ઇઝરાયલના વડા પ્રધાન બેન્જામિન નેતન્યાહૂએ ભારતના વડા પ્રધાન નરેન્દ્ર મોદીને ઇઝરાયલના આગામી સ્વતંત્રતા દિવસની ઉજવણીમાં ભાગ લેવા આમંત્રણ આપ્યું છે.
ઇઝરાયલના વડા પ્રધાન બેન્જામિન નેતન્યાહૂએ ભારતના વડા પ્રધાન નરેન્દ્ર મોદીને ઇઝરાયલના આગામી સ્વતંત્રતા દિવસની ઉજવણીમાં ભાગ લેવા આમંત્રણ આપ્યું છે. આ સમારોહમાં મોદી ભારતીય પાઇલટ કેપ્ટન સ્મિત મચ્છર સાથે ઔપચારિક મશાલ પ્રગટાવે તેવી નેતન્યાહૂની ઇચ્છા છે. આ આમંત્રણ પાઇલટની બહાદુરીને સન્માનિત કરવાના હેતુથી આપવામાં આવ્યું છે.
નેતન્યાહૂએ PM મોદી સાથે ફોન પર કરી વાત
ગુરુવાર, 22 ઓક્ટોબર, 2026ના રોજ નેતન્યાહૂએ સોશિયલ મીડિયા પ્લેટફોર્મ X પર જણાવ્યું કે તેમણે વડા પ્રધાન નરેન્દ્ર મોદી સાથે ટેલિફોનિક વાતચીત કરી હતી. આ દરમિયાન તેમણે મોદીને ઇઝરાયલના સ્વતંત્રતા દિવસના સમારોહમાં મશાલ પ્રગટાવવા આમંત્રણ આપ્યું હતું.
નેતન્યાહૂની પોસ્ટ અનુસાર, મોદીએ આમંત્રણ બદલ તેમનો આભાર માન્યો હતો. બંને નેતાઓએ ભારત અને ઇઝરાયલ વચ્ચેના લાંબા સમયથી ચાલતા સંબંધોનો પણ ઉલ્લેખ કર્યો હતો.
કેપ્ટન સ્મિત મચ્છરની બહાદુરીને સન્માન
કેપ્ટન સ્મિત મચ્છર ફ્લાયદુબઈના વિમાનના ભારતીય પાઇલટ છે. દુબઈથી તેલ અવીવ જઈ રહેલી ફ્લાઇટ દરમિયાન કોકપિટમાં થયેલા હુમલા બાદ તેમણે મુશ્કેલ પરિસ્થિતિમાં હિંમત બતાવી હતી. અહેવાલો અનુસાર, તેમણે કોકપિટનો દરવાજો ખોલવામાં સફળતા મેળવી હતી, જેથી અન્ય લોકો હુમલાખોરને રોકવા માટે અંદર પ્રવેશી શક્યા હતા. ત્યારબાદ વિમાનનું સાઉદી અરેબિયામાં ઇમરજન્સી લેન્ડિંગ કરવામાં આવ્યું હતું.નેતન્યાહૂએ અગાઉ પણ પાઇલટની બહાદુરીની પ્રશંસા કરી હતી. હવે તેમને અને વડા પ્રધાન મોદીને ઇઝરાયલના સ્વતંત્રતા દિવસના સમારોહમાં મશાલ પ્રગટાવવા આમંત્રણ આપીને સન્માનિત કરવાની ઇચ્છા વ્યક્ત કરવામાં આવી છે.
ભારત-ઇઝરાયલના મજબૂત સંબંધોનો ઉલ્લેખ
નેતન્યાહૂએ પોતાની પોસ્ટમાં જણાવ્યું હતું કે ભારત અને ઇઝરાયલ આતંકવાદ સામે લડવા માટે સાથે મળીને કામ કરી રહ્યા છે. બંને દેશો વચ્ચેના દાયકાઓ જૂના સંબંધો પણ ચર્ચાનો ભાગ બન્યા હતા.જોકે, નેતન્યાહૂનું આમંત્રણ મળવું અને સમારોહમાં મશાલ પ્રગટાવવા માટેની અંતિમ સત્તાવાર પસંદગી થવી એ અલગ બાબતો છે. ઇઝરાયલમાં મશાલ પ્રગટાવનારાઓની પસંદગી નિર્ધારિત પ્રક્રિયા હેઠળ કરવામાં આવે છે.
