અમદાવાદમાં 54 વર્ષીય વેપારી હનીટ્રેપનો શિકાર બન્યા. ફેસબુક ફ્રેન્ડ હેતલને મળવા જતા નકલી પોલીસે ડ્રગ્સ કેસની ધમકી આપી 5 લાખ પડાવ્યા. જાણો સમગ્ર ઘટના.
અમદાવાદ, બુધવાર
અમદાવાદ શહેરમાં સોશિયલ મીડિયા પર દોસ્તી કરીને લોકોને લૂંટી લેતી હનીટ્રેપ ગેંગનો આતંક સતત વધી રહ્યો છે. તાજેતરમાં ઘાટલોડિયા વિસ્તારના એક 54 વર્ષીય વેપારી આ જાળનો શિકાર બન્યા છે. ફેસબુક પર બનેલી મહિલા મિત્રએ મળવા બોલાવીને નકલી પોલીસ સાથે મળી વેપારી પાસેથી 5 લાખ રૂપિયા પડાવી લીધા હોવાની ચોંકાવનારી ઘટના સામે આવી છે.
ફેસબુક પર હેતલ નામની યુવતી સાથે થઈ હતી દોસ્તી
નારણપુરામાં દુકાન ધરાવતા દીશીષભાઈ પટેલ આજથી 3 મહિના પહેલા ફેસબુક પર હેતલ પટેલ નામની મહિલાના સંપર્કમાં આવ્યા હતા. ધીમે ધીમે બંને વચ્ચે વોટ્સએપ પર વાતચીત શરૂ થઈ ગઈ. ગત 1 જાન્યુઆરીના રોજ હેતલે દીશીષભાઈને નરોડા નાના ચિલોડા ચાર રસ્તા પાસે આવેલી એક રેસ્ટોરન્ટમાં મળવા બોલાવ્યા હતા. જેથી વેપારી પોતાની ફોર્ચ્યુનર કાર લઈને તેને મળવા પહોંચી ગયા હતા.
માતાજીના દર્શનના બહાને કાર ઊભી રખાવી અને ખેલ શરૂ
મુલાકાત બાદ હેતલે વેપારીને વિનંતી કરી કે તે તેને પાલેજ ગામ સુધી મૂકી જાય. વેપારી તેને મૂકવા જઈ રહ્યા હતા, ત્યારે રસ્તામાં ડભોડા ચાર રસ્તા પાસે જોગણી માતાના મંદિરે દર્શન કરવાના બહાને હેતલે કાર ઊભી રખાવી. બરાબર એ જ સમયે ત્યાં નંબર પ્લેટ વગરની એક સફેદ કાર આવી પહોંચી. તેમાંથી પોલીસના યુનિફોર્મમાં સજ્જ એક વ્યક્તિ અને અન્ય બે લોકો નીચે ઉતર્યા.
ડ્રગ્સના ખોટા કેસમાં આજીવન જેલની ધમકી
નકલી પોલીસ બનીને આવેલા આ શખ્સોએ તરત જ મહિલા પર ડ્રગ્સની હેરાફેરીનો આરોપ લગાવ્યો અને દીશીષભાઈને તેના મદદગાર ગણાવી દીધા. આરોપીઓએ વેપારીને ધમકાવતા કહ્યું કે, “તમારી સામે ડ્રગ્સનો કેસ કરીશું અને આખી જિંદગી જેલની હવા ખવડાવીશું. તમારો પરિવાર તમને ક્યારેય શોધી પણ નહીં શકે.” આટલું કહીને તેઓએ વેપારીને ડરાવીને તેમની જ ફોર્ચ્યુનર કારની પાછળની સીટ પર બળજબરીથી બેસાડી દીધા.
અપહરણ કરી 5 લાખ રૂપિયાનો તોડ કર્યો
આરોપીઓ વેપારીનું અપહરણ કરી કારને હિંમતનગર-પ્રાંતિજ હાઈવે તરફ લઈ ગયા. ત્યાં મામલો થાળે પાડવા માટે તેમણે વેપારી પાસે 30.70 લાખ રૂપિયાની મોટી રકમ માંગી. પરંતુ ડરી ગયેલા વેપારીએ આજીજી કરતા અંતે 5 લાખ રૂપિયામાં ડીલ નક્કી થઈ. વેપારીએ પોતાના એક મિત્રનો સંપર્ક કરી એરપોર્ટ રિંગ રોડ પાસે 5 લાખ રૂપિયા રોકડા ચૂકવ્યા. પૈસા મળતા જ ગઠિયાઓ વેપારીને મુક્ત કરી ત્યાંથી ભાગી ગયા હતા.
એક સમાચાર વાંચ્યા અને વેપારીને હિંમત આવી
આ ઘટના બન્યા પછી પણ આરોપીઓ ફોન પર વધુ પૈસાની માંગણી કરતા રહ્યા, પણ વેપારીએ ફોન ઉપાડવાનું બંધ કરી દીધું હતું. થોડા દિવસો પહેલા રામોલ પોલીસે આવી જ એક હનીટ્રેપ કરતી ગેંગને પકડી હોવાના સમાચાર વેપારીએ સોશિયલ મીડિયા પર વાંચ્યા. આ સમાચાર પરથી તેમને ખ્યાલ આવ્યો કે તેમની સાથે ગેમ રમાઈ છે. જેથી દીશીષભાઈએ હિંમત ભેગી કરી અને સીધા નરોડા પોલીસ સ્ટેશન પહોંચી ગયા.
હાલ નરોડા પોલીસે હેતલ, રવિ અને તેના અન્ય સાગરિતોની ગેંગ સામે અપહરણ, ખંડણી અને નકલી પોલીસ બનવા અંગેનો ગુનો નોંધીને આરોપીઓને પકડવા માટે તપાસના ચક્રો ગતિમાન કર્યા છે. આ ઘટના ચેતવણી આપે છે કે સોશિયલ મીડિયા પર અજાણી વ્યક્તિઓ સાથે મિત્રતા કરતા પહેલા અને તેમને મળવા જતા પહેલા ખાસ સાવચેતી રાખવી જોઈએ.
