સાબૂ એ એક એવો વ્યક્તિ છે જેના જીવનમાં એડવેન્ચર, સ્ટારડમ અને દેશપ્રેમ ત્રણેયના તત્વો સમાયેલા છે
મુંબઈ, શનિવાર : ભારતના સૌપ્રથમ હોલીવૂડ સ્ટાર સાબૂ દસ્તગીરના વિચિત્ર અને પ્રેરણાદાયક જીવન પર હવે બાયોપિક બનાવવામાં આવી રહી છે. સાબૂ એ એક એવો વ્યક્તિ છે જેના જીવનમાં એડવેન્ચર, સ્ટારડમ અને દેશપ્રેમ ત્રણેયના તત્વો સમાયેલા છે. તાજેતરમાં દીપિકા પદુકોણને હોલીવૂડ વોક ઓફ ફેમમાં સ્થાન મળ્યા બાદ ફરીથી લોકોના ધ્યાનમાં સાબૂનું નામ આવ્યું – કારણ કે તેઓ આ સન્માન મેળવનારા પહેલા ભારતીય હતા.
ભારતના પહેલા હોલીવૂડ સ્ટાર સાબૂ દસ્તગીર પર બાયોપિક બની રહી છે. તાજેતરમાં દીપિકા પદુકોણને હોલીવૂડ વોક ઓફ ફેમમાં સ્થાન મળ્યું ત્યારે સાબૂ દસ્તગીરનું નામ પણ સમાચારોમાં ચમક્યું હતું કારણ કે આ સન્માન મેળવનારા તેઓ પહેલા ભારતીય હતા. રસપ્રદ વાત એ છે કે સાબૂ મહેબૂબ ખાનની ‘મધર ઈન્ડિયા’ માં બિરજુની ભૂમિકા માટે પહેલી પસંદગી હતા પરંતુ વર્ક વિઝા નહિ મળવાને કારણે તેમણે આ ફિલ્મ ગુમાવી હતી.સાબૂના પિતા મૈસુરના મહારાજના હાથીઓના મહાવત હતા. તેમનું બાળપણ મૈસુરના જંગલોમાં આ હાથીઓ વચ્ચે જ પસાર થયું હતું. ૧૯૩૪માં અમેરિકી ફિલ્મ નિર્માતા રોબર્ટ ફલેહંટી ‘એલિફન્ટ બોય’ નામની ફિલ્મના કલાકારની શોધ માટે ભારત આવ્યા હતા. ત્યારે તેમનો મેળાપ ત્યારે ૧૩ વર્ષના કિશોર સાબૂ સાથે થયો હતો. ૧૯૩૭માં આ ફિલ્મ રીલિઝ થયા બાદ સાબૂને હોલીવૂડમાં લોકપ્રિયતા મળી અને તે પછી તેમણે ‘ધી ડ્રમ’, ‘ધી થીફ ઓફ બગદાદ’, ‘જંગલબૂૂક’, ‘અરેબિયન નાઈટ્સ’, ‘કોબરા વુમન’ સહિતની અનેક ફિલ્મોમાં કામ કર્યું હતું. સાબૂએ દ્વિતિય વિશ્વ યુદ્ધમાં અમેરિકી એરફોર્સમાં જોડાઈને ગનર તરીકે પણ ફરજ બજાવી હતી. દેબલીના મજુમદારનાં પુસ્તક ‘સાબૂઃ ધી રિમાર્કેબલ સ્ટોરી ઓફ ઈન્ડિયાઝ ફર્સ્ટ હોલીવૂડ સ્ટાર’ના ફિલ્મ અને ટેલિવિઝન રાઈટ્સ ઓલમાઈટી મોશન પિકચર્સ નામની કંપનીએ ખરીદી લીધા છે.
