લેપ્ટોસ્પાઇરોસિસથી બચવા માટે સ્વચ્છતાનું ધ્યાન રાખવું અને દૂષિત પાણીના સંપર્કમાં આવવાનું ટાળવું અત્યંત જરૂરી છે. જો તમને લેપ્ટોસ્પાઇરોસિસ જેવા કોઈ લક્ષણો જણાય, તો તાત્કાલિક ડોક્ટરનો સંપર્ક કરો.
સુરત, શુક્રવાર
ચોમાસાની શરૂઆત થતા જ સુરતમાં લેપ્ટોસ્પાઇરોસિસનો પ્રથમ કેસ નોંધાતા આરોગ્ય તંત્રમાં દોડધામ મચી ગઈ છે. બારડોલીની એક યુવતીને લેપ્ટોસ્પાઇરોસિસના લક્ષણો જણાતા તેને તાત્કાલિક નવી સિવિલ હોસ્પિટલમાં દાખલ કરવામાં આવી છે, જ્યાં તેની સારવાર ચાલી રહી છે.
શું છે લેપ્ટોસ્પાઇરોસિસ?
લેપ્ટોસ્પાઇરોસિસ એક ચેપી રોગ છે જે ‘લેપ્ટોસ્પાઈરા’ નામના બેક્ટેરિયા દ્વારા ફેલાય છે. આ રોગ મુખ્યત્વે પ્રાણીઓ, ખાસ કરીને ઉંદરો, દ્વારા ફેલાય છે. પ્રાણીઓના યુરિન દ્વારા દૂષિત થયેલા પાણી કે માટીના સંપર્કમાં આવવાથી મનુષ્યમાં આ રોગ ફેલાઈ શકે છે. ચામડી પરના ઘા, આંખ, મોં કે નાક દ્વારા આ બેક્ટેરિયા શરીરમાં પ્રવેશી શકે છે. ખેડૂતો અને શહેરી ગરીબ વિસ્તારોમાં રહેતા લોકોમાં આ રોગનું જોખમ વધુ જોવા મળે છે.
લેપ્ટોસ્પાઇરોસિસના લક્ષણો
લેપ્ટોસ્પાઇરોસિસના લક્ષણો સામાન્યથી લઈને ગંભીર પણ હોઈ શકે છે. તેના સામાન્ય લક્ષણોમાં માથાનો દુખાવો, સ્નાયુઓમાં દુખાવો, અને તાવનો સમાવેશ થાય છે. જો ચેપ ગંભીર બને તો ફેફસાંમાંથી રક્તસ્ત્રાવ અથવા મેનિન્જાઇટિસ જેવી ગંભીર સ્થિતિ પણ સર્જાઈ શકે છે. જો દર્દીને કમળો, કિડની ફેલ્યોર અને રક્તસ્ત્રાવ થાય, તો તેને ‘વિલ્સ રોગ’ તરીકે ઓળખવામાં આવે છે. ફેફસાંમાંથી વધુ પડતો રક્તસ્ત્રાવ થાય તો તેને ‘ગંભીર પલ્મનરી હેમરેજ સિન્ડ્રોમ’ કહેવાય છે.
લેપ્ટોસ્પાઇરોસિસનું નિદાન
આ રોગનું નિદાન લોહીમાં બેક્ટેરિયા સામેની એન્ટીબોડીઝ શોધીને અથવા લોહીમાં તેના DNAની હાજરી શોધીને કરવામાં આવે છે.
ભૂતકાળમાં લેપ્ટોસ્પાઇરોસિસનો પ્રકોપ
વર્ષ 2024માં સુરતમાં લેપ્ટોસ્પાઇરોસિસના 22 કેસ નોંધાયા હતા, જેમાં 5 દર્દીઓના મોત થયા હતા. દર વર્ષે ચોમાસાની ઋતુમાં દક્ષિણ ગુજરાતના અંતરિયાળ ગામડાઓમાં આ રોગનો પ્રકોપ જોવા મળે છે. આ વર્ષે સુરત જિલ્લામાં પ્રથમ કેસ નોંધાતા આરોગ્ય વિભાગ દ્વારા જરૂરી પગલાં લેવામાં આવી રહ્યા છે અને લોકોને સાવચેતી રાખવા અપીલ કરવામાં આવી છે.
