દિલ્હીના ઇન્દિરા ગાંધી ઇન્ટરનેશનલ (IGI) એરપોર્ટ પર એર ટ્રાફિક કંટ્રોલ (ATC) સિસ્ટમમાં સર્જાયેલી મોટી ટેકનિકલ ખામી દૂર થઈ ગઈ છે અને ફ્લાઇટ્સનું સંચાલન ફરીથી સામાન્ય થઈ રહ્યું છે.
દિલ્હીના ઇન્દિરા ગાંધી ઇન્ટરનેશનલ (IGI) એરપોર્ટ પર એર ટ્રાફિક કંટ્રોલ (ATC) સિસ્ટમમાં સર્જાયેલી મોટી ટેકનિકલ ખામી દૂર થઈ ગઈ છે અને ફ્લાઇટ્સનું સંચાલન ફરીથી સામાન્ય થઈ રહ્યું છે. એરલાઇન ઇન્ડિગો (IndiGo) તરફથી આપવામાં આવેલી માહિતી મુજબ, એર ટ્રાફિક સિસ્ટમમાં આવેલી આ ખામી હવે ઠીક કરી લેવામાં આવી છે, જેના પગલે એરપોર્ટ પર કામકાજ ધીમે ધીમે સામાન્ય થઈ રહ્યું છે. આ ટેકનિકલ સમસ્યાને કારણે લગભગ 800 ફ્લાઇટ્સ મોડી પડી હતી, જેના કારણે મુસાફરોને કલાકો સુધી ભારે હાલાકીનો સામનો કરવો પડ્યો હતો.
ભારતીય વિમાનપત્તન પ્રાધિકરણ (AAI) એ પણ આ અંગે નિવેદન આપતા જણાવ્યું હતું કે એર ટ્રાફિક કંટ્રોલની ‘ઓટોમેટિક મેસેજ સ્વિચિંગ સિસ્ટમ (AMSS)’ માં આવેલી ટેકનિકલ ખામીનું નિરાકરણ લાવવામાં આવ્યું છે અને સિસ્ટમ ફરીથી કામ કરી રહી છે. AAI ના જણાવ્યા અનુસાર, આ IP-આધારિત AMSS સિસ્ટમમાં 6 નવેમ્બરના રોજ સમસ્યા જોવા મળી હતી, જેના કારણે ફ્લાઇટ પ્લાન મેસેજની પ્રક્રિયામાં વિલંબ થયો હતો.
AAI એ ખાતરી આપી છે કે AMSS પ્રણાલીઓ હવે કાર્યરત છે અને ઓટોમેટિક કામગીરીના સામાન્ય કાર્યોમાં ભૂતકાળના અમુક કામને કારણે થોડો વિલંબ થઈ શકે છે, પરંતુ પરિસ્થિતિ ટૂંક સમયમાં સંપૂર્ણપણે સામાન્ય થઈ જશે. આ ખામીના કારણે ઇન્ડિગો, એર ઇન્ડિયા, સ્પાઇસજેટ અને આકાસા એર જેવી તમામ એરલાઇન્સની ફ્લાઇટ્સના સમયપત્રક પર અસર પડી હતી.
