ગુજરાત સરકારના મહેસૂલ વિભાગના અધિક મુખ્ય સચિવ શ્રીમતી જયંતિ રવિએ આજે ગાંધીનગર જિલ્લાના કલોલ તાલુકા સેવા સદનની મુલાકાત લીધી હતી. આ મુલાકાતનો મુખ્ય ઉદ્દેશ્ય તાલુકા કક્ષાએથી આપવામાં આવતી લોક સેવાઓ, આધુનિક સુવિધાઓ અને ચાલી રહેલા લોક કલ્યાણના કાર્યોની સમીક્ષા કરવાનો હતો.
આધુનિક જનસેવા કેન્દ્ર અને સૌર ઊર્જા સંચાલિત સુવિધાઓનું નિરીક્ષણ
શ્રીમતી જયંતિ રવિએ તાલુકા સેવા સદન ખાતે નવનિર્માણ પામેલા આધુનિક મોડેલ જનસેવા કેન્દ્રની મુલાકાત લીધી હતી. તેમણે જનસેવા કેન્દ્ર ખાતે લોકોને અપાતી સેવાઓ, તેની ગુણવત્તા અને ઉપલબ્ધ સુવિધાઓનું બારીકાઈથી નિરીક્ષણ કર્યું હતું. આ સાથે તેમણે કેન્દ્ર ખાતે હાજર લોકો સાથે સીધો સંવાદ સાધી તેમના પ્રતિભાવો જાણ્યા હતા. ખાસ કરીને, તેમણે વાતાનુકૂલિત જનસેવા કેન્દ્ર સંપૂર્ણપણે સૌર ઊર્જા સંચાલિત હોવાની નોંધ લીધી હતી, જે પર્યાવરણ અનુકૂળ પહેલનું ઉત્તમ ઉદાહરણ પૂરું પાડે છે.
ત્યારબાદ, તેમણે આધુનિક સબ રજિસ્ટ્રાર કચેરીની પણ મુલાકાત લીધી અને રજિસ્ટ્રેશન માટે આવેલા લોકો સાથે વાતચીત કરી. તેમણે રજિસ્ટ્રેશન પ્રક્રિયામાં મહત્તમ ઈ-કેવાયસી (e-KYC) નો ઉપયોગ થાય તે માટે જાગૃતિ લાવવા સૂચન કર્યું હતું.
સરકારી પડતર જમીનના આલ્બમનું અનાવરણ અને કલક્ટર સાથે બેઠક
આ મુલાકાત દરમિયાન, અધિક મુખ્ય સચિવના હસ્તે કલેક્ટર, ગાંધીનગર, શ્રી મેહુલ કે. દવેના માર્ગદર્શન હેઠળ તૈયાર કરવામાં આવેલ સરકારી પડતર જમીનની આદ્યતન સ્થળ સ્થિતિ દર્શાવતા આલ્બમનું અનાવરણ કરવામાં આવ્યું હતું. આ આલ્બમ જમીન વ્યવસ્થાપનમાં પારદર્શિતા લાવવામાં મદદરૂપ થશે.
ત્યારબાદ, શ્રીમતી જયંતિ રવિએ કલોલ તાલુકાના તમામ સંકલન અધિકારીઓ સાથે બેઠક યોજી હતી. આ બેઠકમાં કલેક્ટર, ગાંધીનગર, શ્રી મેહુલ કે. દવે દ્વારા લોક હિતાર્થે ગામે ગામ યોજાયેલા દિશા કેમ્પ, સઘન વૃક્ષારોપણ અભિયાન, સોલર રૂફ ટોપ યોજના અને પ્રાકૃતિક કૃષિ જેવા વિષયો પર કરવામાં આવેલી કામગીરી અંગે વિગતવાર માહિતી આપવામાં આવી હતી.
લોક જાગૃતિ અને સરકારી યોજનાઓના લાભ અંગે ભાર
અધિક મુખ્ય સચિવશ્રીએ લોક જાગૃતિ દ્વારા સરકારી યોજનાઓના લાભ લોકો સ્વયંભૂ લે અને છેવાડાના માનવી પણ તેનાથી લાભાન્વિત થાય તે સુનિશ્ચિત કરવા પર ભાર મૂક્યો હતો. તેમણે હાજર અધિકારીઓ પાસેથી સરકારી યોજનાઓ અને સેવાઓ લોકોને વધુ સરળતાથી સ્થાનિક કક્ષાએથી કેવી રીતે આપી શકાય તે અંગેના સૂચનો પણ મુક્તપણે સાંભળ્યા હતા. બેઠકના અંતે, તેમણે હાજર અધિકારીઓને લોકસેવા માટે કટિબદ્ધ થવા પ્રોત્સાહિત કર્યા હતા.
