દહેગામ એસટી ડેપોના પ્રવેશદ્વાર પર ખાડા અને ગંદકીના સામ્રાજ્યથી મુસાફરો અને બસ ચાલકો હેરાન. તંત્ર પાસે વહેલી તકે કાયમી ઉકેલની માંગ.
દહેગામ એસટી ડેપોના મુખ્ય ગેટ પાસે લાંબા સમયથી પડેલા વિશાળ ખાડા અને ભરાયેલા વરસાદી પાણીના કારણે મુસાફરો તેમજ બસ ચાલકો માટે અવરજવર કરવી અત્યંત મુશ્કેલ બની ગઈ છે. ડેપો પરિસરમાં યોગ્ય ડ્રેનેજ સિસ્ટમ ન હોવાને કારણે સતત પાણી જમા રહે છે, જેના લીધે ચો તરફ દુર્ગંધ અને મચ્છરોનો ઉપદ્રવ ચિંતાજનક હદે વધી ગયો છે.
તંત્રનો કચાસભર્યો અભિગમ અને ખાડાઓની સમસ્યા
સ્થાનિક લોકોના જણાવ્યા મુજબ, ગોકુલ હોટલ પાસે આવેલા ગેટથી લઈને ડેપો સુધી સતત પાણીનો ભરાવો જોવા મળે છે. વહીવટી તંત્ર દ્વારા કામચલાઉ ધોરણે માત્ર ઝીણી કપચી નાખીને સંતોષ માનવામાં આવે છે, પરંતુ ચોમાસાનો વરસાદ આવતા જ આ કપચી ધોવાઈ જાય છે અને સ્થિતિ વણસી જાય છે. બસો ખાડામાં પછડાવાથી મુસાફરોને શારીરિક તકલીફ વેઠવી પડે છે.
અમદાવાદ સ્ટેન્ડ પાસે કાદવ અને ઉભરાતી ગટરનું સામ્રાજ્ય
માત્ર પ્રવેશદ્વાર જ નહીં, પરંતુ અમદાવાદ તરફ જતી બસો જ્યાં ઊભી રહે છે તે સ્ટેન્ડ પાસે પણ ભારે કાદવ-કીચડ ફેલાયેલો છે. આ ઉપરાંત, ગેટ પાસે આવેલી ગટર સતત ઉભરાતી હોવાથી તેનું ગંદુ પાણી પણ ડેપોના ખાડાઓમાં ભેગું થઈ રહ્યું છે, જે આરોગ્ય માટે મોટો ખતરો ઊભો કરી રહ્યું છે.
રોગચાળાની ભીતિ વચ્ચે કાયમી નિકાલની માંગ
વારંવારની રજૂઆતો છતાં જવાબદારો દ્વારા આ ગંભીર પ્રશ્ન પ્રત્યે આંખ આડા કાન કરવામાં આવી રહ્યા છે. ગંદકી અને મચ્છરોને કારણે વિસ્તારમાં રોગચાળો ફાટી નીકળે તેવી ભીતિ સેવાઈ રહી છે. મુસાફરો અને સ્થાનિક નાગરિકોની એક જ માંગ છે કે ડેપોના ખાડા પૂરીને યોગ્ય સફાઈ અને ગટરની કાયમી વ્યવસ્થા કરવામાં આવે.
