ગાંધીનગરમાં નિવૃત્ત સરકારી કર્મચારીને અકસ્માતની સારવાર, વેપારમાં રોકાણ અને સ્કૂલ ફીના નામે વિશ્વાસમાં લઈ બે મહિલા સહિત ત્રણ શખ્સોએ ₹ 8.68 લાખ રોકડા અને 20 ગ્રામ સોનાની લગડી પડાવી લીધી છે.
ગાંધીનગરના પેથાપુર ગામના એક નિવૃત્ત સરકારી કર્મચારીને વિશ્વાસમાં લઈ અકસ્માતની સારવાર, સ્કૂલ ફી અને ધંધામાં રોકાણના નામે ₹ 8.68 લાખ રોકડા અને 20 ગ્રામ સોનાની લગડી પચાવી પાડી છેતરપિંડી આચરવાનો ગંભીર કિસ્સો સામે આવ્યો છે. આ મામલે સેક્ટર 7 પોલીસે બે મહિલા સહિત ત્રણ ઠગબાઝો વિરુદ્ધ ગુનો નોંધી વધુ તપાસ હાથ ધરી છે.
ઘટનાની મુખ્ય વિગતો અને મોડસ ઓપરેન્ડી
પરિચય અને સંબંધો: પેથાપુર ચાર રસ્તા પાસે રહેતા 65 વર્ષીય નિવૃત્ત વૃદ્ધ રમેશસિંહ મહોબતસિંહ રાજપૂત ગુજરાત પ્રવાસન નિગમ લિમિટેડમાંથી નિવૃત્ત થયા છે. નોકરી દરમિયાન તેમનો પરિચય ઉર્વશીબેન રસિકલાલ સોની સાથે થયો હતો, જે બાદ કૌટુંબિક સંબંધો બંધાયા હતા.
સારવારના નામે લાખો પડાવ્યા:
ઉર્વશીબેને પોતાની ભાણી ક્રિષ્ણાબેન અને ભાણેજ જમાઈ જીગર બાલમુકુન્દ સોની સાથે રમેશસિંહની ઓળખાણ કરાવી હતી. જૂન 2025માં ક્રિષ્ણાબેનનો અકસ્માત થયાનું કહી સારવારના બહાને અવારનવાર ઓનલાઈન અને રોકડ થઈને કુલ ₹ 4,68,500 પડાવી લીધા હતા.
સોનાના વેપારમાં રોકાણની લાલચ:
‘આરના જ્વેલર્સ’ના નામે વેપાર કરતા જીગરે સોનાના વેપારમાં રોકાણ પર દર મહિને 1 ગ્રામ સોનાના નફાની લાલચ આપીને રમેશસિંહ પાસેથી ₹ 2.90 લાખની કિંમતની 20 ગ્રામની સોનાની લગડી પણ મેળવી લીધી હતી અને પ્રોમિશરી નોટ લખી આપી હતી.
સ્કૂલ ફી અને છેતરપિંડી:
આ ઉપરાંત ઉર્વશીબેને બાળકની સ્કૂલ ફી ભરવાના બહાને વધુ ₹ 4 લાખ માંગ્યા હતા. સમય વીતી જવા છતાં ત્રણેય આરોપીઓએ કુલ ₹ 8,68,500 રોકડા અને સોનાની લગડી પરત ન કરતા આખરે સેક્ટર 7 પોલીસ સ્ટેશનમાં ફરિયાદ નોંધાવવામાં આવી છે.
