બ્રિટનના વડાપ્રધાન કીર સ્ટાર્મર ભારતની ‘આધાર’ સિસ્ટમથી પ્રભાવિત થયા છે અને તેને પોતાના દેશમાં ‘બ્રિટ કાર્ડ’ તરીકે લાવવા વિચારી રહ્યા છે. જાણો શું છે આ યોજના અને બ્રિટન તેમાં શું ફેરફાર કરશે.
લંડન, રવિવાર
ભારતની યુનિક ડિજિટલ ઓળખ પ્રણાલી ‘આધાર’ની સફળતાએ હવે બ્રિટનને પણ પ્રેરિત કર્યું છે. બ્રિટનના વડાપ્રધાન કીર સ્ટાર્મરે તાજેતરમાં મુંબઈની મુલાકાત દરમિયાન ભારતની આ સિસ્ટમની ખૂબ પ્રશંસા કરી હતી. તેમણે સ્પષ્ટ સંકેત આપ્યો છે કે, તેઓ આ સિસ્ટમને પોતાના દેશની નવી ડિજિટલ ઓળખ યોજના, જેને સંભવતઃ ‘બ્રિટ કાર્ડ’ નામ અપાશે, તેના મોડેલ તરીકે ઉપયોગ કરવા વિચારી રહ્યા છે.
આધાર સિસ્ટમથી પ્રભાવિત થયા PM સ્ટાર્મર
PM સ્ટાર્મરે કહ્યું હતું કે, “હું આ સિસ્ટમ જોઈને ખૂબ પ્રભાવિત થયો છું.” આધાર એ દરેક ભારતીય નાગરિકને મળતો 12-અંકનો ડિજિટલ ID નંબર છે, જે ફિંગરપ્રિન્ટ્સ અને આઇરિસ સ્કેન જેવા બાયોમેટ્રિક ડેટા સાથે જોડાયેલો છે. આનાથી સરકારને એ ખાતરી કરવામાં મદદ મળે છે કે સરકારી લાભો યોગ્ય લોકો સુધી પહોંચે અને છેતરપિંડી ઓછી થાય. ભારતમાં આધારના કારણે સરકારી કાર્યો ઘણા સરળ બન્યા છે.
યોજનાનો મુખ્ય હેતુ: ગેરકાયદેસર કામદારોને રોકવા
જોકે, બ્રિટનની આ યોજના પાછળનો હેતુ થોડો અલગ છે. તેમનો મુખ્ય ધ્યેય ગેરકાયદેસર કામદારોને રોકવાનો છે, જેથી દેશમાં યોગ્ય લોકોને જ સરકારી સેવાઓ અને લાભો મળી શકે. મુંબઈ યાત્રા દરમિયાન કીર સ્ટાર્મરે આધારના મુખ્ય શિલ્પી અને ઇન્ફોસિસના સહ-સ્થાપક નંદન નીલેકણી સાથે પણ મુલાકાત કરી હતી. બંનેએ ભારતના અનુભવોના આધારે બ્રિટનમાં એક મજબૂત અને સુરક્ષિત ડિજિટલ ID સિસ્ટમ કેવી રીતે બનાવવી, તે અંગે ચર્ચા કરી હતી.
ગોપનીયતાની ચિંતાઓ અને બ્રિટનનો અલગ અભિગમ
ભારતમાં આધારથી ગોપનીયતાની ચિંતાઓ પણ વધી છે, અને બ્રિટનના રહેવાસીઓ પણ તેમની ગોપનીયતા વિશે ચિંતિત છે. તેઓ વધુ પડતી સરકારી દેખરેખ ઇચ્છતા નથી. આ ચિંતાઓને ધ્યાનમાં રાખીને, બ્રિટન તેની સિસ્ટમમાં એક મોટો ફેરફાર કરવાની યોજના બનાવી રહ્યું છે.
બ્રિટિશ સરકારના પ્રવક્તાએ મીડિયાને જણાવ્યું હતું કે, બ્રિટન તેની સિસ્ટમમાં ભારતના આધારની જેમ બાયોમેટ્રિક ડેટા (જેમ કે ફિંગરપ્રિન્ટ્સ કે આઇરિસ સ્કેન)નો સમાવેશ નહીં કરે. તેના બદલે, તેઓ ડેટા સુરક્ષા પર વધુ ધ્યાન કેન્દ્રિત કરશે. આ રીતે, બ્રિટન આધારના સારા પાસાઓને અપનાવીને, પોતાના દેશની જરૂરિયાતો અને ગોપનીયતાની ચિંતાઓ સાથે સંતુલન જાળવવા માંગે છે.
