Ahmedabad Online Scam: અમદાવાદમાં ઇન્સ્ટાગ્રામ પર જાહેરાતો જોઈ શોપિંગ કરવાનું મોંઘું પડ્યું છે. વાસણા અને દાણીલીમડામાં ઓનલાઇન છેતરપિંડીના બે અલગ-અલગ કિસ્સામાં લોકોએ 58,000 થી વધુ રૂપિયા ગુમાવ્યા છે. જાણો આખી ઘટના.
અમદાવાદ, ગુરૂવાર
Ahmedabad Online Scam: આજકાલ સોશિયલ મીડિયા પર આકર્ષક જાહેરાતો જોઈને ઓનલાઇન શોપિંગ કરવાનો ક્રેઝ વધ્યો છે, પરંતુ આ શોખ ક્યારેક ખિસ્સા ખાલી કરી શકે છે. અમદાવાદમાં ઓનલાઇન છેતરપિંડીના બનાવોમાં ચિંતાજનક ઉછાળો જોવા મળી રહ્યો છે. તાજેતરમાં ઇન્સ્ટાગ્રામ પર સસ્તા કપડાં અને કોસ્મેટિક પ્રોડક્ટ્સની લાલચમાં આવીને બે લોકોએ કુલ 58,000 રૂપિયાથી વધુની રકમ ગુમાવી છે. આ મામલે વાસણા અને દાણીલીમડા પોલીસ સ્ટેશનમાં ગુનો દાખલ કરવામાં આવ્યો છે.
કેસ 1: વાસણાના યુવકે કોસ્મેટિકના નામે 35,000 ગુમાવ્યા
વાસણા વિસ્તારમાં રહેતા 24 વર્ષીય જૈનિશકુમાર જોષી સોલાર પેનલનો વ્યવસાય કરે છે. ગત 20 એપ્રિલના રોજ તેઓ ઇન્સ્ટાગ્રામ પર રીલ્સ જોઈ રહ્યા હતા ત્યારે તેમને કોસ્મેટિક વસ્તુઓની એક આકર્ષક એડ જોવા મળી હતી. આ લિંક પર ક્લિક કરતા જ ટેલિગ્રામ એપ્લિકેશન ઓપન થઈ હતી.
ઠગ ટોળકીએ જૈનિશકુમારને વિશ્વાસમાં લેવા માટે નીચે મુજબની યુક્તિ અજમાવી હતી સૌ પ્રથમ રજીસ્ટ્રેશન ફી તરીકે 199 રૂપિયા ભરાવ્યા. ત્યારબાદ પ્રોડક્ટ ઓર્ડર અને મેમ્બરશીપના બહાને 1,500 અને 8,777 રૂપિયા પડાવ્યા. જ્યારે યુવકે પોતાનું બેંક સ્ટેટમેન્ટ ચેક કર્યું તો ખબર પડી કે તેની જાણ બહાર 8,777, 7,000 અને ફરીથી 8,777 રૂપિયાના ટ્રાન્ઝેક્શન થઈ ગયા હતા. આમ, ટુકડે-ટુકડે કરીને કુલ 35,030 રૂપિયાની છેતરપિંડી આચરવામાં આવી હતી.
કેસ 2: ‘H & M’ના નામે દાણીલીમડાની યુવતી સાથે ઠગાઈ
બીજો કિસ્સો દાણીલીમડા વિસ્તારનો છે. અહીં રહેતી અને ખાનગી કંપનીમાં નોકરી કરતી 27 વર્ષીય યુવતી 15 એપ્રિલના રોજ ઇન્સ્ટાગ્રામ પર ‘H & M WOMAN GARMENTS’ નામની પ્રોફાઈલ જોઈ રહી હતી. તેને કપડાં પસંદ આવતા તેણે 1,000 રૂપિયાનો ઓર્ડર આપ્યો હતો.
જોકે, ઓર્ડર આપ્યા બાદ ઠગે તેને મેસેજ કર્યો કે ‘બિલિંગ પ્રોસેસ અટકી ગઈ છે’. જીએસટી રિફંડ આપવાના બહાને અને નકલી ઇન્વોઇસ મોકલીને યુવતીનો વિશ્વાસ જીત્યો હતો. ત્યારબાદ રિફંડ કાર્ડ રિન્યુ કરવા અને અન્ય ટેકનિકલ સમસ્યાઓ બતાવી વારંવાર પેમેન્ટ કરાવ્યું હતું. યુવતીએ કુલ 23,040 રૂપિયા ગુમાવ્યા બાદ જ્યારે વધુ 11,500 રૂપિયાની માંગણી કરવામાં આવી, ત્યારે તેને પોતે છેતરાઈ હોવાનો અહેસાસ થયો હતો.
સાયબર એક્સપર્ટની સલાહ: આટલી તકેદારી જરૂર રાખો
અમદાવાદમાં વધી રહેલા આ કિસ્સાઓને જોતા સાયબર નિષ્ણાતો લોકોને સાવધ રહેવા અપીલ કરી રહ્યા છે:
અજાણી લિંક પર ક્લિક ન કરો: ઇન્સ્ટાગ્રામ કે ફેસબુક પર આવતી અજાણી લિંક્સ હંમેશા સુરક્ષિત હોતી નથી.
વેબસાઇટની વિશ્વસનીયતા તપાસો: કોઈપણ પ્રોડક્ટ ઓર્ડર કરતા પહેલા તે પેજ અથવા વેબસાઇટ અસલી છે કે નહીં તેની ખાતરી કરો.
વ્યક્તિગત વિગતો શેર ન કરો: પેમેન્ટ માટે ક્યારેય ઓટીપી (OTP) કે બેંકની વિગતો અજાણ્યા વ્યક્તિને ન આપો.
કેશ ઓન ડિલિવરીનો આગ્રહ રાખો: જો તમે પ્રથમ વખત કોઈ અજાણી સાઇટ પરથી ખરીદી કરી રહ્યા હોવ, તો કેશ ઓન ડિલિવરી (COD) નો વિકલ્પ પસંદ કરવો વધુ હિતાવહ છે. જો તમારી સાથે પણ આવો કોઈ સાયબર ફ્રોડ થાય, તો તાત્કાલિક 1930 નંબર પર કોલ કરીને અથવા સાયબર ક્રાઈમની વેબસાઈટ પર ફરિયાદ નોંધાવો.
