છેલ્લા કેટલાક દિવસોથી પડી રહેલા વરસાદને કારણે રાજ્યના વિવિધ વિસ્તારોમાં વોટરલોગિંગની સમસ્યા જોવા મળી રહી છે. અમદાવાદના શાહીબાગ વિસ્તારમાં પાણી ભરાઈ ગયા હતા, જ્યારે ગાંધીનગરમાં અંડરપાસમાં પાણી ભરાવાના કારણે વાહનચાલકોને મુશ્કેલીનો સામનો કરવો પડ્યો હતો.
અમદાવાદ, શુક્રવાર
ગુજરાતમાં ચોમાસાની ધમાકેદાર એન્ટ્રી થઈ ચૂકી છે અને મેઘરાજાએ સૌરાષ્ટ્રમાં ધબધબાટી બોલાવ્યા બાદ હવે દક્ષિણ ગુજરાત તરફ રૂખ કર્યો છે. હવામાન વિભાગ (IMD) એ આજે, શુક્રવારે દક્ષિણ ગુજરાતના પાંચ જિલ્લાઓમાં ભારેથી અતિ ભારે વરસાદની આગાહી કરતા રેડ એલર્ટ જાહેર કર્યું છે. ગુરૂવારના દિવસે દક્ષિણ ગુજરાતના મોટાભાગના વિસ્તારોમાં ભારે વરસાદ નોંધાયા બાદ આજે પણ સ્થિતિ ગંભીર રહેવાની શક્યતા છે.
કયા જિલ્લાઓમાં છે રેડ એલર્ટ?
હવામાન વિભાગના લેટેસ્ટ અપડેટ મુજબ, ડાંગ, નવસારી, વલસાડ, દમણ અને દાદરા નગર હવેલી માં આજે રેડ એલર્ટ જાહેર કરવામાં આવ્યું છે. આ વિસ્તારોમાં વહીવટી તંત્રને એલર્ટ રહેવા અને જરૂરી પગલાં લેવા સૂચના આપવામાં આવી છે. રેડ એલર્ટ વાળા જિલ્લાઓ ઉપરાંત, નીચેના વિસ્તારોમાં પણ ભારે વરસાદની શક્યતાઓ છે.
* અતિ ભારે વરસાદની આગાહી: દાહોદ, મહિસાગર, ભરૂચ, સુરત અને તાપી
* ભારે વરસાદની આગાહી: ગાંધીનગર, અરવલ્લી, ખેડા, અમદાવાદ, આણંદ, પંચમહાલ, વડોદરા, છોટા ઉદેપુર, નર્મદા, અમરેલી, ભાવનગર, ગીર સોમનાથ, બોટાદ અને દીવ.
ગાજવીજ સાથે વરસાદ: ક્યાં ક્યાં પડશે?
રાજ્યના અન્ય ભાગોમાં પણ ગાજવીજ સાથે વરસાદની શક્યતા છે:
* ઉત્તર ગુજરાત: બનાસકાંઠા, પાટણ, મહેસાણા, સાબરકાંઠા.
* મધ્ય ગુજરાત: ગાંધીનગર, અરવલ્લી.
* સૌરાષ્ટ્ર અને કચ્છ: સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદ, કચ્છ અને દીવ.
વરસાદની અસર અને આગામી દિવસોની આગાહી
છેલ્લા કેટલાક દિવસોથી પડી રહેલા વરસાદને કારણે રાજ્યના વિવિધ વિસ્તારોમાં વોટરલોગિંગની સમસ્યા જોવા મળી રહી છે. અમદાવાદના શાહીબાગ વિસ્તારમાં પાણી ભરાઈ ગયા હતા, જ્યારે ગાંધીનગરમાં અંડરપાસમાં પાણી ભરાવાના કારણે વાહનચાલકોને મુશ્કેલીનો સામનો કરવો પડ્યો હતો. ઘણા વાહનો ફસાયા હોવાના રિપોર્ટ્સ પણ મળ્યા હતા.
હવામાન વિભાગે યલો એલર્ટ પણ જાહેર કર્યું છે, જેમાં 25 જૂન સુધી વરસાદ અને વાવાઝોડા જેવી સ્થિતિ ચાલુ રહેવાની આગાહી કરવામાં આવી છે. નાગરિકોને સાવચેત રહેવા અને જરૂરી હોય ત્યારે જ ઘરની બહાર નીકળવાની અપીલ કરવામાં આવી છે.
