સેમ ઓલ્ટમેનની આ સલાહ AI ટેક્નોલોજીના ભવિષ્ય અને તેના જવાબદાર ઉપયોગ અંગે મહત્વપૂર્ણ સવાલ ઉભા કરે છે.
અમદાવાદ, શુક્રવાર
આર્ટિફિશિયલ ઈન્ટેલિજન્સ (AI)ના વધતા પ્રભાવ વચ્ચે એક આશ્ચર્યજનક ખુલાસો સામે આવ્યો છે. ChatGPT જેવા ક્રાંતિકારી AI ટૂલના નિર્માતા સેમ ઓલ્ટમેને પોતે જ AIના ઉપયોગને લઈને યુઝર્સને સાવધાન રહેવા જણાવ્યું છે. એટલું જ નહીં, તેમણે AI પર ‘ભરોસો ન કરવા’ની પણ સલાહ આપી છે. ચાલો જાણીએ કે આખરે સેમ ઓલ્ટમેને આવું શા માટે કહ્યું છે.
AIનો વધતો પ્રભાવ અને સેમ ઓલ્ટમેનની ચિંતા
વર્ષ 2022માં લોન્ચ થયેલ ChatGPTએ દુનિયાભરમાં હલચલ મચાવી દીધી હતી. આ જનરેટિવ AI ટૂલ પછી Google, Meta સહિત અનેક મોટી ટેક કંપનીઓએ પોતાના AI મોડલ રજૂ કર્યા છે. એક તરફ AIએ યુઝર્સના ઘણા કામ સરળ બનાવ્યા છે, ત્યારે બીજી તરફ તેણે હજારો લોકોની નોકરીઓ છીનવી લીધી છે. ઘણા સેક્ટરમાં AI હવે માણસોને રિપ્લેસ કરી રહ્યું છે. આવા સમયે, ChatGPTના સર્જક સેમ ઓલ્ટમેન પોતે જ તેના પર સંપૂર્ણ ભરોસો નથી કરતા, જે એક વિચારણીય બાબત છે.
યુઝર્સને આપેલી ખાસ સલાહ
OpenAIના CEO સેમ ઓલ્ટમેને ChatGPT યુઝર્સને આ ટૂલ પર ‘આંખ બંધ કરીને ભરોસો ન કરવા’ની સલાહ આપી છે. તેમણે સ્પષ્ટ કર્યું કે AIની કેટલીક લિમિટેશન્સ હોય છે. તેમણે જણાવ્યું કે તેમને એ જોઈને આશ્ચર્ય થાય છે કે ChatGPT યુઝર્સ આ AI ટૂલ પર પૂરો ભરોસો કરે છે, કારણ કે AI લોકોને ભ્રમિત કરી શકે છે. “આથી, તમને સલાહ છે કે તેના પર આંખ મીંચીને ભરોસો ન કરવો જોઈએ,” તેમ તેમણે કહ્યું.
સેમ ઓલ્ટમેનની આ ટિપ્પણી પછી, ઘણા યુઝર્સ ChatGPT જેવા AI ટૂલ્સનો ઉપયોગ કરતા પહેલા બે વાર વિચારશે. લાખો યુઝર્સ રિસર્ચ, રાઈટિંગ અને પેરેન્ટિંગ એડવાઈસ જેવી બાબતો માટે AIનો ઉપયોગ કરે છે. AI દ્વારા આપવામાં આવેલી ખોટી સલાહ યુઝર્સ માટે જીવલેણ પણ સાબિત થઈ શકે છે. સેમ ઓલ્ટમેને સમજાવ્યું કે AI માણસો જેવી સમજણ નથી ધરાવતું, જેના કારણે તે ઘણીવાર ખોટી માહિતી આપી શકે છે. AIની દુનિયામાં આને હેલ્યુસિનેશન (ભ્રમ) કહેવાય છે.
AI પર વધુ અપેક્ષાઓ ન રાખવા અપીલ
સેમ ઓલ્ટમેને યુઝર્સને AI પાસેથી વધુ એક્સપેક્ટેશન્સ ન રાખવા કહ્યું છે. તેમણે ભારપૂર્વક જણાવ્યું કે AI સંપૂર્ણપણે ભરોસાપાત્ર નથી, અને આપણે તેના વિશે ઈમાનદાર રહેવું જોઈએ. આ બધી મુશ્કેલીઓ છતાં, દરરોજ લાખો લોકો ChatGPT AIનો ઉપયોગ કરે છે. આ ઉપરાંત, ઓલ્ટમેને ChatGPTના કેટલાક નવા ફીચર્સ વિશે પણ માહિતી આપી છે, જેમાં પર્સનલાઈઝેશન અને મોનેટાઈઝેશન સુધારવામાં આવશે.
