ગાંધીનગરના દહેગામ તાલુકાના ગલુદણ ગામમાં પોલીસે અને ફૂડ એન્ડ ડ્રગ્સ વિભાગે સંયુક્ત દરોડા પાડીને નકલી ઘી બનાવતી ત્રણ ફેક્ટરીઓ પકડી પાડી છે, જેમાંથી 48 લાખ રૂપિયાની કિંમતનું 9300 કિલો નકલી ઘી જપ્ત કરવામાં આવ્યું છે.
ગાંધીનગર જિલ્લાના દહેગામ તાલુકાના ગલુદણ ગામમાં લોકોના સ્વાસ્થ્ય સાથે ચેડાં કરતા એક મોટા ગેરકાયદેસર કારોબારનો પર્દાફાશ થયો છે. ચોક્કસ બાતમીના આધારે પોલીસ, ફૂડ એન્ડ ડ્રગ્સ વિભાગ અને એફએસએલ (FSL) ની સંયુક્ત ટીમે ગલુદણ ગામમાં નકલી ઘી બનાવતી અને તેનું પેકેજિંગ કરતી ત્રણ ગેરકાયદેસર ફેક્ટરીઓ પર સફળ દરોડા પાડ્યા છે.
દરોડા અને જપ્તીની મુખ્ય વિગતો
બનાવટી બ્રાન્ડના નામે વેચાણ: પ્રાથમિક તપાસમાં ખુલાસો થયો છે કે આ ફેક્ટરીઓમાં વિવિધ પ્રકારના હાનિકારક એસન્સ અને કલરનો ઉપયોગ કરીને નકલી ઘી તૈયાર કરવામાં આવતું હતું. આ તૈયાર ઘીને ‘અંજની ઘી’, ‘અનુજ ઘી’ અને ‘બરસાના’ જેવી જાણીતી બ્રાન્ડના નામે બજારમાં સપ્લાય કરવામાં આવતું હતું.
લાખો રૂપિયાનો મુદ્દામાલ જપ્ત:
દરોડા દરમિયાન ટીમ દ્વારા અંદાજે ૯,૩૦૦ કિલોગ્રામ નકલી ઘી નો જથ્થો જપ્ત કરવામાં આવ્યો છે, જેની બજાર કિંમત આશરે ૪૮ લાખ રૂપિયા થાય છે.
નકલી માવો પણ ઝડપાયો:
આ ઉપરાંત ‘અક્ષીલ ડેરી પ્રોડક્ટ’ નામના એકમમાંથી માવો બનાવવા માટેનો અંદાજે ૨,૫૦0 કિલો જથ્થો પણ કબજે કરાયો છે, જેની કિંમત આશરે ૩ લાખ રૂપિયા આંકવામાં આવી છે.
આરોગ્ય વિભાગની કડક કાર્યવાહી
સેમ્પલ લેબોરેટરીમાં મોકલાયા: ફૂડ એન્ડ ડ્રગ્સ વિભાગની ટીમે સ્થળ પરથી ઘી અને અન્ય સામગ્રીના નમૂનાઓ એકત્ર કરીને ચકાસણી માટે વડોદરા સ્થિત ફૂડ એન્ડ ડ્રગ્સ લેબોરેટરીમાં મોકલી આપ્યા છે.
કાયદેસરના પગલાં: લેબોરેટરીનો રિપોર્ટ આવ્યા બાદ ભેળસેળ સાબિત થતાં જવાબદારો સામે ફૂડ સેફ્ટી એન્ડ સ્ટાન્ડર્ડ એક્ટ અને પોલીસ કાયદા હેઠળ કડક દંડાત્મક કાર્યવાહી કરવામાં આવશે.
