હવામાન નિષ્ણાત અંબાલાલ પટેલની લેટેસ્ટ આગાહી મુજબ, ગુજરાતમાં 23 ઓગસ્ટથી 26 ઓગસ્ટ સુધી ભારેથી અતિ ભારે વરસાદની સંભાવના છે. જાણો કયા વિસ્તારોમાં પૂરની સ્થિતિ સર્જાઈ શકે છે અને સપ્ટેમ્બરમાં વરસાદ કેવો રહેશે.
અમદાવાદ, શનિવાર
હવામાન નિષ્ણાત અંબાલાલ પટેલે ગુજરાતમાં આગામી દિવસો માટે વરસાદની મોટી આગાહી કરી છે. તેમના મતે, 23 ઓગસ્ટથી 26 ઓગસ્ટ સુધી રાજ્યના ઘણા ભાગોમાં ભારેથી અતિ ભારે વરસાદ પડી શકે છે. આ દરમિયાન કેટલાક વિસ્તારોમાં પૂર જેવી સ્થિતિ પણ ઊભી થઈ શકે છે. ખાસ કરીને બનાસકાંઠા અને મહેસાણા જિલ્લામાં ભારે વરસાદની શક્યતા વધુ છે.
સપ્ટેમ્બરમાં પણ વરસાદનું જોર યથાવત
અંબાલાલ પટેલના જણાવ્યા મુજબ, સપ્ટેમ્બર મહિનામાં પણ વરસાદનું જોર યથાવત રહેશે. ગણેશ ચતુર્થી આસપાસના દિવસોમાં સારો વરસાદ પડી શકે છે. જોકે, આ વરસાદ ખેડૂતો માટે ચિંતાનો વિષય પણ બની રહ્યો છે કારણકે અનેક વિસ્તારોમાં કૃષિ પાકોમાં ઈયળનો ઉપદ્રવ જોવા મળ્યો છે. મઘા નક્ષત્રમાં વરસાદ સારો ગણાય છે, પરંતુ પાકને નુકસાન થવાનો ડર ખેડૂતોને સતાવી રહ્યો છે.
પશ્ચિમી ઘાટ અને સૌરાષ્ટ્રમાં પણ વરસાદ
આગામી 48 કલાકમાં પશ્ચિમી ઘાટ પર પવનનું જોર વધુ રહેશે, જેના કારણે મુંબઈથી સુરત સુધીના દરિયાકાંઠાના વિસ્તારોમાં ભારે પવન ફૂંકાઈ શકે છે. દક્ષિણ ગુજરાત અને સૌરાષ્ટ્રના કેટલાક ભાગોમાં પણ અતિ ભારે વરસાદની આગાહી કરવામાં આવી છે, જે તબાહી સૂચક બની શકે છે. બંગાળના ઉપસાગરમાં એક નવી સિસ્ટમ સક્રિય થઈ છે જેના કારણે મધ્ય ગુજરાત, અમદાવાદ અને ગાંધીનગરમાં આજ સાંજ સુધીમાં વરસાદ આવી શકે છે.
નર્મદા ડેમની સપાટીમાં વધારો થશે
આ ભારે વરસાદના કારણે નર્મદા સરદાર સરોવર ડેમની સપાટીમાં વધારો થઈ શકે છે. સાબરમતી અને તાપી જેવી નદીઓમાં પણ પાણીનો પ્રવાહ વધવાની શક્યતા છે. 14 સપ્ટેમ્બર સુધી રાજ્યમાં વરસાદી ઝાપટા ચાલુ રહેશે.
તહેવારોમાં વરસાદ
અંબાલાલ પટેલના કહેવા પ્રમાણે, 23 ઓગસ્ટથી 25 ઓગસ્ટ દરમિયાન ગુજરાતમાં સારો વરસાદ થશે અને 23 ઓગસ્ટથી ‘પર્વતાકાર’ વરસાદ શરૂ થશે. 27 ઓગસ્ટથી 30 ઓગસ્ટ અને 3 સપ્ટેમ્બરથી 14 સપ્ટેમ્બર દરમિયાન પણ વરસાદ રહેશે.
