અહેવાલ મુજબ Jio Platformsનો આશરે $4 બિલિયનનો IPO 21-23 ઓક્ટોબરે ખુલી શકે છે, સંભવિત પ્રાઇસ બેન્ડ 1,150-1,220 અને લિસ્ટિંગ 28 ઓક્ટોબરે.
રિલાયન્સ ઇન્ડસ્ટ્રીઝ લિમિટેડ (RIL)ની ડિજિટલ અને ટેલિકોમ શાખા ‘જીયો પ્લેટફોર્મ્સ’ના બહુચર્ચિત IPO અંગે મોટા સમાચાર સામે આવ્યા છે. અહેવાલો મુજબ કંપની દશેરાના તહેવાર આસપાસ પબ્લિક ઈશ્યુ લાવવાની તૈયારીમાં છે. આશરે $4 બિલિયન (લગભગ 37,700 કરોડ રૂપિયા)ની ફંડિંગ સાઇઝ સાથે આ ભારતીય મૂડી બજારના ઇતિહાસનો સૌથી મોટો IPO બની શકે છે.
સંભવિત તારીખો અને પ્રાઇસ બેન્ડ
અહેવાલ અનુસાર કંપની 12 ઓક્ટોબર પછી SEBI સમક્ષ રેડ હેરિંગ પ્રોસ્પેક્ટસ (RHP) ફાઇલ કરે તેવી ધારણા છે. બજારના સૂત્રો મુજબ પ્રતિ શેર પ્રાઇસ બેન્ડ 1,150 થી 1,220 વચ્ચે હોઈ શકે છે. સંભવિત શિડ્યૂલ:
- RHP ફાઇલિંગ: 12 ઓક્ટોબર પછી
- એન્કર ઇન્વેસ્ટર્સ માટે: 19 ઓક્ટોબર
- સામાન્ય રોકાણકારો માટે: 21 થી 23 ઓક્ટોબર
- શેરબજારમાં લિસ્ટિંગ: 28 ઓક્ટોબર
જિયો પ્લેટફોર્મ્સનું મેનેજમેન્ટ 30 ઓક્ટોબર સુધીમાં IPOની તમામ કાનૂની અને લિસ્ટિંગ પ્રક્રિયા પૂર્ણ કરવાનું લક્ષ્ય રાખી રહ્યું છે.
સંપૂર્ણ ફ્રેશ ઈશ્યુ, OFS નહીં
આ ઈશ્યુની સૌથી નોંધપાત્ર બાબત એ છે કે તેમાં સંપૂર્ણપણે 27 કરોડ (270 મિલિયન) નવા શેર જારી થશે. ‘ઓફર ફોર સેલ’ (OFS) હેઠળ જૂના રોકાણકારો શેર વેચશે નહીં. અહેવાલો મુજબ તેનો અર્થ એવો છે કે મેટા, ગૂગલ, સિલ્વર લેક અને KKR જેવા વૈશ્વિક રોકાણકારો પોતાનો હિસ્સો જાળવી રાખશે. આ IPO સાથે જિયો પ્લેટફોર્મ્સનું કુલ માર્કેટ વેલ્યુએશન 9.5 લાખ કરોડ કે તેથી વધુ આંકવામાં આવી રહ્યું છે.
Jio Platformsમાં કયા વ્યવસાયો?
Jio Platformsમાં રિલાયન્સના ડિજિટલ વ્યવસાયોનો સમાવેશ થાય છે, જેમાં મુખ્ય ટેલિકોમ કંપની Reliance Jio Infocomm પણ છે. જૂન 2026 સુધીમાં Reliance Jioનો માર્કેટ શેર ફિક્સ્ડ-લાઇન કનેક્શન્સમાં આશરે 32.89% અને મોબાઇલ કનેક્શન્સમાં 39.29% હતો. કંપની પાસે લગભગ 506 મિલિયન મોબાઇલ ગ્રાહકો અને 157.9 મિલિયન ફિક્સ્ડ-લાઇન ગ્રાહકો હતા.
નોંધ: આ માહિતી અહેવાલો અને બજારના સૂત્રો પર આધારિત છે, કંપની તરફથી સત્તાવાર પુષ્ટિ નથી. આ રોકાણ સલાહ નથી. રોકાણ પહેલાં સત્તાવાર પ્રોસ્પેક્ટસ વાંચો અને નાણાકીય સલાહકારની સલાહ લો.
