રાજ્યસભામાં ‘વંદે માતરમ બિલ 2026’ પસાર, રાષ્ટ્રગીતના અપમાન પર થશે કડક કાર્યવાહી અને દંડનીય જોગવાઈ.
ચોમાસુ સત્રના 10મા દિવસે બુધવારે (29 July 2026) સંસદના ઉચ્ચ ગૃહ એટલે કે રાજ્યસભામાં ‘પ્રિવેન્શન ઓફ ઈન્સલ્ટ્સ ઓફ નેશનલ ઓનર એમેન્ડમેન્ટ બિલ, 2026’ (વંદે માતરમ બિલ) પસાર થઈ ગયું છે. કેન્દ્રીય ગૃહ મંત્રી અમિત શાહ દ્વારા આ મહત્વકાંક્ષી વિધેયક રાજ્યસભામાં રજૂ કરવામાં આવ્યું હતું, જેના પર ગૃહમાં વિગતવાર ચર્ચા-વિચારણા થયા બાદ તેને બહુમતીથી લીલી ઝંડી આપી દેવામાં આવી છે.
રાષ્ટ્રગીતના જાનબુઝીને કરાતા અપમાન સામે દંડનીય જોગવાઈ
બિલ પરની ચર્ચા દરમિયાન કેન્દ્રીય ગૃહ રાજ્ય મંત્રી નિત્યાનંદ રાયે જણાવ્યું હતું કે આ સુધારો માત્ર એક કાયદાકીય પ્રક્રિયા નથી, પરંતુ ભારતની આત્મા, રાષ્ટ્રીય ચેતના, સાંસ્કૃતિક વારસો અને સ્વતંત્રતા સંગ્રામ પ્રત્યેની કટિબદ્ધતા છે. તેમણે ઉમેર્યું કે 1971ના કાયદા દ્વારા રાષ્ટ્રધ્વજ, બંધારણ અને રાષ્ટ્રગાન ‘જન ગણ મન’ના સન્માનનું રક્ષણ કરાયું હતું. હવે આ નવા સુધારાથી રાષ્ટ્રગીત ‘વંદે માતરમ’ના જાનબુઝીને કરવામાં આવતા અપમાન પર પણ એ જ રીતે કડક દંડનીય કાર્યવાહી થઈ શકશે.
રાષ્ટ્રીય પ્રતીકોનું સન્માન રાજકારણથી ઉપર હોવું જોઈએ
સરકાર તરફથી સ્પષ્ટતા કરતાં નિત્યાનંદ રાયે કહ્યું કે રાષ્ટ્રીય પ્રતીકોનું સન્માન કરવાનો વિષય પક્ષીય રાજકારણથી ઉપર હોવો જોઈએ. આ વિધેયક કોઈ ચોક્કસ વ્યક્તિ કે વિચારધારાની વિરુદ્ધમાં નથી, પરંતુ દેશની ગરિમા અને આપણી સામાજિક રાષ્ટ્રીય ચેતનાના પક્ષમાં લાવવામાં આવ્યું છે.
વિપક્ષી વિરોધ સામે સરકારના આકરા પ્રહારો
કોંગ્રેસ અને સહયોગી પક્ષો દ્વારા થઈ રહેલા વિરોધ પર સવાલ ઉઠાવતા કેન્દ્રીય મંત્રીએ કહ્યું કે આખી જનતા અને દેશના યુવાનો વંદે માતરમનો વિરોધ કરનારાઓને જોઈ રહ્યા છે. રાષ્ટ્રગીતનો વિરોધ કરવો એ દેશ વિરોધી માનસિકતા ધરાવતા તત્વોના મનોબળને પ્રોત્સાહન આપવા સમાન છે. દેશનો ખેડૂત, યુવાન, મહિલાઓ, મજૂરો અને સાચો દેશભક્ત આવી વિચારસરણીને ક્યારેય સહન નહીં કરે અને આવી શક્તિઓને યોગ્ય પાઠ ભણાવશે.
