કલેક્ટર મેહુલ દવેએ આ માર્ગનું તાત્કાલિક સમારકામ શરૂ કરવા આદેશ આપ્યો હતો. જિલ્લા પંચાયત માર્ગ અને મકાન વિભાગ દ્વારા વરસતા વરસાદ વચ્ચે પણ યુદ્ધના ધોરણે સમારકામ કામગીરી શરૂ કરી દેવામાં આવી હતી.
દહેગામ, રવિવાર
ભારે વરસાદે ગુજરાતના અનેક વિસ્તારોમાં કહેર વર્તાવ્યો છે, અને તેની ઝપેટમાં દહેગામ તાલુકાનું નાની માછંગ ગામ પણ આવી ગયું છે. મુશળધાર વરસાદને કારણે ગામને જોડતો મુખ્ય માર્ગ અને તેની નીચેનું ગરનાળું તૂટી જતાં ગામ સંપર્ક વિહોણું બની ગયું હતું. ગ્રામજનોની મુશ્કેલીઓ ચરમસીમાએ પહોંચી હતી, પરંતુ જિલ્લા વહીવટી તંત્રની ત્વરિત કામગીરીએ રાહત આપી છે.
જિલ્લા ડિઝાસ્ટર સેન્ટર ખાતે વહેલી સવારથી હાજર રહેલા જિલ્લા કલેક્ટર મેહુલ દવેએ પરિસ્થિતિની ગંભીરતા પારખીને તાત્કાલિક કાર્યવાહી હાથ ધરી હતી. તેમણે SDMને તરત જ ઘટનાસ્થળે મોકલી આપ્યા હતા, અને સ્થાનિક અધિકારીઓ પણ તાત્કાલિક પહોંચી ગયા હતા. સમગ્ર વિસ્તારને કોર્ડન કરીને સુરક્ષા સુનિશ્ચિત કરવામાં આવી હતી.
યુદ્ધના ધોરણે સમારકામ શરૂ
કલેક્ટર મેહુલ દવેએ આ માર્ગનું તાત્કાલિક સમારકામ શરૂ કરવા આદેશ આપ્યો હતો. જિલ્લા પંચાયત માર્ગ અને મકાન વિભાગ દ્વારા વરસતા વરસાદ વચ્ચે પણ યુદ્ધના ધોરણે સમારકામ કામગીરી શરૂ કરી દેવામાં આવી હતી. આ કામગીરીમાં 3 JCB મશીનો અને 6 ટ્રેક્ટર કામે લગાડવામાં આવ્યા હતા. પંચાયત વિભાગના ડેપ્યુટી એન્જિનિયર જે. પી. ડોડિયાએ જણાવ્યું કે, આ કામ આજે જ પૂર્ણ કરી દેવામાં આવશે. આ અગાઉ, વીયુ નેટવર્કે ગામની સમસ્યાને ઉજાગર કરી હતી, અને તંત્રની આ તાત્કાલિક અને અસરકારક કામગીરીને બિરદાવી હતી. આ પ્રકારની સંવેદનશીલતા અને ઝડપી પ્રતિભાવ ખરેખર પ્રશંસનીય છે.
