ઓસ્ટ્રેલિયાના કેનબેરામાં પાકિસ્તાન હોકી ટીમને શરમજનક સ્થિતિનો સામનો કરવો પડ્યો છે. હોટલનું બિલ ન ચૂકવાતા ખેલાડીઓ કલાકો સુધી રસ્તા પર ભટકતા રહ્યા. જાણો સમગ્ર વિવાદ અને પાકિસ્તાની હોકીની હાલની દુર્દશા વિશે.
અમદાવાદ, શુક્રવાર
એક સમયે વિશ્વ હોકી પર રાજ કરનારી પાકિસ્તાન હોકી ટીમની હાલત આજે દયનીય બની ગઈ છે. મેદાન પર તો ટીમ સંઘર્ષ કરી જ રહી છે, પરંતુ હવે મેદાનની બહાર પણ તેમની ભારે ફજેતી થઈ છે. ઓસ્ટ્રેલિયાના પ્રવાસે ગયેલી પાકિસ્તાની ટીમને કેનબેરામાં એક અત્યંત શરમજનક સ્થિતિમાં મુકાવું પડ્યું હતું. હોટલનું બિલ ન ભરવાના કારણે ટીમના ખેલાડીઓને હોટલમાં એન્ટ્રી મળી ન હતી અને તેઓ કલાકો સુધી રસ્તા પર સામાન સાથે રઝળતા રહ્યા હતા.
હોટલ મેનેજમેન્ટે કરી ચોખ્ખી ના
સૂત્રો પાસેથી મળતી માહિતી મુજબ, આ ઘટના FIH પ્રો લીગના બીજા તબક્કા દરમિયાન બની હતી. ટીમ હોબાર્ટમાં મેચ રમવા માટે ઓસ્ટ્રેલિયા પહોંચી હતી. કેનબેરામાં ખેલાડીઓ અને અધિકારીઓ માટે એક 4-સ્ટાર હોટલ બુક કરવામાં આવી હતી. ખેલાડીઓને એમ કહેવામાં આવ્યું હતું કે પાકિસ્તાન હોકી ફેડરેશન અને પાકિસ્તાન સ્પોર્ટ્સ બોર્ડ દ્વારા પેમેન્ટ કરી દેવામાં આવ્યું છે.
પરંતુ જ્યારે થાક્યા-પાક્યા ખેલાડીઓ હોટલ પર પહોંચ્યા ત્યારે મેનેજમેન્ટે તેમને સ્પષ્ટ કહી દીધું કે, “તમારા નામનું કોઈ કન્ફર્મ બુકિંગ નથી અને અમને કોઈ પેમેન્ટ મળ્યું નથી.” જેના કારણે આખી ટીમને હોટલની બહાર જ અટકાવી દેવામાં આવી હતી.
કોચની આજીજી અને ખેલાડીઓની મજબૂરી
આ સ્થિતિમાં ખેલાડીઓ પાસે ન તો આરામ કરવાની જગ્યા હતી કે ન તો જમવાની વ્યવસ્થા. હેડ કોચ તાહિર ઝમાને તાત્કાલિક પાકિસ્તાનમાં ઉચ્ચ અધિકારીઓનો સંપર્ક કરવાનો પ્રયાસ કર્યો હતો, પરંતુ ટાઈમ ઝોનના તફાવત અને ફંડના અભાવે કલાકો સુધી કોઈ રસ્તો નીકળ્યો નહીં. લાંબી મુસાફરી કરીને આવેલા ખેલાડીઓ માનસિક અને શારીરિક રીતે તૂટી ગયા હતા.
ખૂબ જ રકઝક અને વિનંતીઓ બાદ, હોટલ મેનેજમેન્ટ થોડા રૂમ આપવા તૈયાર થયું. જેના પરિણામે, એક રૂમમાં 2 થી 3 ખેલાડીઓએ સાથે રહેવું પડ્યું હતું. આટલી મુશ્કેલીઓ પછી તરત જ બીજા દિવસે ટીમે ઓસ્ટ્રેલિયા સામે મેચ રમવાની હતી, જેમાં સ્વાભાવિક રીતે જ માનસિક તણાવને કારણે પાકિસ્તાને 2-3 થી હારનો સામનો કરવો પડ્યો હતો.
ટીમ રામભરોસે: મેનેજર પણ ગાયબ
પાકિસ્તાની ટીમની વહીવટી વ્યવસ્થા કેટલી કથળેલી છે તેનો અંદાજ એ વાત પરથી આવે છે કે ટીમ હાલમાં કોઈ કાયમી મેનેજર વિના જ પ્રવાસ કરી રહી છે. અગાઉ, ભૂતપૂર્વ ઓલિમ્પિયન અંજુમ સઈદ ટીમ સાથે હતા, પરંતુ ફ્લાઈટમાં ધૂમ્રપાન કરવા અને એરપોર્ટ પર સુરક્ષાકર્મીઓ સાથે ઝઘડો કરવાના વિવાદ બાદ તેમને હટાવી દેવામાં આવ્યા હતા. હાલમાં ટીમ જાણે કોઈ ધણીધોરી વગર ચાલી રહી હોય તેવી સ્થિતિ છે.
ભૂતકાળના ચેમ્પિયન્સની આવી હાલત?
આ પહેલીવાર નથી કે પાકિસ્તાની ખેલાડીઓએ આવી મુશ્કેલી વેઠવી પડી હોય. આ પહેલા આર્જેન્ટિનાના પ્રવાસમાં પણ ખેલાડીઓને ભથ્થાં મળ્યા ન હતા. કેનબેરામાં છેવટે ત્યાં વસતા સ્થાનિક પાકિસ્તાની સમુદાયે આગળ આવીને ખેલાડીઓની મદદ કરવી પડી હતી. પ્રો લીગમાં પાકિસ્તાન અત્યાર સુધીની તમામ 6 મેચ હારી ચૂક્યું છે, જે દર્શાવે છે કે વહીવટી અરાજકતાની સીધી અસર ખેલાડીઓના પ્રદર્શન પર પડી રહી છે. રાષ્ટ્રીય રમત હોકીની આવી દુર્દશા ખરેખર ચિંતાનો વિષય છે.
