ઝારખંડ મુક્તિ મોરચા (JMM) એ મહાગઠબંધનમાંથી અલગ થઈને એકલા હાથે ૬ બેઠકો પર ચૂંટણી લડવાની જાહેરાત કરી દીધી છે.
બિહારમાં વિધાનસભા ચૂંટણીની વધતી જતી રાજકીય ગરમાગરમી વચ્ચે, ઝારખંડ મુક્તિ મોરચા (JMM) એ મહાગઠબંધનમાંથી અલગ થઈને એકલા હાથે ૬ બેઠકો પર ચૂંટણી લડવાની જાહેરાત કરી દીધી છે. પાર્ટીએ ૧૫ ઓક્ટોબર સુધી રાહ જોવાની વાત કરી હતી, પરંતુ હવે JMM એ સ્પષ્ટ કરી દીધું છે કે બિહારમાં કોઈ ‘ફ્રેન્ડલી ફાઇટ’ (મૈત્રીપૂર્ણ લડાઈ) નહીં થાય.
JMMના મહાસચિવ સુપ્રિયો ભટ્ટાચાર્યએ જણાવ્યું હતું કે, “અમે મજબૂતીથી લડીશું, દુશ્મન તો દુશ્મન હોય છે.” તેમણે જણાવ્યું કે પાર્ટી બિહારની ૬ બેઠકો – ધમદાહા, ચકાઈ, કટોરિયા, મનિહારી, જમુઈ અને પીરપૈંતી – પર પૂરી તાકાતથી ચૂંટણી લડશે.
JMM એ રાષ્ટ્રીય જનતા દળ (RJD) પર ગઠબંધનમાં સન્માનજનક બેઠકો ન આપવાનો આરોપ લગાવ્યો છે. સુપ્રિયો ભટ્ટાચાર્યએ કહ્યું કે પાર્ટીએ માત્ર એ જ બેઠકો માંગી હતી જ્યાં તેમના કાર્યકરો ભાજપ-જેડીયુ ગઠબંધન સામે લાંબા સમયથી સંઘર્ષ કરી રહ્યા હતા.
ભટ્ટાચાર્યએ ગઠબંધનને યાદ કરાવતા કહ્યું કે, ૨૦૧૯ની ઝારખંડ વિધાનસભા ચૂંટણીમાં JMM એ RJD અને કોંગ્રેસને સમર્થન આપ્યું હતું અને બેઠકો પણ આપી હતી. RJDના એકમાત્ર વિજેતા ધારાસભ્યને પાંચ વર્ષ સુધી મંત્રી બનાવીને મુખ્યમંત્રી હેમંત સોરેને તેમને મહત્ત્વ આપ્યું હતું. તેમ છતાં, બિહારમાં તેમને યોગ્ય સન્માન ન મળતા JMM એ હવે અલગ રસ્તો અપનાવવાનો નિર્ણય લીધો છે.
