ઇલેક્ટ્રિક કાર વીજળી પર ચાલે છે. ભારતમાં 1 યુનિટ વીજળીનો ખર્ચ લગભગ 6થી 8 છે, જેના કારણે તેમનો રનિંગ કોસ્ટ પ્રતિ કિલોમીટર 1 કરતાં પણ ઓછો થાય છે, જે અત્યંત આકર્ષક છે. જોકે, EV ની સૌથી મોટી મર્યાદા તેમની રેન્જ છે. લાંબી મુસાફરી પર ચાર્જિંગ એક ચિંતાનો વિષય બની શકે છે, જ્યારે હાઇબ્રિડ કારને ગમે ત્યારે પેટ્રોલ પંપ પરથી રિફ્યુઅલ કરી શકાય છે.
અમદાવાદ, ગુરૂવાર
આજકાલ પેટ્રોલ અને ડીઝલના ભાવ આસમાને છે, અને પ્રદૂષણ નિયંત્રણના નિયમો પણ કડક બની રહ્યા છે. ત્યારે નવી કાર ખરીદનારાઓ સામે એક મોટો પ્રશ્ન ઊભો થાય છે, શું મારે ઇલેક્ટ્રિક કાર (EV) ખરીદવી જોઈએ કે હાઇબ્રિડ કાર? બંનેના પોતાના ફાયદા અને મર્યાદાઓ છે. તમારા માટે કઈ કાર વધુ સારી રહેશે તે જાણવા માટે, ચાલો આ બે ટેકનોલોજી વચ્ચેના મુખ્ય તફાવતો, માઇલેજ, રનિંગ કોસ્ટ અને મેન્ટેનન્સ વિશે વિગતવાર સમજીએ.
પાવરટ્રેન અને ટેકનોલોજી, કોણ છે આગળ?
ઇલેક્ટ્રિક કાર (EV) સંપૂર્ણપણે બેટરી અને ઇલેક્ટ્રિક મોટર પર ચાલે છે. આનો અર્થ એ કે તેમને પેટ્રોલ કે ડીઝલની બિલકુલ જરૂર પડતી નથી. EVs દોડતી વખતે કોઈ ધુમાડો છોડતી નથી, એટલે કે શૂન્ય ટેલપાઇપ ઉત્સર્જન હોય છે. આ તેમને પર્યાવરણ માટે અત્યંત સ્વચ્છ અને સુરક્ષિત બનાવે છે.
બીજી તરફ હાઇબ્રિડ કારમાં બે સિસ્ટમ હોય છે: એક પેટ્રોલ અથવા ડીઝલ એન્જિન અને બીજી ઇલેક્ટ્રિક મોટર. હાઇબ્રિડ કારના મુખ્ય 3 પ્રકાર છે:
માઇલ્ડ હાઇબ્રિડ: આમાં ઇલેક્ટ્રિક મોટર ફક્ત એન્જિનને સપોર્ટ કરે છે અને પાવર આઉટપુટ વધારવામાં મદદ કરે છે.
સ્ટ્રોંગ હાઇબ્રિડ: આ કાર બેટરી પર અમુક અંતર સુધી સંપૂર્ણપણે ચાલી શકે છે.
પ્લગ-ઇન હાઇબ્રિડ: આ કારની બેટરીને બાહ્ય ચાર્જરથી પણ ચાર્જ કરી શકાય છે, અને જરૂર પડે ત્યારે પેટ્રોલ એન્જિનનો પણ ઉપયોગ કરી શકાય છે.
આમ EV સંપૂર્ણપણે પેટ્રોલ-મુક્ત છે, જ્યારે હાઇબ્રિડ કાર ફ્યુઅલ બચાવે છે પરંતુ તેના પર સંપૂર્ણપણે નિર્ભર નથી.
માઇલેજ અને રનિંગ કોસ્ટ: કયું છે બેસ્ટ?
હાઇબ્રિડ કાર એન્જિન અને મોટર બંનેના કોમ્બિનેશનને કારણે સારી માઇલેજ આપે છે. ઉદાહરણ તરીકે, Toyota Innova Hycross અને Maruti Grand Vitara Hybrid જેવી કાર 28 KMPL સુધીની માઇલેજ આપી શકે છે.
