ગુજરાત સરકારે જમીન મહેસૂલ કાયદાની કલમ 135-ડીમાં ક્રાંતિકારી સુધારો કરી 30 દિવસનો નોટિસ પીરિયડ રદ કર્યો છે. હવે વિવાદ વગરની મિલકતોની પાકી એન્ટ્રી તાત્કાલિક પડશે. જાણો સંપૂર્ણ વિગત.
ગાંધીનગર, ગુરૂવાર
ગુજરાતમાં જમીન અને મિલકતના સોદા કરનારા લોકો માટે રાજ્ય સરકાર એક ખુશખબર લઈને આવી છે. વર્ષોથી ચાલી આવતી જટિલ મહેસૂલી પ્રક્રિયાને સરળ બનાવવા માટે સરકારે જમીન મહેસૂલ કાયદામાં મહત્વનો ફેરફાર કર્યો છે. આ નવા સુધારા બાદ હવે મિલકતની ખરીદ-વેચાણ પ્રક્રિયામાં થતો વિલંબ ઘટશે અને સામાન્ય જનતાને બિનજરૂરી હેરાનગતિમાંથી મુક્તિ મળશે.
30 દિવસનો ફરજિયાત વેઇટિંગ પિરિયડ હવે ઇતિહાસ
અત્યાર સુધીના નિયમ મુજબ, જ્યારે પણ કોઈ મિલકતનો સોદો થતો ત્યારે રેવન્યુ રેકોર્ડમાં તેની પાકી એન્ટ્રી પાડવા માટે 30 દિવસનો નોટિસ પિરિયડ રાખવો પડતો હતો. આ સમયગાળા દરમિયાન કોઈ વાંધો ન આવે તો જ એન્ટ્રી પાકી ગણાતી. પરંતુ હવે ગુજરાત જમીન મહેસૂલ એક્ટની કલમ 135-Dમાં સુધારો કરવામાં આવ્યો છે. જો મિલકત સંપૂર્ણપણે વિવાદ વગરની હોય અને તેમાં તમામ હકદારોએ પોતાની સહી આપી દીધી હોય, તો 30 દિવસની રાહ જોયા વગર તે જ દિવસે પાકી એન્ટ્રી પાડી દેવામાં આવશે.
આ નિર્ણયથી રિયલ એસ્ટેટ ક્ષેત્રમાં કામકાજની ઝડપ વધશે. ખાસ કરીને જે લોકો લોન લેવા માંગતા હોય કે તાત્કાલિક દસ્તાવેજી પ્રક્રિયા પૂર્ણ કરવા માંગતા હોય તેમને આનાથી મોટો ફાયદો થશે.
વાંધા અરજી માટે હવે માત્ર 7 દિવસનો સમય
સરકારે માત્ર નોટિસ પિરિયડ જ રદ નથી કર્યો, પરંતુ વાંધા રજૂ કરવાની પ્રક્રિયામાં પણ ધરખમ ફેરફાર કર્યો છે. જો કોઈ મિલકત વિવાદાસ્પદ હોય અથવા છેલ્લા 1 વર્ષમાં તેના રેકોર્ડમાં કોઈ ફેરફાર થયો હોય, તો અગાઉ વાંધો ઉઠાવવા માટે લાંબો સમય મળતો હતો. હવે નવા નિયમો મુજબ, વાંધા અરજી કરવા માટે માત્ર 7 દિવસનો જ સમય મળશે. આ ફેરફારને કારણે રેવન્યુ કોર્ટમાં ખોટી રીતે લંબાઈ રહેલા કેસોનો ઝડપથી નિકાલ આવશે.
કોર્ટના ઓર્ડર બાદ વધારાની નોટિસની જરૂર નહીં
ઘણીવાર એવું બનતું કે અદાલત કે ટ્રિબ્યુનલ કોઈ મિલકત અંગે સ્પષ્ટ ચુકાદો આપી દે, તો પણ રેવન્યુ રેકોર્ડમાં એન્ટ્રી પાડવા માટે ફરીથી 135-D ની નોટિસની પ્રક્રિયામાંથી પસાર થવું પડતું. રાજ્ય સરકારે હવે આ ડુપ્લીકેશન દૂર કર્યું છે. હવે જો કોઈ કોર્ટનો ઓર્ડર હશે, તો મહેસૂલ વિભાગે અલગથી નોટિસ આપવાની જરૂર રહેશે નહીં અને સીધી જ ઓર્ડર મુજબની અમલવારી કરી એન્ટ્રી પાડી દેવામાં આવશે.
બ્લેકમેલિંગ અને હેરાનગતિ પર લાગશે લગામ
આ નિર્ણય લેવા પાછળનું મુખ્ય કારણ મિલકતના સોદામાં થતી છેતરપિંડી અને બ્લેકમેલિંગ રોકવાનું છે. ઘણીવાર તોફાની તત્વો જૂના બાનાખત કે કાચી ચિઠ્ઠીઓના આધારે 30 દિવસના ગાળામાં ખોટા વાંધા ઉઠાવીને ખરીદનાર કે વેચનાર પાસેથી નાણાં પડાવવાની કોશિશ કરતા હતા. હવે પ્રક્રિયા ઝડપી બનતા આવા તત્વોને મોકો મળશે નહીં.
ગુજરાત સરકારનો આ સુધારો રિયલ એસ્ટેટ સેક્ટરમાં પારદર્શકતા લાવવાની દિશામાં મોટું પગલું છે. સામાન્ય નાગરિકોને હવે સરકારી કચેરીઓના ધક્કા ખાવામાંથી રાહત મળશે અને જમીન-મિલકતના વહીવટો વધુ સરળ તેમજ સુરક્ષિત બનશે. આ સુધારાથી રાજ્યમાં ઇઝ ઓફ ડુઇંગ બિઝનેસ ને પણ મોટું પ્રોત્સાહન મળશે.
