ગુજરાત સરકારે રાજ્યની મહાનગર અને નગરપાલિકાઓના રસ્તાઓને ડામરને બદલે સિમેન્ટ કોંક્રીટ (CC) રોડમાં ફેરવવાનો નિર્ણય લીધો છે. આ સાથે ગામડાઓના પાણી ભરાતા રસ્તાઓ અને ઔદ્યોગિક વિસ્તારોમાં પણ CC રોડ બનાવાશે.
મુખ્યમંત્રી ભૂપેન્દ્ર પટેલના અધ્યક્ષસ્થાને મળેલી કેબિનેટ બેઠકમાં રાજ્યના માર્ગોને ટકાઉ અને મજબૂત બનાવવા માટે એક મહત્વનો અને દીર્ઘકાલીન નિર્ણય લેવામાં આવ્યો છે. હવેથી રાજ્યની તમામ મહાનગરપાલિકાઓ અને નગરપાલિકાઓના આંતરિક રસ્તાઓ ડામરના બદલે સિમેન્ટ કોંક્રીટ (CC) થી બનાવવામાં આવશે.
નિર્ણય પાછળનું મુખ્ય કારણ
પ્રવક્તા મંત્રી જીતુ વાઘાણીએ આ નિર્ણયની વિગતો આપતા જણાવ્યું હતું કે, ચોમાસા દરમિયાન ભારે વરસાદ અને પાણી ભરાવાની સમસ્યાને કારણે ડામરના રસ્તાઓ વારંવાર ધોવાઈ જાય છે અથવા તૂટી જાય છે. આ સમસ્યાના કાયમી ઉકેલ માટે અને નાગરિકોની સુવિધા માટે સરકાર દ્વારા આ મહત્વપૂર્ણ પગલું ભરવામાં આવ્યું છે.
યોજનાનો વ્યાપ અને મુખ્ય જોગવાઈઓ:
-
શહેરો અને ગામડાઓ બંનેને આવરી લેવાશે: માત્ર શહેરો જ નહીં, પરંતુ ગ્રામીણ વિસ્તારોના એવા રસ્તાઓ જ્યાં પાણી ભરાવાની સમસ્યા વધુ રહેતી હોય, ત્યાંના ડામરના રસ્તાઓને પણ તબક્કાવાર રીતે CC રોડમાં ફેરવવામાં આવશે.
-
સુવિધાપથ યોજના: સરકારની ‘સુવિધાપથ’ યોજના અંતર્ગત ગામતળના વિસ્તારોમાં CC રોડ બનાવવાની કામગીરી પહેલેથી જ કાર્યરત છે, જેને હવે વધુ વેગ આપવામાં આવશે.
-
ઔદ્યોગિક વિસ્તારો પર વિશેષ ધ્યાન: જે ઔદ્યોગિક વિસ્તારોમાં ભારે અને અતિ ભારે વાહનવ્યવહાર રહે છે, ત્યાં જરૂરિયાત મુજબ CC રોડના નિર્માણનો વ્યાપ વધુ વિસ્તારવામાં આવશે.
આ નિર્ણયથી રસ્તાઓના સમારકામ પાછળ થતો વારંવારનો ખર્ચ ઘટશે અને નાગરિકોને લાંબા સમય સુધી ટકી શકે તેવા અત્યાધુનિક માર્ગોની સુવિધા મળશે.
