લખનઉમાં 6ઠ્ઠા ધોરણના વિદ્યાર્થીએ ઓનલાઈન ગેમિંગમાં રૂ.13 લાખ ગુમાવ્યા બાદ આપઘાત કર્યો. તમારા બાળકોને સુરક્ષિત રાખવા આજે જ સ્માર્ટફોન અને બેંક ખાતાની સેટિંગ્સ બદલો. જાણો સરળ અને અસરકારક ઉપાયો.
લખનઉ, બુધવાર
લખનઉમાંથી એક હૃદયદ્રાવક ઘટના સામે આવી છે, જ્યાં 6ઠ્ઠા ધોરણમાં ભણતા એક વિદ્યાર્થીએ ઓનલાઈન ગેમિંગમાં પોતાના પિતાના બેંક ખાતામાંથી 13 લાખ રૂપિયા ગુમાવી દીધા અને ત્યારબાદ આપઘાત કરી લીધો. વિદ્યાર્થીના પિતા, જેઓ પેઈન્ટર તરીકે કામ કરે છે, તેમણે 2 વર્ષ પહેલાં જમીન વેચીને આ રકમ બેંકમાં જમા કરી હતી. સોમવારે જ્યારે તેઓ પાસબુક અપડેટ કરાવવા ગયા, ત્યારે તેમને ખબર પડી કે તેમનું ખાતું ખાલી છે. તપાસમાં જાણવા મળ્યું કે આ રકમ ઓનલાઈન ગેમ ‘ફ્રી ફાયર’માં ખર્ચાઈ ગઈ.
બાળકોની સુરક્ષા માટે શું કરવું?
આ ઘટના દરેક માતા-પિતા માટે ચેતવણી છે. જો તમારું બાળક તમારો સ્માર્ટફોન વાપરે છે, તો તેની અને તમારા બેંક ખાતાની સુરક્ષા માટે આજે જ આ પગલાં લો:
1. બેંક ખાતાની લિમિટ સેટ કરો
બેંક ખાતામાં દૈનિક ટ્રાન્ઝેક્શન લિમિટ સેટ કરો. UPI ટ્રાન્ઝેક્શન માટે પણ લિમિટ નક્કી કરો. આનાથી ભૂલથી મોટી રકમ ટ્રાન્સફર થવાનું જોખમ ઘટશે.
2. સ્ટ્રોંગ પાસવર્ડ અને બાયોમેટ્રિક લોક
બેંકિંગ અને UPI એપ્સ માટે સ્ટ્રોંગ પાસવર્ડ રાખો. બાયોમેટ્રિક લોક (ફિંગરપ્રિન્ટ અથવા ફેસ સ્કેન)નો ઉપયોગ કરો, જેથી એપ્સ ફક્ત તમે જ ઍક્સેસ કરી શકો.
3. પાસવર્ડ ઓટોસેવ ડિસેબલ કરો
ઘણા યુઝર્સ બ્રાઉઝરમાં પાસવર્ડ સેવ કરે છે. આ ફીચર બંધ કરો, જેથી બાળકો ભૂલથી બેંકિંગ એપ્સ ઍક્સેસ ન કરી શકે.
4. પેરેંટલ કંટ્રોલ ઓન કરો
ગૂગલ પ્લે સ્ટોર અને એપ સ્ટોર પર પેરેંટલ કંટ્રોલ ફીચરનો ઉપયોગ કરો. ખરીદી માટે પાસવર્ડ અથવા બાયોમેટ્રિક કન્ફર્મેશન ફરજિયાત કરો.
સાયબર સુરક્ષા પ્રત્યે સજાગ રહો
આજના ડિજિટલ યુગમાં બાળકો ઓનલાઈન ગેમ્સ અને એપ્સનો ઉપયોગ કરે છે, પરંતુ માતા-પિતાએ સાવચેત રહેવું જરૂરી છે. નાની સાવચેતીઓથી મોટું નુકસાન ટાળી શકાય છે. આજે જ તમારા સ્માર્ટફોન અને બેંક ખાતાની સેટિંગ્સ ચેક કરો અને તમારા બાળકોને સુરક્ષિત રાખો.
