મંગળવારે યોજાનારા આ મતદાનમાં બિહારના આશરે ૩.૭૦ કરોડ મતદારો ૧૨૨ બેઠકો પર ઊભેલા ૧૩૦૨ ઉમેદવારોનું ભાવિ નક્કી કરશે
બિહાર વિધાનસભા ચૂંટણીના અંતિમ અને બીજા તબક્કાના મતદાનની તમામ તૈયારીઓ પૂર્ણ થઈ ગઈ છે. મંગળવારે યોજાનારા આ મતદાનમાં બિહારના આશરે ૩.૭૦ કરોડ મતદારો ૧૨૨ બેઠકો પર ઊભેલા ૧૩૦૨ ઉમેદવારોનું ભાવિ નક્કી કરશે.
ચૂંટણી પંચે મતદાન માટે વ્યાપક વ્યવસ્થા કરી છે. સમગ્ર રાજ્યમાં ચાર લાખથી વધુ સુરક્ષા કર્મચારીઓને ફરજ પર તૈનાત કરવામાં આવ્યા છે અને ઇવીએમ (EVM) ને ૪૫,૩૯૯ મતદાન કેન્દ્રો પર મોકલી દેવામાં આવ્યા છે. સંવેદનશીલ અને અતિસંવેદનશીલ બૂથો પર સીઆરપીએફ જવાનોને તૈનાત કરાયા છે.
નેપાળ સરહદી જિલ્લાઓ: અંતિમ તબક્કામાં પશ્ચિમ ચંપારણ, પૂર્વી ચંપારણ, સીતામઢી, મધુબની, સુપૌલ, અરરિયા અને કિશનગંજ સહિત નેપાળની સરહદને અડીને આવેલા જિલ્લાઓમાં મતદાન થવાનું છે. આ તબક્કો સત્તાધારી પક્ષ અને વિપક્ષ બંને માટે મહત્ત્વપૂર્ણ છે, ખાસ કરીને સીમાંચલ વિસ્તારમાં જ્યાં મુસ્લિમ વસ્તીની ઘનતા વધુ છે. મહાગઠબંધન લઘુમતી સમુદાયના સમર્થન પર આધાર રાખે છે.
મુખ્ય ઉમેદવારો: આ તબક્કામાં મુખ્યમંત્રી નીતીશ કુમારની કેબિનેટના અડધો ડઝનથી વધુ મંત્રીઓનું ભાવિ દાવ પર છે. જેમાં જનતા દળ (યુ)ના વરિષ્ઠ નેતા બિજેન્દ્ર પ્રસાદ યાદવ (સુપૌલ બેઠક પરથી આઠમી વખત જીતવાનો પ્રયાસ) અને ભાજપના વરિષ્ઠ નેતા પ્રેમ કુમાર (ગયા ટાઉન બેઠક પરથી સતત આઠમી વખત ચૂંટણી મેદાનમાં) સામેલ છે.
