મે મહિનામાં ભારતીય સેના દ્વારા કરાયેલી કાર્યવાહીઓમાં પાકિસ્તાનના ઘણા એરબેઝ તબાહ થઈ ગયા હતા. ભારતે લાહોરમાં ઘૂસીને પાકિસ્તાનના એર ડિફેન્સ સિસ્ટમને પણ નેસ્તનાબૂદ કરી દીધું હતું.
નવી દિલ્હી, શુક્રવાર
ઓપરેશન સિંદૂર અને ત્યારબાદ ભારતીય સેનાની સચોટ કાર્યવાહીઓથી ભારે નુકસાન વેઠ્યા બાદ પાકિસ્તાન ચીનથી મોં ફેરવીને ફરી એકવાર અમેરિકાની શરણમાં પહોંચી ગયું છે. પાકિસ્તાની સેના પ્રમુખ જનરલ આસિમ મુનીર અને ત્યારબાદ વાયુસેના પ્રમુખ ઝહીર અહમદ બાબર સિદ્ધુના અમેરિકાના તાજેતરના પ્રવાસો આ બદલાવનો સંકેત આપી રહ્યા છે.
ચીની મિસાઈલો અને એર ડિફેન્સ સિસ્ટમની નિષ્ફળતા
મે મહિનામાં ભારતીય સેના દ્વારા કરાયેલી કાર્યવાહીઓમાં પાકિસ્તાનના ઘણા એરબેઝ તબાહ થઈ ગયા હતા. ભારતે લાહોરમાં ઘૂસીને પાકિસ્તાનના એર ડિફેન્સ સિસ્ટમને પણ નેસ્તનાબૂદ કરી દીધું હતું. આ દરમિયાન, પાકિસ્તાન જે ચીની એર ડિફેન્સ સિસ્ટમ અને મિસાઈલો પર આધાર રાખી રહ્યું હતું, તે ભારતીય એર ડિફેન્સ સિસ્ટમ સામે સંપૂર્ણપણે નિષ્ફળ સાબિત થઈ. આ આઘાત બાદ પાકિસ્તાનની બેચેની વધી ગઈ છે અને તેણે પોતાના જૂના મિત્ર ચીનને છોડીને અમેરિકા તરફ નજર દોડાવી છે.
પાકિસ્તાની અધિકારીઓના દનાદન અમેરિકા પ્રવાસો
જનરલ આસિમ મુનીરે તાજેતરમાં જ અમેરિકી રાષ્ટ્રપતિ ડોનાલ્ડ ટ્રમ્પ સાથે લંચ કર્યું હતું. મુનીરના આ પ્રવાસના એક મહિનાની અંદર જ પાકિસ્તાન વાયુસેના પ્રમુખ ઝહીર અહમદ બાબર સિદ્ધુ પણ અમેરિકાના પ્રવાસે પહોંચ્યા છે. ઉલ્લેખનીય છે કે, છેલ્લા એક દાયકાથી વધુ સમયમાં કોઈ પાકિસ્તાની એરફોર્સ પ્રમુખનો આ પહેલો અમેરિકા પ્રવાસ છે.
વાયુસેના પ્રમુખનો વોશિંગ્ટન પ્રવાસ
આ પ્રવાસ દરમિયાન એર માર્શલ સિદ્ધુએ અમેરિકી વાયુસેનાના ચીફ ઓફ સ્ટાફ જનરલ ડેવિડ ઓલ્વિન સહિત અનેક ટોચના અમેરિકી સૈન્ય અધિકારીઓ સાથે મુલાકાત કરી. પાકિસ્તાન વાયુસેનાએ એક નિવેદનમાં જણાવ્યું હતું કે, “પાકિસ્તાન વાયુસેના પ્રમુખ એર ચીફ માર્શલ ઝહીર અહમદ બાબર સિદ્ધુ અમેરિકાના સત્તાવાર પ્રવાસે છે. આ ઉચ્ચ સ્તરીય મુલાકાત પાક-અમેરિકા સંરક્ષણ ભાગીદારીમાં એક સીમાચિહ્નરૂપ છે.” નિવેદનમાં એમ પણ જણાવાયું છે કે સિદ્ધુએ પોતાની અમેરિકા યાત્રા દરમિયાન દેશના ટોચના સૈન્ય અને રાજકીય નેતૃત્વ સાથે અનેક મહત્વપૂર્ણ બેઠકો કરી છે.
પ્રવાસો પાછળનું કારણ
સૂત્રોના જણાવ્યા અનુસાર, ચીની હથિયારોની નિષ્ફળતા બાદ હવે પાકિસ્તાન અમેરિકા સાથે સંરક્ષણ સહયોગ વધારવાનો પ્રયાસ કરી રહ્યું છે. મીડિયા રિપોર્ટ્સ મુજબ, છેલ્લા એક દાયકામાં પાકિસ્તાને ચીન સાથે જે રીતે નિકટતા વધારી છે, તેનાથી અમેરિકી નેતૃત્વ અને સૈન્ય અધિકારીઓ ખુશ નથી. હવે પાકિસ્તાનના ટોચના સૈન્ય અધિકારીઓ ચીની ઉપકરણો પરની પોતાની નિર્ભરતા ઘટાડીને અમેરિકા અને ચીન વચ્ચે સંતુલન બનાવવાનો પ્રયાસ કરી રહ્યા છે.
પાકિસ્તાનને શું શું જોઈએ છે?
ઓપરેશન સિંદૂર દરમિયાન ચીની એર ડિફેન્સ સિસ્ટમ ધ્વસ્ત થયા બાદ હવે પાકિસ્તાનની નજર અમેરિકાના એર ડિફેન્સ સિસ્ટમ પર છે. આ ઉપરાંત, પોતાની વાયુસેનાને આધુનિક બનાવવા માટે પાકિસ્તાન પોતાના કાફલામાં F-16 બ્લોક 70 ફાઈટર જેટ સહિત અનેક અદ્યતન અમેરિકી સૈન્ય હથિયારો ખરીદવા માંગે છે. ઇન્ડિયા ટુડેના એક રિપોર્ટ મુજબ, પાકિસ્તાન AIM-7 સ્પૈરો એર-ટુ-એર મિસાઈલ અને અમેરિકામાં બનેલા હાઈ મોબીલીટી આર્ટિલરી રોકેટ સિસ્ટમ (HIMARS)ની બેટરીઓ પણ પોતાના કાફલામાં સામેલ કરવા માંગે છે.
