બી. આર. ગવઈ તરફ જૂતું ફેંકવાના પ્રયાસ જેવી ઘટનાઓનું પુનરાવર્તન અટકાવવા માટે યોગ્ય સૂચનો આપવા જણાવ્યું છે.
સુપ્રીમ કોર્ટે બુધવારે (12 નવેમ્બર, 2025) ના રોજ એટર્ની જનરલ અને સુપ્રીમ કોર્ટ બાર એસોસિયેશન (SCBA) ને અદાલત પરિસરમાં મુખ્ય ન્યાયાધીશ (CJI) બી. આર. ગવઈ તરફ જૂતું ફેંકવાના પ્રયાસ જેવી ઘટનાઓનું પુનરાવર્તન અટકાવવા માટે યોગ્ય સૂચનો આપવા જણાવ્યું છે.
જસ્ટિસ સૂર્યકાંત અને ન્યાયમૂર્તિ જૉયમાલ્યા બાગચીની બેન્ચે આ મામલે સુનાવણી કરી હતી. બેન્ચે SCBA તરફથી હાજર રહેલા વકીલોને કહ્યું કે, અદાલત આ અંગે અખિલ ભારતીય માર્ગદર્શિકા (All India Guidelines) તૈયાર કરવા પર વિચાર કરી રહી હોવાથી, તેઓ તેમના સૂચનો રજૂ કરે. જસ્ટિસ સૂર્યકાંતે જણાવ્યું, “અદાલત પરિસર અને બાર રૂમ જેવા સ્થળો પર આવી ઘટનાઓને રોકવા માટે ત્રણ-ચાર સૂચનો આપવા વિશે વિચારો. આપ સૌ કૃપા કરીને સૂચનો આપો.” બેન્ચે આ મામલાની સુનાવણી સ્થગિત કરતા કહ્યું કે, “આગામી તારીખે જે કંઈ કરવાનું હશે તે અમે જોઈશું. અમે એટર્ની જનરલને પણ આ સંબંધમાં તેમના સૂચનો આપવા વિનંતી કરીશું.”
આ બેન્ચ SCBAની તે અરજી પર સુનાવણી કરી રહી હતી, જેમાં વકીલ રાકેશ કિશોર (ઉંમર 71) વિરુદ્ધ અવમાનનાની કાર્યવાહી શરૂ કરવાની વિનંતી કરવામાં આવી હતી. આ વકીલે 6 ઓક્ટોબરે અદાલતની કાર્યવાહી દરમિયાન મુખ્ય ન્યાયાધીશ તરફ જૂતું ફેંકવાનો પ્રયાસ કર્યો હતો. અગાઉ 27 ઓક્ટોબરે સુપ્રીમ કોર્ટે આ વકીલ વિરુદ્ધ અવમાનનાની કાર્યવાહી શરૂ કરવાનો ઇનકાર કરી દીધો હતો, અને કહ્યું હતું કે કોર્ટ આવી ઘટનાઓ રોકવા માટે માર્ગદર્શિકા બનાવવાનો વિચાર કરશે. કોર્ટે જણાવ્યું હતું કે અવમાનનાની નોટિસ જાહેર કરવાથી જૂતું ફેંકવાનો પ્રયાસ કરનાર વકીલને બિનજરૂરી મહત્વ મળશે અને ઘટનાને વધુ તવજ્જો મળશે. આ ઘટના બાદ બાર કાઉન્સિલ ઓફ ઇન્ડિયા (BCI) દ્વારા વકીલ કિશોરનું લાઇસન્સ તાત્કાલિક અસરથી સસ્પેન્ડ કરી દેવામાં આવ્યું હતું. વડા પ્રધાન નરેન્દ્ર મોદીએ પણ આ ઘટનાની નિંદા કરી હતી અને મુખ્ય ન્યાયાધીશ સાથે વાત કરી હતી.
