ગાંધીનગર રેન્જ પોલીસે છત્રાલ GIDCની ‘હેપી ઓઈલ ઈન્ડસ્ટ્રી’ પર દરોડો પાડી પામ ઓઈલ અને કેમિકલથી બનતું નકલી ઘી ઝડપી પાડ્યું છે. પોલીસે ₹1.67 કરોડનો જથ્થો જપ્ત કરી મુખ્ય આરોપી વિરુદ્ધ કાર્યવાહી શરૂ કરી છે.
ગાંધીનગર રેન્જ આઇજી વિરેન્દ્રસિંહ યાદવના સીધા માર્ગદર્શન હેઠળ પોલીસે છત્રાલ GIDC વિસ્તારમાં દરોડો પાડીને લોકોના સ્વાસ્થ્ય સાથે ખુલ્લેઆમ ચેડાં કરતી એક બનાવટી ઘીની ફેક્ટરીનો પર્દાફાશ કર્યો છે. છત્રાલ ખાતે આવેલી ‘હેપી ઓઈલ ઈન્ડસ્ટ્રી’ નામના કારખાનામાંથી પોલીસે ₹1.67 કરોડની કિંમતનો શંકાસ્પદ પામ ઓઈલ અને જાનલેવા કેમિકલનો વિશાળ જથ્થો જપ્ત કર્યો છે, જેના કારણે નકલી ખાદ્ય પદાર્થો બનાવતા તત્વોમાં ફફડાટ વ્યાપી ગયો છે.
પામ ઓઈલમાં ખતરનાક કેમિકલ ભેળવી બનાવતા હતા આબેહૂબ દેશી ઘી
-
ચોંકાવનારી મોડસ ઓપરેન્ડી: પોલીસ દરોડા દરમિયાન બહાર આવ્યું કે ફેક્ટરીમાં સામાન્ય પામ ઓઈલમાં ‘RM Enhancer’ અને ‘BT Negative’ જેવા માનવ શરીર માટે અત્યંત હાનિકારક કેમિકલો ભેળવવામાં આવતા હતા.
-
અસલી ઘી જેવી સુગંધ અને ટેક્સચર: આ રાસાયણિક પ્રક્રિયા દ્વારા પામ ઓઈલને આબેહૂબ દેશી ઘી જેવો જ દેખાવ, સુગંધ અને ટેક્સચર આપવામાં આવતું હતું.
-
બ્રાન્ડેડ લેબલ લગાવી વેચાણ: આ કેમિકલયુક્ત પ્રોડક્ટ વિવિધ ટ્રેડિંગ કંપનીઓ દ્વારા ખરીદીને તેના પર પોતપોતાની જાણીતી બ્રાન્ડના લેબલ લગાવી અસલી ‘દેશી ઘી’ તરીકે બજારમાં ઊંચા ભાવે વેચવામાં આવતી હતી.
માસિક 30 હજાર લીટર કેમિકલયુક્ત ઘીનું સપ્લાય
પ્રાથમિક તપાસમાં ખુલાસો થયો છે કે આ ફેક્ટરીમાંથી દર મહિને આશરે 30 હજાર લીટર જેટલી તૈયાર પ્રોડક્ટ વિવિધ ટ્રેડિંગ કંપનીઓને સપ્લાય કરવામાં આવતી હતી. આ ગંભીર મામલે કલોલ તાલુકા પોલીસ સ્ટેશનમાં ફેક્ટરીના મુખ્ય આરોપી જનકકુમાર ભાવસાર વિરુદ્ધ કાયદેસરની ફરિયાદ નોંધીને વધુ તપાસ હાથ ધરવામાં આવી છે.
