ગુરુવારે રાત્રે તિબેટમાં કુદરતે ફરી એકવાર કહેર વર્તાવ્યો છે, જ્યાં 7.0 ની તીવ્રતાનો અત્યંત શક્તિશાળી ભૂકંપ નોંધાયો છે. નેશનલ સેન્ટર ફોર સિસ્મોલોજી (NCS) દ્વારા આપવામાં આવેલી સત્તાવાર માહિતી અનુસાર, ભારતીય સમય મુજબ ગુરુવારે રાત્રે 8:03 વાગ્યે આ ભૂકંપ આવ્યો હતો. આ શક્તિશાળી ભૂકંપનું કેન્દ્રબિંદુ તિબેટમાં 32.368° ઉત્તર અક્ષાંશ અને 93.853° પૂર્વ રેખાંશ પર તથા તેની ઊંડાઈ 173 કિલોમીટર જેટલી ઊંડી નોંધવામાં આવી હતી. છેલ્લા 30 દિવસમાં આ પ્રદેશમાં નોંધાયેલા ભૂકંપોમાં આ સૌથી શક્તિશાળી ભૂકંપ હોવાનું માનવામાં આવે છે.
આ ભૂકંપ એવા સમયે આવ્યો છે જ્યારે થોડા મહિના અગાઉ જ નેપાળ-ચીન સરહદી ક્ષેત્રમાં હિમનદી તૂટવાથી સર્જાયેલા વિનાશક પૂર અને ભૂસ્ખલનની દુર્ઘટનાની કાળઝાળ યાદો તાજી છે. ગત 26 ઓગસ્ટના રોજ થયેલી તે દુર્ઘટનામાં અનેક લોકોએ જીવ ગુમાવ્યા હતા અને હજારો લોકો લાપતા બન્યા હતા.
નુકસાન અને રાહત બચાવ અંગે હજુ વિગતો અપ્રાપ્ત
ગુરુવારે રાત્રે આવેલા આ 7.0 ની તીવ્રતાના શક્તિશાળી ભૂકંપના કારણે જાનમાલને કેટલું નુકસાન થયું છે તે અંગે હજુ સુધી કોઈ સત્તાવાર અને સ્પષ્ટ આંકડો સામે આવ્યો નથી. વહીવટી તંત્ર અને આપત્તિ વ્યવસ્થાપન ટીમો દ્વારા પ્રભાવિત વિસ્તારોમાં માહિતી મેળવવાની અને સ્થિતિનું મૂલ્યાંકન કરવાની કામગીરી હાથ ધરવામાં આવી રહી છે. ભૂકંપની તીવ્રતા ખૂબ જ વધુ હોવાથી સ્થાનિક સ્તરે ફફડાટ ફેલાઈ ગયો છે અને સબંધિત એજન્સીઓ સતત નજર રાખી રહી છે.
