GST કાઉન્સિલની 57મી બેઠકમાં કરદાતાઓ માટે અનેક મહત્વપૂર્ણ સુધારાની ભલામણ કરવામાં આવી છે. GST અધિકારીઓની ધરપકડની સત્તા દૂર કરવા, પ્રોસિક્યુશન મર્યાદા ₹1 કરોડથી વધારી ₹5 કરોડ કરવા અને સામાન્ય દંડ ₹25,000થી ઘટાડીને ₹10,000 કરવાની ભલામણ થઈ છે.
GST કાઉન્સિલની 57મી બેઠકમાં વેપારીઓ, MSME અને અન્ય કરદાતાઓ માટે મહત્વપૂર્ણ પ્રક્રિયાત્મક સુધારાઓની ભલામણ કરવામાં આવી છે. કેન્દ્રીય નાણાં પ્રધાન નિર્મલા સીતારમણની અધ્યક્ષતામાં મળેલી બેઠકમાં GST અધિકારીઓની ધરપકડ કરવાની સત્તા દૂર કરવા, પ્રોસિક્યુશનની મર્યાદા ₹1 કરોડથી વધારીને ₹5 કરોડ કરવા અને સામાન્ય દંડ ₹25,000થી ઘટાડીને ₹10,000 કરવાની ભલામણ કરવામાં આવી છે.
GST અધિકારીઓની ધરપકડની સત્તા દૂર કરવાની ભલામણ
GST કાઉન્સિલે GST કાયદા હેઠળ અધિકારીઓને મળતી ધરપકડની સત્તા દૂર કરવાની ભલામણ કરી છે. સાથે જ ક્રિમિનલ પ્રોસિક્યુશન માટેની મર્યાદા ₹1 કરોડથી વધારીને ₹5 કરોડ કરવામાં આવી છે. એટલે કે ₹5 કરોડથી ઓછી રકમના કેસોમાં પ્રોસિક્યુશન નહીં ચલાવવાની જોગવાઈ તરફ ફેરફાર કરવાનો નિર્ણય લેવાયો છે.
કાઉન્સિલે લઘુત્તમ સજાની જોગવાઈ દૂર કરવાની પણ ભલામણ કરી છે. ત્યારબાદ સજા અંગેનો નિર્ણય કોર્ટના વિવેક પર રહેશે. જોકે આ ફેરફારો માટે સંબંધિત કાયદામાં સુધારા જરૂરી રહેશે.
સામાન્ય દંડ ₹25,000થી ઘટીને ₹10,000
જે ભૂલ માટે GST કાયદામાં અલગથી કોઈ ચોક્કસ દંડ નક્કી કરવામાં આવ્યો નથી, તેવા કેસોમાં સામાન્ય દંડની મહત્તમ રકમ ₹25,000થી ઘટાડીને ₹10,000 કરવાની ભલામણ કરવામાં આવી છે. તેનો હેતુ નાના અને સામાન્ય પાલન સંબંધિત ઉલ્લંઘનોમાં કાર્યવાહીનું ભારણ ઘટાડવાનો છે.
₹10,000થી ઓછી રકમના કેસમાં નોટિસ નહીં
GST કાઉન્સિલે ₹10,000 અથવા તેનાથી ઓછી રકમ સાથે જોડાયેલા કેસોમાં નવી GST નોટિસ ન આપવાની ભલામણ કરી છે. અગાઉ આવી નોટિસો જારી થઈ ચૂકી હોય તો તેને પણ પાછી ખેંચવાની જાહેરાત કરવામાં આવી છે. સાથે જ નોટિસ અને કાર્યવાહી માટે સમગ્ર દેશમાં સામાન્ય ધોરણ બનાવવાની ભલામણ કરવામાં આવી છે.
માલની હેરફેરમાં હવે મનસ્વી ચેકિંગ પર નિયંત્રણ
માલની હેરફેર દરમિયાન વાહનોને રોકવાની પ્રક્રિયા પણ સરળ બનાવવાની ભલામણ કરવામાં આવી છે. હવે વાહનને માત્ર ચોક્કસ ગુપ્ત માહિતીના આધારે જ રોકી શકાશે અને તેના માટે ઓછામાં ઓછા જોઈન્ટ કમિશનર સ્તરના અધિકારીની પૂર્વ મંજૂરી જરૂરી રહેશે.
માલનું નિરીક્ષણ, અટકાયત અથવા જપ્તી મુખ્યત્વે સપ્લાયર રાજ્ય અથવા ગંતવ્ય રાજ્યના અધિકારીઓ કરી શકશે. રસ્તામાં આવતા અન્ય રાજ્યોમાં રૂટીન ચેકિંગ માટે વાહન રોકવાની જોગવાઈ દૂર કરવાની ભલામણ છે.
સુધારા ક્યારે લાગુ થશે?
આ 57મી GST કાઉન્સિલની ભલામણો છે. ઉપલબ્ધ અહેવાલો અનુસાર પ્રક્રિયાત્મક સુધારાઓ 1 એપ્રિલ 2027થી અમલમાં મૂકવાની યોજના છે; કાયદાકીય જોગવાઈઓમાં જરૂરી સુધારા પણ કરવા પડશે.
