આ બ્રિજ જુલાઈ 16, 2025ના બપોરે 12 વાગ્યાથી સપ્ટેમ્બર 13, 2025ની મધરાત સુધી હેવી વ્હીકલ્સની અવરજવર માટે સંપૂર્ણપણે બંધ રહેશે.
ગાંધીનગર, ગુરૂવાર
ગાંધીનગર જિલ્લામાં અડાલજ અને ખોરજ વચ્ચે આવેલા 25 વર્ષ જૂના નર્મદા મુખ્ય નહેર બ્રિજને રિપેરિંગ માટે બે મહિના સુધી હેવી વ્હીકલ્સ માટે બંધ કરવામાં આવ્યો છે. આ બ્રિજનો પહેલો સ્પાન ડેમેજ થયો હોવાથી તાત્કાલિક રિપેરિંગ કામ શરૂ કરવામાં આવ્યું છે. જિલ્લા અધિક કલેક્ટર એન.આર. શર્માએ આ અંગેનો ઓર્ડર ઇશ્યુ કર્યો છે.
નર્મદા યોજના મુખ્ય નહેર વિભાગ-2, ગાંધીનગરના એક્ઝિક્યુટિવ એન્જિનિયરના રિપોર્ટ મુજબ, બ્રિજને વધુ નુકસાન થતું અટકાવવા આ એક્શન લેવામાં આવ્યું છે. આ બ્રિજ નર્મદા કેનાલની ચેઇન 239.021 કિ.મી. પર આવેલો છે.
ક્યારે અને કયા વાહનોને અસર થશે?
આ બ્રિજ જુલાઈ 16, 2025ના બપોરે 12 વાગ્યાથી સપ્ટેમ્બર 13, 2025ની મધરાત સુધી હેવી વ્હીકલ્સની અવરજવર માટે સંપૂર્ણપણે બંધ રહેશે. આ સમયગાળા દરમિયાન એસ.ટી. અને એ.એમ.ટી.એસ. બસો પણ આ રૂટનો ઉપયોગ કરી શકશે નહીં.
વૈકલ્પિક રૂટ કયો છે?
વાહનચાલકોને અપીલ કરવામાં આવી છે કે તેઓ આ સમય દરમિયાન સરખેજ-ગાંધીનગર હાઈવેનો વૈકલ્પિક માર્ગ તરીકે ઉપયોગ કરે. આ ડાયવર્ઝનથી ટ્રાફિક મેનેજમેન્ટમાં મદદ મળશે અને વાહનચાલકોને અસુવિધા ઓછી પડશે.
નર્મદા કેનાલ વિશે જાણો
નર્મદા મુખ્ય નહેર કેવડિયાથી રાજસ્થાન સુધી 458 કિ.મી. લાંબી છે. નર્મદા યોજના મુખ્ય નહેર વિભાગ-2, ગાંધીનગર, કેનાલના ચેઇન 144.500 કિ.મી.થી 293.501 કિ.મી. સુધીના એરિયાનું મેનેજમેન્ટ અને મેન્ટેનન્સ સંભાળે છે. આ રિપેરિંગ કામ ઝડપથી પૂરું થાય અને વાહનવ્યવહાર પૂર્વવત થાય તે માટે સત્તાવાળાઓ પ્રયાસ કરી રહ્યા છે.
