હવામાન વિભાગે આગામી પાંચ દિવસ સુધી રાજ્યમાં વરસાદી માહોલ યથાવત રહેવાની આગાહી કરી છે. ખાસ કરીને 29 જૂન માટે, નવસારી, વલસાડ, દમણ અને દાદરા નગર હવેલી માટે ઓરેન્જ એલર્ટ જાહેર કરવામાં આવ્યું છે.
અમદાવાદ, શનિવાર
ગુજરાતમાં વરસાદી માહોલ બરાબરનો જામ્યો છે. રાજ્યભરમાં મેઘરાજા મન મૂકીને વરસી રહ્યા છે, ત્યારે હવામાન વિભાગે આગામી પાંચ દિવસ સુધી ભારેથી અતિભારે વરસાદ થવાની આગાહી કરી છે. શનિવારે સવારના 6 થી સાંજના 6 વાગ્યા સુધીમાં દેવભૂમિ દ્વારકામાં 2.44 ઇંચ અને જાંબુઘોડામાં 2.4 ઇંચ જેટલો નોંધપાત્ર વરસાદ વરસ્યો છે.
21 તાલુકામાં એક ઇંચથી વધુ વરસાદ
સ્ટેટ ઇમરજન્સી ઓપરેશન સેન્ટર, ગાંધીનગર દ્વારા જાહેર કરાયેલા આંકડા મુજબ, શનિવારે રાજ્યના 21 તાલુકાઓમાં 1 ઇંચથી વધુ વરસાદ નોંધાયો છે. જેમાં મુખ્યત્વે દ્વારકા (2.44 ઇંચ), જાંબુઘોડા (2.4 ઇંચ), લખપત (1.89 ઇંચ), પોરબંદર (1.85 ઇંચ), ભરૂચ (1.81 ઇંચ), કરજણ, ચીખલી અને વલસાડ (દરેકમાં 1.73 ઇંચ) નો સમાવેશ થાય છે. આ આંકડા દર્શાવે છે કે રાજ્યના મોટાભાગના વિસ્તારોમાં સારો વરસાદ નોંધાયો છે.
અમદાવાદમાં વહેલી સવારથી વરસાદ, બફારાથી રાહત
હવામાન વિભાગની આગાહી મુજબ, અમદાવાદ શહેરમાં પણ વહેલી સવારથી જ વરસાદ શરૂ થયો હતો. એસ.જી. હાઈવે, બોપલ, ઘુમા, આંબલી, પ્રહલાદનગર, આનંદનગર, વેજલપુર, બોડકદેવ, થલતેજ સહિતના વિસ્તારોમાં સારો વરસાદ વરસ્યો હતો. અમદાવાદમાં વરસાદના કારણે લોકોને લાંબા સમયથી અનુભવાઈ રહેલા બફારાથી રાહત મળી છે અને વાતાવરણમાં ઠંડક પ્રસરી છે.
આગામી 29 જૂન માટે વરસાદની આગાહી: ઓરેન્જ અને યલ્લો એલર્ટ
હવામાન વિભાગે આગામી પાંચ દિવસ સુધી રાજ્યમાં વરસાદી માહોલ યથાવત રહેવાની આગાહી કરી છે. ખાસ કરીને 29 જૂન માટે, નવસારી, વલસાડ, દમણ અને દાદરા નગર હવેલી માટે ઓરેન્જ એલર્ટ જાહેર કરવામાં આવ્યું છે, જ્યાં ભારેથી અતિભારે વરસાદ થવાની સંભાવના છે.
જ્યારે છોટા ઉદેપુર, નર્મદા, ડાંગ, તાપી, અમરેલી, ભાવનગર, ગીર સોમનાથ, કચ્છ અને દીવ માટે યલ્લો એલર્ટ જાહેર કરાયું છે, જ્યાં ભારે વરસાદની શક્યતા છે. આ ઉપરાંત અન્ય જિલ્લાઓમાં પણ વરસાદ થવાની સંભાવના વ્યક્ત કરવામાં આવી છે.
લો પ્રેશર અને અપર એર સાયક્લોનિક સર્ક્યુલેશન સિસ્ટમ સક્રિય
હવામાન વિભાગ અનુસાર, ગુજરાતમાં લો પ્રેશર સિસ્ટમ સક્રિય થવાને કારણે અને અપર એર સાયક્લોનિક સર્ક્યુલેશન સિસ્ટમ સક્રિય થતા વરસાદની આગાહી કરવામાં આવી છે. આ સિસ્ટમ્સના કારણે રાજ્યમાં 40 કિલોમીટર પ્રતિ કલાકની ઝડપે પવન ફૂંકાવાની સાથે ભારે વરસાદ થવાની સંભાવના છે. ખેડૂતો અને સામાન્ય જનતાને સાવચેત રહેવા અને જરૂરી તકેદારી રાખવા અપીલ કરવામાં આવી છે.
