જન્માષ્ટમી પહેલા ગુજરાતમાં કાનૂની માપ વિજ્ઞાન અને ગ્રાહક બાબતોની કચેરી દ્વારા 25 જિલ્લાની 332 દુકાનો પર દરોડા પાડવામાં આવ્યા છે. ગેરરીતિ બદલ 126 એકમો પાસેથી 5.91 લાખ રૂપિયાનો દંડ વસૂલવામાં આવ્યો છે. આ વિશે વધુ વિગતો જાણો.
ગાંધીનગર, ગુરૂવાર
જન્માષ્ટમી અને અન્ય તહેવારોને ધ્યાનમાં રાખીને, ગુજરાત સરકારના કાનૂની માપ વિજ્ઞાન અને ગ્રાહક બાબતોની કચેરીએ રાજ્યભરમાં એક મોટી ડ્રાઈવ શરૂ કરી છે. આ ડ્રાઈવના ભાગરૂપે, રાજ્યના કુલ 25 જિલ્લામાં 332 મીઠાઈ, ફરસાણ, ડ્રાયફ્રુટ અને ગિફ્ટ શોપ્સ પર દરોડા પાડીને તપાસ હાથ ધરવામાં આવી હતી. આ કાર્યવાહીનો મુખ્ય હેતુ ગ્રાહકોને તોલમાપમાં થતી છેતરપિંડીથી બચાવવાનો છે.
126 એકમો ગેરરીતિ કરતા પકડાયા, 5.91 લાખનો દંડ વસૂલ્યો
તપાસ દરમિયાન, વિભાગને અનેક દુકાનોમાં ગેરરીતિઓ જોવા મળી હતી. કુલ 126 એકમો સામે કેસ નોંધીને લીગલ એક્શન લેવામાં આવી છે. આ ગેરરીતિઓમાં વજનમાં ઓછું આપવું, વજન કાંટાનું રી-વેરિફિકેશન અને સ્ટેમ્પિંગ ન કરાવવું, વેરિફિકેશન સર્ટિફિકેટ ડિસ્પ્લે ન કરવું અને પેકર રજિસ્ટ્રેશન ન કરવું જેવી બાબતોનો સમાવેશ થાય છે. આ એકમો પાસેથી માફી ફી તરીકે કુલ 591500 રૂપિયાનો દંડ વસૂલવામાં આવ્યો છે.
ગ્રાહક જાગૃતિ અને સુરક્ષા મુખ્ય ઉદ્દેશ
તોલમાપ વિભાગના અધિકારીઓએ આ અંગે જણાવ્યું હતું કે આ ઝુંબેશનો મુખ્ય ઉદ્દેશ એ છે કે તહેવારોના સમયગાળા દરમિયાન ગ્રાહકોને કોઈ પણ પ્રકારની છેતરપિંડીનો ભોગ ન બનવું પડે. આ સાથે ગ્રાહકોને તેમના અધિકારો વિશે જાગૃત કરવાનો પણ વિભાગનો પ્રયાસ છે. આ તપાસણીમાં નાયબ નિયંત્રક, મદદનીશ નિયંત્રક અને ઈન્સ્પેક્ટરોની ટીમે કામગીરી કરી હતી. આ કાર્યવાહી હજુ ચાલુ છે અને આગામી દિવસોમાં વધુ દુકાનોમાં તપાસ કરવામાં આવશે.
