ પ્રોપર્ટીઝને હસ્તગત કરી લીધી છે. આ પગલાથી રિલાયન્સના વધતા જતા બ્યુટી પોર્ટફોલિયોમાં એક મોટું નામ ઉમેરાયું છે. રિલાયન્સ રિટેલ વેન્ચર્સ લિમિટેડના એક્ઝિક્યુટિવ ડાયરેક્ટર ઈશા અંબાણીએ આ સંપાદનને એક વ્યૂહાત્મક પગલું ગણાવ્યું છે.
સામાન્ય ગ્રાહકો સુધી પહોંચશે પ્રીમિયમ પ્રોડક્ટ્સ
ઈશા અંબાણીએ આ ડીલ વિશે વાત કરતા જણાવ્યું હતું કે, “એનોમલીનું હસ્તગત કરવું એ અમારા બ્યુટી બિઝનેસને વિસ્તારવાની દિશામાં મહત્વનું છે. રિલાયન્સના વિશાળ નેટવર્ક અને Tira જેવા ઓનલાઇન પ્લેટફોર્મની મદદથી અમે આ ઉચ્ચ ગુણવત્તાવાળી બ્રાન્ડને ભારતના ખૂણે-ખૂણે અને સામાન્ય ગ્રાહકો સુધી પહોંચાડીશું.”
પ્રિયંકા ચોપરાની ભૂમિકા યથાવત રહેશે
ભલે આ બ્રાન્ડની માલિકી હવે રિલાયન્સ પાસે ગઈ છે, પરંતુ પ્રિયંકા ચોપરા જોનાસ હજી પણ આ બ્રાન્ડ સાથે જોડાયેલા રહેશે. તેઓ ક્રિએટિવ ડાયરેક્ટર તરીકે પ્રોડક્ટ ડેવલપમેન્ટ, ઈનોવેશન અને બ્રાન્ડના વિઝનને આગળ વધારવામાં મહત્વનો રોલ ભજવશે. પ્રિયંકાએ પણ આ ભાગીદારી પર ખુશી વ્યક્ત કરતા તેને એનોમલી માટે એક નવો અધ્યાય ગણાવ્યો છે.
ભારતીય ગ્રાહકો પર વિશેષ ધ્યાન
એનોમલી બ્રાન્ડની સ્થાપના 2021 માં થઈ હતી, જે ક્લીન અને વિગન હોવાની સાથે પરવડે તેવી કિંમતો માટે જાણીતી છે. હવે કંપનીનું આગામી લક્ષ્ય ખાસ કરીને ભારતીય લોકોના વાળ અને સ્કાલ્પની જરૂરિયાતોને સમજીને નવી પ્રોડક્ટ્સ લોન્ચ કરવાનું છે. ભારત ઉપરાંત ઉત્તર અમેરિકા, યુકે અને મધ્ય પૂર્વના દેશોમાં પણ આ બ્રાન્ડનો વિસ્તાર કરવામાં આવશે.
રિલાયન્સ રિટેલનો દબદબો
રિલાયન્સ રિટેલ હાલમાં ભારતનું સૌથી મોટું રિટેલ નેટવર્ક છે. તેની મજબૂતીનો અંદાજ આ આંકડાઓ પરથી લગાવી શકાય છે કંપની પાસે દેશભરમાં 20,160 થી વધુ સ્ટોર્સ છે. માર્ચ 2026 ના અંત સુધીમાં કંપનીનું ટર્નઓવર 3,70,026 કરોડ રૂપિયા રહ્યું છે. કંપનીના રજિસ્ટર્ડ ગ્રાહકોની સંખ્યા 387 મિલિયન (38 કરોડ) ને પાર કરી ગઈ છે.
રિલાયન્સ દ્વારા પ્રિયંકા ચોપરાની બ્રાન્ડને ખરીદવી એ સાબિત કરે છે કે અંબાણી પરિવાર હવે બ્યુટી માર્કેટમાં નાયકા (Nykaa) અને ટાટા (Tata CLIQ Palette) જેવી કંપનીઓને જોરદાર ટક્કર આપવા તૈયાર છે. ગ્રાહકો માટે સારી વાત એ છે કે હવે તેમને આંતરરાષ્ટ્રીય સ્તરની હેરકેર પ્રોડક્ટ્સ નજીકના રિલાયન્સ સ્ટોર્સ પર સરળતાથી મળી રહેશે.
