મધ્ય પ્રદેશના ડિંડોરી જિલ્લામાં 6 વર્ષના બાળકનું જાપાનીઝ એન્સેફાલાઇટિસથી મોત થયું છે. જાણો આ ગંભીર વાયરલ બીમારીના લક્ષણો, કારણો અને તેનાથી બચવાના અસરકારક ઉપાયો વિશે. મચ્છરજન્ય આ રોગ સામે કેવી રીતે સાવચેતી રાખવી તે જાણવા માટે વાંચો
મધ્યપ્રદેશ, બુધવાર
મધ્ય પ્રદેશના ડિંડોરી જિલ્લામાં એક ગંભીર સમાચાર સામે આવ્યા છે. અહીં જાપાનીઝ એન્સેફાલાઇટિસ વાઇરસના કારણે 6 વર્ષના બાળકનું મોત થયું છે. આ ઘટનાએ સ્થાનિક આરોગ્ય વિભાગમાં ચિંતા જગાવી છે. અધિકારીઓએ જણાવ્યા મુજબ, ડિંડોરીના અમરપુર બ્લોકના બહેરા ગામમાં રહેતા સંતોષ ગૌતમના 6 વર્ષના પુત્ર અજયનું જબલપુર મેડિકલ કોલેજમાં 6 ઓગસ્ટે અવસાન થયું હતું. Indian Council of Medical Researchના રિપોર્ટમાં તેના મોતનું કારણ જાપાનીઝ એન્સેફાલાઇટિસ વાઇરસ હોવાનું સામે આવ્યું છે. આ ઘટના પછી આરોગ્ય વિભાગની ટીમે ગામની મુલાકાત લીધી અને પરિસ્થિતિનો તાગ મેળવ્યો.
અજયના પરિવારે જણાવ્યું કે ગયા મહિને રમતા રમતા તે પડી ગયો હતો, જેના પછી તેના ડાબા પગમાં સોજો આવ્યો અને તેને તીવ્ર તાવ આવ્યો. શરૂઆતમાં સ્થાનિક ખાનગી હોસ્પિટલમાં અને પછી જિલ્લા હોસ્પિટલમાં સારવાર લીધા બાદ તેને જબલપુર મેડિકલ કોલેજમાં રિફર કરાયો હતો. કમનસીબે, ત્યાં સારવાર દરમિયાન તેનું મોત થયું. હાલ, અજયની મોટી બહેન મધુને પણ તાવ હોવાથી જિલ્લા હોસ્પિટલમાં દાખલ કરવામાં આવી છે. જોકે, અધિકારીઓએ કહ્યું કે તેનામાં જાપાનીઝ એન્સેફાલાઇટિસના લક્ષણો દેખાતા નથી.
શું છે જાપાનીઝ એન્સેફાલાઇટિસ?
જાપાનીઝ એન્સેફાલાઇટિસ એક ગંભીર અને જીવલેણ વાઇરલ ઝૂનોટિક બીમારી છે. આ વાઇરસ મચ્છરો દ્વારા માણસના શરીરમાં પ્રવેશ કરે છે અને મગજ પર સીધી અસર કરે છે. સમયસર સારવાર ન મળે તો આ બીમારી જીવલેણ સાબિત થઈ શકે છે.
જાપાનીઝ એન્સેફાલાઇટિસના મુખ્ય લક્ષણો
તીવ્ર તાવ
માથાનો દુખાવો
ઊબકા અને ઊલટી
નબળાઈ અને થાક
જો સમયસર સારવાર ન કરવામાં આવે તો સ્થિતિ વધુ ગંભીર બને છે, જેના કારણે મગજમાં સોજો, કોમા અને લકવો પણ થઈ શકે છે.
બચાવના ઉપાયો
આ બીમારીથી બચવા માટે સૌથી મહત્વની બાબત મચ્છરોથી દૂર રહેવું છે.
મચ્છરદાનીનો ઉપયોગ: રાત્રે સૂતી વખતે મચ્છરદાનીનો ઉપયોગ કરવો.
સફાઈ: ઘર અને આસપાસના વિસ્તારને સ્વચ્છ રાખવા. ઘરની આસપાસ પાણી જમા ન થવા દેવું જેથી મચ્છરોનો ઉપદ્રવ ન થાય.
મચ્છર ભગાવતી પ્રોડક્ટ્સ: મચ્છર ભગાડવાની ક્રીમ, સ્પ્રે કે અન્ય ઉપકરણોનો ઉપયોગ કરવો.
આરોગ્ય વિભાગની ટીમ ડિંડોરીના ગામમાં દવાઓનો છંટકાવ કરી રહી છે, જેથી વાઇરસને ફેલાતો અટકાવી શકાય. નાગરિકોને પણ આ રોગ અંગે સાવધાન રહેવા અને લક્ષણો દેખાય તો તરત જ ડૉક્ટરની સલાહ લેવા અપીલ કરવામાં આવી છે.
