અમદાવાદ અને આસપાસના વિસ્તારોમાં ઝડપથી વધી રહેલા વિકાસને કારણે આગામી વર્ષોમાં પાણીની માંગ વધવાની શક્યતા છે. આ સ્થિતિને પહોંચી વળવા AMC નર્મદા ઉપરાંત સાબરમતીમાં ફ્રેન્ચ કૂવા, નવા બાંધકામોમાં વોટર મીટર ફરજિયાત કરવા અને ટ્રીટેડ વેસ્ટવોટરના પુનઃઉપયોગ જેવા વિકલ્પો પર વિચાર કરી રહ્યું છે.
અમદાવાદ શહેર અને આસપાસના વિસ્તારોમાં ઝડપથી થઈ રહેલા શહેરી વિકાસ વચ્ચે પાણીની માંગમાં પણ સતત વધારો થઈ રહ્યો છે. આગામી વર્ષોમાં પાણીની જરૂરિયાત વધુ વધવાની શક્યતાને ધ્યાનમાં રાખીને અમદાવાદ મ્યુનિસિપલ કોર્પોરેશન (AMC) હવે નર્મદા સિવાયના વૈકલ્પિક પાણીના સ્ત્રોતો શોધી રહ્યું છે. AMC દ્વારા સાબરમતી નદીમાં ફ્રેન્ચ કૂવા વિકસાવવાની શક્યતા, નવા બાંધકામોમાં વોટર મીટર ફરજિયાત કરવાની જોગવાઈ અને ટ્રીટેડ વેસ્ટવોટરના પુનઃઉપયોગ જેવા વિકલ્પો પર વિચારણા કરવામાં આવી રહી છે.
અમદાવાદમાં પાણીની માંગ વધવાની શક્યતા
અમદાવાદ ઉપરાંત AUDA, ગાંધીનગર અને GUDA વિસ્તારમાં ઝડપી બાંધકામ અને નવા રહેણાંક વિસ્તારોના વિકાસને કારણે પાણીની માંગ આગામી વર્ષોમાં નોંધપાત્ર રીતે વધવાની ધારણા છે. ઉપલબ્ધ અહેવાલો મુજબ, વર્ષ 2030 સુધીમાં પાણીની માંગ અને વપરાશમાં મોટો વધારો થઈ શકે છે. આવી સ્થિતિમાં હાલના પાણીના સ્ત્રોતો પર વધતું દબાણ AMC માટે પડકારરૂપ બની શકે છે.
નર્મદા પર અમદાવાદની મોટી નિર્ભરતા
હાલ અમદાવાદને નર્મદા આધારિત સિસ્ટમ મારફતે મોટા પ્રમાણમાં પાણી મળે છે. અહેવાલો અનુસાર કોતરપુર વોટર વર્ક્સ ખાતે ગ્રેવિટી પાઈપલાઈન મારફતે આશરે 800થી 900 MLD નર્મદાનું પાણી, જસપુર ખાતે 400થી 500 MLD અને રાસ્કા વોટર વર્ક્સ ખાતે શેઢી બ્રાન્ચ કેનાલમાંથી આશરે 200 MLD પાણી મળે છે.
પાણીના શુદ્ધિકરણ બાદ AMC શહેરના વિવિધ વિસ્તારોમાં અંદાજે 1,600થી 1,700 MLD પાણી સપ્લાય કરે છે. શહેરની વધતી જરૂરિયાતને પહોંચી વળવા કોતરપુર અને જસપુર ખાતે નવા વોટર ટ્રીટમેન્ટ પ્લાન્ટ પણ વિકસાવવામાં આવી રહ્યા છે.
સાબરમતીમાં ફરી ફ્રેન્ચ કૂવાનો વિકલ્પ
નર્મદા આધારિત પુરવઠામાં કોઈ કારણસર ઘટાડો થાય તો વૈકલ્પિક વ્યવસ્થા ઉભી કરવા AMC હવે સાબરમતી નદી તરફ પણ નજર કરી રહ્યું છે. સાબરમતીમાં અગાઉ ફ્રેન્ચ કૂવાનો ઉપયોગ કરવામાં આવતો હતો, પરંતુ પાણીમાં ગટરનું દૂષણ વધતાં આ વ્યવસ્થા બંધ કરવામાં આવી હતી.
હવે સબર્મતી બ્રિજ નજીકના પ્રસ્તાવિત બેરેજ-કમ-બ્રિજ વિસ્તારની આસપાસ ઊંડા ફ્રેન્ચ કૂવા બનાવી શકાય કે કેમ તે અંગે સર્વે કરવાની વિચારણા છે. તેમાં ભૂગર્ભજળની ગુણવત્તા અને ગટરનું દૂષણ થવાની શક્યતા પણ તપાસવામાં આવશે.
