બિહાર વિધાનસભા ચૂંટણી 2025 પહેલા ભારતીય જનતા પાર્ટી (BJP) એ પોતાના કોટાની બાકીની તમામ 18 બેઠકો માટે ઉમેદવારોની ત્રીજી યાદી જાહેર કરી દીધી છે.
બિહાર વિધાનસભા ચૂંટણી 2025 પહેલા ભારતીય જનતા પાર્ટી (BJP) એ પોતાના કોટાની બાકીની તમામ 18 બેઠકો માટે ઉમેદવારોની ત્રીજી યાદી જાહેર કરી દીધી છે. આ સાથે જ રાષ્ટ્રીય જનતાંત્રિક ગઠબંધન (NDA) માં ભાજપના ભાગે આવેલી કુલ 101 બેઠકો પરના તમામ ઉમેદવારોના નામ જાહેર થઈ ગયા છે. આ યાદીમાં રામનગર, નરકટિયાગંજ, બગાહા, ચિરૈયા, કોચાદામન સહિત અન્ય મહત્ત્વની વિધાનસભા બેઠકો પરના ઉમેદવારોના નામ સામેલ છે. અગાઉની બે યાદીઓમાં પાર્ટી અનુક્રમે 71 અને 12 ઉમેદવારોના નામ જાહેર કરી ચૂકી છે.
ભાજપની ત્રીજી યાદીમાં જાહેર થયેલા 18 નામોમાં રાઘોપુર બેઠક પરનો મુકાબલો સૌથી રસપ્રદ છે. ભાજપે આ બેઠક પર આરજેડી (RJD) નેતા અને બિહાર વિધાનસભામાં વિપક્ષના નેતા તેજસ્વી યાદવની સામે સતીશ કુમાર યાદવને NDAના ઉમેદવાર તરીકે મેદાનમાં ઉતાર્યા છે.
રાઘોપુર બેઠક પર સતીશ યાદવ અને તેજસ્વી યાદવ વચ્ચે લાંબા સમયથી ચૂંટણી જંગ ચાલી રહ્યો છે. ગત 2015 અને 2020ની ચૂંટણીઓમાં સતીશ યાદવને તેજસ્વી યાદવ સામે હારનો સામનો કરવો પડ્યો હતો. જોકે, 2010ની ચૂંટણીમાં સતીશ યાદવે JDUની ટિકિટ પર લડીને રાઘોપુરથી તેજસ્વી યાદવના માતા અને પૂર્વ મુખ્યમંત્રી રાબડી દેવીને 13,000થી વધુ મતોના માર્જિનથી હરાવ્યા હતા. ભાજપના નેતૃત્વ હેઠળના NDAએ સતીશ યાદવ પર ફરી વિશ્વાસ દર્શાવીને તેજસ્વી યાદવને ટક્કર આપવાનો પ્રયાસ કર્યો છે.