ઇલેક્ટ્રિક કાર વીજળી પર ચાલે છે. ભારતમાં 1 યુનિટ વીજળીનો ખર્ચ લગભગ 6થી 8 છે, જેના કારણે તેમનો રનિંગ કોસ્ટ પ્રતિ કિલોમીટર 1 કરતાં પણ ઓછો થાય છે, જે અત્યંત આકર્ષક છે. જોકે, EV ની સૌથી મોટી મર્યાદા તેમની રેન્જ છે. લાંબી મુસાફરી પર ચાર્જિંગ એક ચિંતાનો વિષય બની શકે છે, જ્યારે હાઇબ્રિડ કારને ગમે ત્યારે પેટ્રોલ પંપ પરથી રિફ્યુઅલ કરી શકાય છે. પર્યાવરણીય દૃષ્ટિકોણથી, EV સંપૂર્ણપણે શૂન્ય ટેલપાઇપ ઉત્સર્જન ધરાવે છે, જે તેમને વધુ ઇકો-ફ્રેન્ડલી બનાવે છે.
ચાર્જિંગ અને ફ્યુઅલ: કયું વધુ કન્વીનિયન્ટ?
ઇલેક્ટ્રિક કાર ને ચાર્જ કરવા માટે ઘરે ચાર્જર અથવા પબ્લિક ચાર્જિંગ સ્ટેશનની જરૂર પડે છે. મોટા શહેરોમાં હવે ચાર્જિંગ ઇન્ફ્રાસ્ટ્રક્ચર વધી રહ્યું છે, પરંતુ નાના શહેરો અને નગરોમાં હજુ પણ તે નબળું છે. તેનાથી વિપરીત, હાઇબ્રિડ કાર ને ચાર્જ કરવાની જરૂર નથી. તમે કોઈપણ પેટ્રોલ પંપ પરથી સરળતાથી તેને રિફ્યુઅલ કરી શકો છો. PHEV (પ્લગ-ઇન હાઇબ્રિડ) કાર બેટરી તેમજ જરૂર પડ્યે પેટ્રોલ પર ચાલે છે, જે તેમને વધુ ફ્લેક્સિબલ બનાવે છે.
કિંમત અને મેન્ટેનન્સ
ઇલેક્ટ્રિક કાર ની પ્રારંભિક કિંમત સામાન્ય રીતે 9 લાખથી શરૂ થઈને 20 લાખ સુધી જઈ શકે છે, જ્યારે હાઇબ્રિડ કાર ની કિંમત 15 લાખથી 22 લાખની વચ્ચે હોય છે. EVsમાં એન્જિન અને ગિયરબોક્સ હોતા નથી, જેના કારણે તેમનું મેન્ટેનન્સ અન્ય કારની તુલનામાં ઓછું હોય છે. જોકે, જો EVની બેટરી ખરાબ થાય, તો તેને બદલવી ખૂબ મોંઘી સાબિત થઈ શકે છે. હાઇબ્રિડ કારમાં બે સિસ્ટમ (એન્જિન અને મોટર) હોય છે, જેના કારણે તેમને વધુ ફ્રીક્વન્ટ સર્વિસની જરૂર પડી શકે છે.
તમારા માટે શું છે બેસ્ટ?
તમારી જરૂરિયાતો અને ડ્રાઇવિંગ હેબિટ્સ પર આધાર રાખે છે કે કઈ કાર તમારા માટે વધુ સારી છે, જો તમે મુખ્યત્વે શહેરમાં ડ્રાઇવ કરો છો, રોજિંદી મુસાફરી ઓછી હોય, અને તમારી પાસે ઘરે ચાર્જિંગની સુવિધા હોય, તો ઇલેક્ટ્રિક કાર તમારા માટે પર્યાવરણને અનુકૂળ અને ઓછી રનિંગ કોસ્ટવાળો શ્રેષ્ઠ વિકલ્પ છે. જો તમે લાંબી મુસાફરી વધુ કરતા હો, ચાર્જિંગ ઇન્ફ્રાસ્ટ્રક્ચરની ચિંતા હોય, અને તમે ફ્યુઅલ એફિશિયન્સી તેમજ પાવર બંને ઈચ્છો છો, તો હાઇબ્રિડ કાર તમારા માટે સારો વિકલ્પ સાબિત થઈ શકે છે.
