ગાંધીનગર નજીક ડ્રોન સર્વેલન્સ દ્વારા ગેરકાયદેસર રેતી ખનનનો પર્દાફાશ થયો છે. માણસાના લાકરોડા ગામ પાસે સાબરમતી નદીમાંથી 60 લાખ રૂપિયાનું એક્સેવેટર મશીન જપ્ત કરવામાં આવ્યું. આ વિશેષ ડ્રાઈવ વિશે વધુ જાણો.
ગાંધીનગર, શનિવાર
ભૂસ્તર વિજ્ઞાન અને ખનિજ ખાતાની ટીમે ડ્રોન સર્વેલન્સની મદદથી ગેરકાયદેસર રેતી ખનનનો મોટો પર્દાફાશ કર્યો છે. માણસા તાલુકાના લાકરોડા ગામ પાસે સાબરમતી નદીના પટમાંથી લગભગ 60 લાખ રૂપિયાની કિંમતનું એક મશીન જપ્ત કરવામાં આવ્યું છે.
વિશેષ ડ્રાઈવ હેઠળ રેડ
ગાંધીનગર જિલ્લામાં અનઅધિકૃત ખનીજ ખનન અને વહન સામે વિશેષ ડ્રાઈવ ચાલી રહી છે. આ ડ્રાઈવ કલેક્ટર મેહુલ કે. દવેના માર્ગદર્શન હેઠળ અને મદદનીશ ભૂસ્તરશાસ્ત્રી પ્રણવ સિંહની સૂચના હેઠળ ચાલી રહી છે. માઈન્સ સુપરવાઈઝર રણછોડ આહીર દ્વારા સરકારી ડ્રોન સર્વેલન્સ હેઠળ ઓચિંતું ઈન્સ્પેક્શન કરવામાં આવ્યું હતું.
આ ઈન્સ્પેક્શન દરમિયાન, લાકરોડા ગામ પાસેથી પસાર થતી સાબરમતી નદીના પટમાં એક હ્યુન્ડાઈ કંપનીનું એક્સેવેટર મશીન ગેરકાયદેસર રીતે રેતીનું ખનન કરતું જોવા મળ્યું હતું. જેના પગલે, ટીમે તાત્કાલિક રેડ પાડી અને અંદાજે 60 લાખનું આ મશીન જપ્ત કરી લીધું.
માલિક સામે કડક કાર્યવાહી
ભૂસ્તર વિજ્ઞાન અને ખનિજ વિભાગની વધુ તપાસમાં જાણવા મળ્યું કે આ મશીન સુરેશજી બબાજી મકવાણાનું છે. આ મશીનને પીપળજ ચેકપોસ્ટ ખાતે સીઝ કરીને રાખવામાં આવ્યું છે. ભૂસ્તરશાસ્ત્રી કચેરી દ્વારા ગેરકાયદેસર ખોદકામ કરેલી રેતીનો સ્ટોક માપીને દંડ વસૂલવાની કાર્યવાહી પણ શરૂ કરવામાં આવશે. ગુજરાત મિનરલ નિયમો-2017 હેઠળ મશીનના માલિકો સામે કડક કાયદાકીય કાર્યવાહી પણ કરવામાં આવશે.
