આ વ્યક્તિ કાયમી કર્મચારી ન હોવા છતાં તેનો રુઆબ અને કચેરીમાં દારૂ પીને છાકટો બનવાનો બનાવ તંત્રની બેદરકારી છતી કરે છે.
દહેગામ, સોમવાર
દહેગામ નગરપાલિકાની પમ્પિંગ સ્ટેશન કચેરીમાંથી એક ચોંકાવનારો વીડિયો વાયરલ થયો છે, જેમાં એક વ્યક્તિ દારૂના નશામાં ધૂત થઈને ખુરશી પર બેઠેલો જોવા મળે છે. આ ઘટનાએ પાલિકાના વહીવટ અને સુરક્ષા વ્યવસ્થા પર ગંભીર સવાલો ઉભા કર્યા છે. ખાસ કરીને, આ વ્યક્તિ કાયમી કર્મચારી ન હોવા છતાં તેનો રુઆબ અને કચેરીમાં દારૂ પીને છાકટો બનવાનો બનાવ તંત્રની બેદરકારી છતી કરે છે.
શું છે સમગ્ર ઘટના?
પ્રાપ્ત માહિતી અનુસાર, દહેગામના રહીશ રોહન ઠાકોર ભૂગર્ભ ગટર ઉભરાવવાની ફરિયાદ લઈને દહેગામ નગરપાલિકાના પમ્પિંગ સ્ટેશનની કચેરીએ ગયા હતા. ત્યાં તેમને આશ્ચર્ય થયું, જ્યારે તેમણે જોયું કે ભૂગર્ભ ગટરના કોન્ટ્રાક્ટરનો એક માણસ ચિક્કાર દારૂ પીધેલી હાલતમાં ઓફિસની ખુરશી પર બિરાજમાન હતો. રોહન ઠાકોરે આ સમગ્ર ઘટનાનો વીડિયો પોતાના મોબાઈલમાં કેદ કરી લીધો હતો, જે હાલ સોશિયલ મીડિયા પર વાયરલ થઈ રહ્યો છે. વિડીયો જોવા અહીં ક્લિક કરો.
વીડિયોમાં શું સંભળાય છે?
વીડિયોમાં સ્પષ્ટપણે જોઈ શકાય છે કે, નશામાં ધૂત વ્યક્તિ ખુરશી પર બેઠો છે અને રોહન ઠાકોર સાથે વાતચીત કરી રહ્યો છે. રોહન ઠાકોર જ્યારે પૂછે છે કે “હું રોહન છું ભાઈ બોલો”, ત્યારે નશામાં ધૂત વ્યક્તિ કહે છે, “મારે રોહન જોઈએ.” આ ઉપરાંત, તે અન્ય કોઈ વ્યક્તિને ફોન કરીને પણ “રોહનનો ફોન ક્યાં છે?” તેમ પૂછતો સંભળાય છે. તેના આવા વ્યવહારથી સ્પષ્ટ થાય છે કે તે પૂર્ણપણે નશામાં છે અને ઓફિસના માહોલને બગાડી રહ્યો છે. વિડીયો જોવા અહીં ક્લિક કરો.
તંત્ર પર ઉભા થતા સવાલ
આ ઘટના દહેગામ પાલિકાના તંત્ર પર અનેક સવાલો ઉભા કરે છે.
પાલિકા કચેરીમાં દારૂ પીવાની હિંમત ક્યાંથી આવી? કોઈ સરકારી કચેરીમાં દારૂ પીને બેસવાની હિમ્મત કોન્ટ્રાક્ટરના માણસને ક્યાંથી મળી? શું તંત્ર દ્વારા કોઈ દેખરેખ રાખવામાં આવતી નથી?
કાયમી કર્મચારી ન હોવા છતાં આટલો રુઆબ શા માટે? વીડિયોમાં દેખાતો વ્યક્તિ પાલિકાનો કાયમી કર્મચારી ન હોવા છતાં તે ઓફિસમાં આ રીતે વર્તી રહ્યો છે, જે સૂચવે છે કે તેને કોઈનો ડર નથી. શું પાલિકા કોન્ટ્રાક્ટરો પર કોઈ નિયંત્રણ રાખતી નથી?
સુરક્ષા વ્યવસ્થા અને દેખરેખનો અભાવ? પાલિકા કચેરીમાં આવા નશેડીયાઓ કેવી રીતે પ્રવેશી શકે છે અને આ રીતે છાકટા બની શકે છે? શું ત્યાં કોઈ ગાર્ડ કે મોનિટરિંગ સિસ્ટમ નથી?
જનતાના કામોનું શું? જો પાલિકા કચેરીમાં આ રીતે દારૂડિયાઓ બેઠા હોય, તો સામાન્ય જનતાના કામો કેવી રીતે થશે? નાગરિકોની ફરિયાદોનું નિરાકરણ કોણ લાવશે?
ભ્રષ્ટાચાર અને બેદરકારીની ગંધ? શું આવા બનાવો ભ્રષ્ટાચાર અને તંત્રની સંપૂર્ણ બેદરકારી તરફ ઈશારો કરે છે?
વિયુ નેટવર્ક આ વીડિયોની પુષ્ટિ કરતું નથી, પરંતુ વાયરલ થયેલો આ વીડિયો દહેગામ પાલિકામાં હલચલ મચાવી રહ્યો છે. આશા છે કે પાલિકાનું તંત્ર આ મામલે ગંભીરતાથી નોંધ લેશે અને દોષિતો સામે કડક કાર્યવાહી કરશે, જેથી ભવિષ્યમાં આવા બનાવોનું પુનરાવર્તન ન થાય અને સરકારી કચેરીઓની ગરીમા જળવાઈ રહે.
