શું રશિયાના રાષ્ટ્રપતિ વ્લાદિમીર પુતિન અમર થવા માંગે છે? રશિયા 26 અબજ ડોલરના જંગી ખર્ચે લેબમાં કૃત્રિમ અંગો અને એન્ટી-એજિંગ ટેક્નોલોજી પર કામ કરી રહ્યું છે. જાણો આખો રિપોર્ટ.
ઈન્ટરનેશનલ, મંગળવાર
રશિયાના રાષ્ટ્રપતિ વ્લાદિમીર પુતિન 74 વર્ષની ઉંમરે પણ એટલા ફિટ છે કે તેમની ફિટનેસ સોશિયલ મીડિયા પર હંમેશા ચર્ચાનો વિષય રહે છે. તેમને જોઈને કોઈ કહી ન શકે કે તેઓ 70 નો આંકડો વટાવી ચૂક્યા છે. પુતિનનું દ્રઢપણે માનવું છે કે વિજ્ઞાનની મદદથી માણસ લાંબુ આયુષ્ય ભોગવી શકે છે અને કદાચ અમર પણ થઈ શકે છે. આ જ સપનાને પૂરું કરવા માટે રશિયાની સરકાર અત્યારે એક મોટા ‘એન્ટી-એજિંગ’ (Anti-Aging) પ્રોજેક્ટ પર રાત-દિવસ કામ કરી રહી છે. જો આ પ્રોજેક્ટ સફળ થશે, તો માણસ પોતાના ઘરડા કે નબળા અંગોને બદલીને વર્ષો સુધી યુવાન રહી શકશે.
મિશન ‘ન્યૂ હેલ્થ પ્રિઝર્વેશન ટેક્નોલોજીસ’ શું છે?
વધતી ઉંમર (ઘડપણ) ને રોકવા માટે રશિયાએ 26 અબજ ડોલર (આશરે 2.47 લાખ કરોડ રૂપિયા) ના જંગી ખર્ચે એક મહત્વાકાંક્ષી સરકારી પ્રોજેક્ટ શરૂ કર્યો છે. સરકારનો દાવો છે કે આ મિશન થકી આ દાયકાના અંત સુધીમાં 1.75 લાખ જેટલા લોકોના જીવ બચાવી શકાશે. એક આંતરરાષ્ટ્રીય રિપોર્ટ અનુસાર, આ પ્રોજેક્ટ હેઠળ લેબની અંદર કૃત્રિમ અંગો બનાવવા, જીન થેરાપી અને માઈનસ તાપમાનમાં શરીરને સાચવતી ક્રાયોથેરાપી જેવી અત્યાધુનિક ટેક્નોલોજી પર મોટા પાયે રિસર્ચ થઈ રહ્યું છે.
રશિયામાં મુખ્યત્વે આ 4 ટેક્નોલોજી પર ચાલી રહ્યું છે કામ
જીન થેરાપી: આ ટેક્નોલોજી દ્વારા માણસના ડીએનએ (DNA) કે જીન્સમાં એવા ફેરફાર કરવામાં આવશે, જેનાથી ઘડપણ આવવાની પ્રક્રિયા અટકી જાય.
3D બાયોપ્રિન્ટિંગ: જીવંત કોષો (Live Cells) નો ઉપયોગ કરીને લેબમાં જ શરીરના નવા અંગો અને ટિશ્યુ પ્રિન્ટ કરવામાં આવશે, જેને ભવિષ્યમાં દર્દીના શરીરમાં ટ્રાન્સપ્લાન્ટ કરી શકાશે.
પેપ્ટાઈડ થેરાપી: શરીરના કોષોને હંમેશા એક્ટિવ રાખવા માટે પ્રોટીન જેવા સિન્થેટિક કમ્પાઉન્ડનો ઉપયોગ કરવામાં આવશે.
ક્રાયો થેરાપી: આ થેરાપીમાં શરીરને થોડા સમય માટે માઈનસ ડિગ્રીના અત્યંત ઠંડા તાપમાનમાં રાખીને કોલ્ડ ટ્રીટમેન્ટ આપવામાં આવે છે, જેથી શરીર લાંબો સમય ટકી રહે.
પુતિન અને શી જિનપિંગની ‘લીક’ થયેલી વાતચીત
સપ્ટેમ્બર 2025 માં ચીનમાં યોજાયેલી વિક્ટરી ડે પરેડ દરમિયાન એક એવી ઘટના બની જેણે આખી દુનિયાનું ધ્યાન ખેંચ્યું. વ્લાદિમીર પુતિન અને ચીનના રાષ્ટ્રપતિ શી જિનપિંગ વચ્ચેની એક ખાનગી વાતચીત ચાલુ માઇક (હોટ માઇક) પર રેકોર્ડ થઈ ગઈ હતી. આ વાતચીતમાં પુતિને ટ્રાન્સલેટર દ્વારા જિનપિંગને કહ્યું હતું કે, “ટેક્નોલોજી એટલી ઝડપથી આગળ વધી રહી છે કે માણસ પોતાના અંગો સતત બદલીને લાંબુ જીવી શકશે. લોકો ફરીથી યુવાન બની શકે છે અથવા અમર પણ થઈ શકે છે.”
આ સાંભળીને જિનપિંગે હસતા હસતા જવાબ આપ્યો કે, “એવો અંદાજ છે કે આ સદીના અંત સુધીમાં લોકો 150 વર્ષ સુધી જીવતા થઈ જશે.” રસપ્રદ વાત એ છે કે આ ઐતિહાસિક ચર્ચા સમયે ઉત્તર કોરિયાના સરમુખત્યાર કિમ જોંગ ઉન પણ ત્યાં હાજર હતા અને બંને નેતાઓને જોઈ રહ્યા હતા.
ઘડપણ રોકવાની ‘વેક્સિન’ બનાવવાનો દાવો
અમેરિકાની સિલિકોન વેલીના દિગ્ગજો જેફ બેઝોસ અને સેમ ઓલ્ટમેન પણ એન્ટી-એજિંગ પાછળ કરોડો રૂપિયા ખર્ચી રહ્યા છે, ત્યારે રશિયાએ તેમાં મોટી છલાંગ લગાવી છે. એપ્રિલ 2026 માં રશિયન સરકારે એક ચોંકાવનારી જાહેરાત કરી હતી. 23 એપ્રિલ 2026 ના રોજ રશિયાના નાયબ વિજ્ઞાન મંત્રી ડેનિસ સેકિરિન્સ્કીએ દાવો કર્યો હતો કે, તેમના વૈજ્ઞાનિકો ઘડપણ વિરોધી રસી (જીન-થેરાપી) બનાવી રહ્યા છે. આ દવા કોષોની ઉંમર વધવાની પ્રક્રિયાને સાવ ધીમી કરી દેશે અને માનવ ઇતિહાસમાં એક મોટો વળાંક સાબિત થશે.
