SCO સમિટમાં PM મોદી અને શી જિનપિંગ વચ્ચેની મહત્વની બેઠક. જિનપિંગે કહ્યું કે ભારત અને ચીન મિત્ર છે, હરીફ નહીં. PM મોદીને ખાસ ‘હોંગચી કાર’ પણ ભેટ આપવામાં આવી. આ સંબંધોની નવી દિશા તરફ ઈશારો કરે છે.
ચીન, રવિવાર
ઉત્તર ચીનના તિયાનજિનમાં યોજાયેલી શાંઘાઈ કોઓપરેશન ઓર્ગેનાઈઝેશન (SCO) સમિટમાં દુનિયાના ઘણા દિગ્ગજ નેતાઓ એકસાથે જોવા મળ્યા. વડાપ્રધાન નરેન્દ્ર મોદીએ ચીનના રાષ્ટ્રપ્રમુખ શી જિનપિંગ સાથે મુલાકાત કરી અને ત્યારબાદ આ લીડર્સનું ગ્રુપ ફોટો સેશન યોજાયું. આ ફોટો સેશનમાં વડાપ્રધાન મોદી, શી જિનપિંગ, રશિયાના પ્રેસિડેન્ટ વ્લાદિમીર પુતિન અને પાકિસ્તાનના વડાપ્રધાન શાહબાઝ શરીફ પણ હાજર હતા.
જિનપિંગે કહ્યું: ભારત-ચીન મિત્ર છે, હરીફ નહીં
PM મોદી સાથેની બેઠક દરમિયાન શી જિનપિંગે ખૂબ જ મહત્વનું નિવેદન આપ્યું. તેમણે કહ્યું કે, “ભારત અને ચીન માટે મિત્ર બનવું એ યોગ્ય વિકલ્પ છે.” જિનપિંગે ભારપૂર્વક જણાવ્યું કે બંને દેશોએ સરહદ વિવાદોને સંબંધો પર હાવી થવા દેવા જોઈએ નહીં. તેમના મતે, ભારત અને ચીન એકબીજાના વિકાસ માટે તકો છે, કોઈ ખતરો નથી. ડ્રેગન (ચીન) અને હાથી (ભારત)નું સાથે કામ કરવું એ બંને દેશો માટે ફાયદાકારક છે. તેમણે બંને દેશો વચ્ચેના સંબંધોને લાંબા ગાળાના દ્રષ્ટિકોણથી જોવાની વાત કરી અને વ્યૂહાત્મક સંવાદ વધારવા પર ભાર મૂક્યો.
આ વર્ષ ભારત અને ચીન વચ્ચેના રાજદ્વારી સંબંધોની 75મી વર્ષગાંઠ છે. જિનપિંગે કહ્યું કે આ સમયે બંને દેશો પર સ્થિર અને રચનાત્મક સંબંધો જાળવવાની જવાબદારી વધી જાય છે.
ચીને PM મોદીને આપી ખાસ ‘હોંગચી કાર’
SCO સમિટ માટે ચીન પહોંચેલા વડાપ્રધાન મોદીને એક ખાસ ‘હોંગચી કાર’ આપવામાં આવી. આ એ જ કાર છે જેનો ઉપયોગ શી જિનપિંગ પોતાના સત્તાવાર પ્રવાસોમાં કરે છે. ‘હોંગચી’ એટલે ‘લાલ ધ્વજ’, જે ચીનની એક જાણીતી લક્ઝરી બ્રાન્ડ છે. આ કારને ચીનમાં ‘મેડ ઇન ચાઇના’ ઓળખનું પ્રતીક માનવામાં આવે છે. આ પહેલા મહાબલીપુરમ સમિટ દરમિયાન જિનપિંગે પણ ‘હોંગચી L5’ કારનો ઉપયોગ કર્યો હતો.
ચીન દ્વારા વડાપ્રધાન મોદીને આ ખાસ કાર આપવી એ બંને દેશો વચ્ચેના સંબંધોમાં નરમાઈના સંકેત તરીકે જોવામાં આવી રહી છે. આ ઘટનાક્રમથી આશા જાગી છે કે ભવિષ્યમાં ભારત અને ચીન વચ્ચેના સંબંધો વધુ સુધરશે.
