વડોદરાની વિશ્વામિત્રી નદીમાં ફરી એક વખત મગરે માણસને કાળનો કોળિયો બનાવ્યો છે. વાઘોડિયા તાલુકાના પાલડી ગામના 61 વર્ષીય પૂર્વ પોલીસકર્મી નરેશ પીરુભાઈ ભાલીયાને મગરે પાણીમાં ખેંચી લીધા હતા. ભારે જહેમત બાદ તેમનો મૃતદેહ બહાર કાઢી શકાયો હતો.
ઘટના કેવી રીતે બની?
વનવિભાગના સૂત્રોના જણાવ્યા અનુસાર, નરેશભાઈ ઘડો લઈને પાણી ભરવા માટે નદી કિનારે ગયા હતા. પાણી ભરતા વખતે ઘડો તેમના હાથમાંથી છૂટી ગયો. તેઓ ઘડો પાછો લેવાનો પ્રયત્ન કરતા હતા ત્યારે અચાનક મગરે તરાપ મારીને તેમને પાણીમાં ખેંચી લીધા હતા.પિતાને બચાવવા માટે તેમના પુત્રે પણ પાણીમાં કૂદકો માર્યો હતો, પરંતુ મગરના મોઢામાંથી પિતાને છોડાવી શક્યા નહોતા.
રેસ્ક્યુ કાર્યવાહીમાં મુશ્કેલી
ઘટનાની જાણ થતાં ફાયર બ્રિગેડ અને પોલીસનો કાફલો ઘટના સ્થળે પહોંચ્યો હતો. આસપાસના લોકો પણ એકઠા થઈ ગયા હતા. સૂત્રો અનુસાર મગરે લગભગ એક કલાક સુધી નરેશભાઈને મોઢામાં જકડી રાખ્યા હતા અને પાણીમાં આમતેમ ફેરા માર્યા હતા.
નદી કિનારે ઝાડી-ઝાખરાં હોવાથી રેસ્ક્યુ કાર્યવાહીમાં મુશ્કેલી પડી હતી. અંતે લાકડાની મદદથી મગરના મોઢામાંથી મૃતદેહ છોડાવી શકાયો હતો.
વારંવાર બનતી ઘટનાઓ
વિશ્વામિત્રી નદીમાં મગરોની સંખ્યા વધુ હોવાથી આવી ઘટનાઓ વારંવાર બનતી રહે છે. તંત્રે આ વિસ્તારમાં વધુ સુરક્ષા વ્યવસ્થા ગોઠવવાની જરૂર છે, તેમજ નાગરિકોએ પણ નદી કિનારે સાવધાની રાખવાની જરૂર છે.
