દહેગામ પંથકમાં સવારે વહેલી સવારે બે કલાકમાં ખાબકેલા દોઢ ઇંચ વરસાદથી નીચાણવાળા વિસ્તારો અને મુખ્ય વેપારી સંકુલોમાં જળબંબાકાર સર્જાયો હતો.
દહેગામ શહેર તેમજ તેના આસપાસના ગ્રામ્ય પંથકમાં સવારના સમયે મેઘરાજાએ ધમાકેદાર એન્ટ્રી કરી હતી. સવારે ૬ થી ૮ વાગ્યા સુધીના ગણતરીના બે કલાકમાં જ આશરે દોઢ ઇંચ જેટલો વરસાદ તૂટી પડ્યો હતો. ટૂંકા સમયગાળામાં પડેલા આ ભારે વરસાદને કારણે સમગ્ર શહેરના નીચાણવાળા વિસ્તારોમાં પાણી ફરી વળ્યા હતા.
વેપારી સંકુલો અને દુકાનોમાં વરસાદી પાણી ઘૂસ્યા
ડ્રેનેજ અને નિકાલની યોગ્ય સુવિધાના અભાવે શહેરના મુખ્ય ચોક અને વાણિજ્યિક વિસ્તારો જળમગ્ન બન્યા હતા. વૈભવ કોમ્પ્લેક્સ અને તેની આસપાસના રસ્તાઓ પાણીમાં ગરકાવ થઈ ગયા હતા. આ ઉપરાંત એમ.જી. અમીન કોમ્પ્લેક્સના ગ્રાઉન્ડ ફ્લોર પર પાણી ભરાઈ જતાં સ્થાનિક દુકાનદારો તેમજ ખરીદી માટે આવેલા ગ્રાહકોને ભારે મુશ્કેલી વેઠવી પડી હતી.
મોડાસા રોડ અને નેહરુ ચોકડી પર ટ્રાફિક જામ
વરસાદી પાણીના ભરાવાને કારણે શહેરના મુખ્ય વાહનવ્યવહારના માર્ગો પ્રભાવિત થયા હતા. મોડાસા રોડ પર પાણી ભરાતાં અનેક વાહનચાલકો અટવાઈ પડ્યા હતા. સાથોસાથ પૂર્ણિમા ઢાળી અને સતત ધમધમતી નેહરુ ચોકડી પર કમરછેદ પાણી ભરાઈ જવાથી વાહનોની લાંબી કતારો લાગી હતી અને વાહનવ્યવહાર ખોરવાયો હતો.
જનજીવન પ્રભાવિત: તંત્ર પાસે તાત્કાલિક નિકાલની માગ
સવારના પીક અવર્સ દરમિયાન જ વરસાદ ખાબકતાં નોકરિયાત વર્ગ, શાળા-કોલેજે જતા વિદ્યાર્થીઓ અને રોજના કામકાજ અર્થે નીકળેલા નાગરિકો ભારે હાલાકીમાં મુકાયા હતા. પાણી ભરાયેલા રસ્તાઓમાંથી પસાર થવું જોખમી બની ગયું હતું. આ પરિસ્થિતિને ધ્યાનમાં રાખીને સ્થાનિકો દ્વારા વહીવટી તંત્ર તાત્કાલિક ધોરણે પાણીના નિકાલની કામગીરી હાથ ધરે તેવી જોરદાર માંગ ઉઠી છે.
