સૌરાષ્ટ્રના પ્રખ્યાત રાજકોટ લોકમેળાને લઈ રાજ્ય સરકારે નવી સ્ટાન્ડર્ડ ઓપરેટિંગ પ્રોસિજર (SOP) જાહેર કરી છે
રાજકોટ,શુક્રવાર: સૌરાષ્ટ્રના પ્રખ્યાત રાજકોટ લોકમેળાને લઈ રાજ્ય સરકારે નવી સ્ટાન્ડર્ડ ઓપરેટિંગ પ્રોસિજર (SOP) જાહેર કરી છે, જે રાઈડ્સ સંચાલકો માટે મોટી રાહત લાવી છે. નવી SOP અનુસાર, RCC ફાઉન્ડેશન ફરજિયાત નહીં રહે, જ્યારે સોઈલ ટેસ્ટને માન્યતા આપવામાં આવશે. આ ઉપરાંત, અન્ય નિર્ણયો સ્થાનિક પ્રશાસનના હવાલે કરવામાં આવ્યા છે. ટેમ્પરરી લોકમેળાઓ માટે 90 દિવસનું લાઈસન્સ આપવામાં આવશે, અને જિલ્લા શહેરોમાં ઈન્સ્પેક્શન કમિટીમાં વર્ગ-2 કક્ષાના ઈજનેરની નિમણૂક ફરજિયાત રહેશે. મેળા આયોજકોએ એમેઝમેન્ટ રાઈડ્સ એન્ડ ગેમિંગ ઝોન એક્ટિવિટી સેફટી રૂલ્સ 2024 હેઠળ અરજી કરવાની રહેશે.
છેલ્લા એક વર્ષથી રાજકોટના ભાતીગળ લોકમેળાની રાઈડ્સની SOPને લઈ વિવાદ ચાલી રહ્યો હતો. રાઈડ્સ સંચાલકોએ SOPના કડક નિયમો સામે વિરોધ નોંધાવી, ગત વર્ષે હાઈકોર્ટનો સહારો લીધો હતો. ચાલુ વર્ષે પણ, સંચાલકોએ પ્લોટ માટેના ફોર્મ ન ભરીને SOPમાં છૂટછાટની માંગણી કરી હતી. આ મુદ્દે તેમણે મુખ્યમંત્રી, ગૃહમંત્રી, યાંત્રિક વિભાગના સચિવ અને સાંસદને રજૂઆતો કરી હતી. આ માંગણીઓને ધ્યાને લઈ, રાજ્ય સરકારના ગૃહ વિભાગના ઉપ સચિવ શ્રધ્ધા પરમારે આજે ખાસ પરિપત્ર બહાર પાડી, SOPમાં છૂટછાટ આપવાનો નિર્ણય જાહેર કર્યો. આ પરિપત્રમાં લોકમેળાઓ અને ગેમિંગ ઝોન માટે રાઈડ્સના લાઈસન્સ આપવા અંગે સ્પષ્ટ સૂચનાઓ આપવામાં આવી છે.
