કેનેડાના સરેમાં કોમેડિયન કપિલ શર્માના કેપ્સ કાફે પર ગોળીબાર થયો છે. ગોળીબારનો વીડિયો પણ સામે આવ્યો છે
નવી દિલ્હી, ગુરૂવાર: કેનેડાના સરેમાં કોમેડિયન કપિલ શર્માના કેપ્સ કાફે પર ગોળીબાર થયો છે. ગોળીબારનો વીડિયો પણ સામે આવ્યો છે. તેમાં જોવા મળી રહ્યું છે કે હુમલાખોરે કારમાંથી પિસ્તોલ કાઢી અને ત્યારબાદ 10 થી 12 રાઉન્ડ ફાયરિંગ કર્યું. સદનસીબે, આ હુમલામાં કોઈ જાનહાનિના સમાચાર નથી.
ખાલિસ્તાની આતંકવાદી હરજીત સિંહ લડ્ડીએ કેનેડામાં કપિલ શર્માના કેફે પર ગોળીબારની જવાબદારી લીધી છે. હરજીત સિંહ લડ્ડી NIAના મોસ્ટ વોન્ટેડ આતંકવાદીઓની યાદીમાં સામેલ છે. અને BKI (બબ્બર ખાલસા ઇન્ટરનેશનલ) સાથે સંકળાયેલા છે. સૂત્રોના જણાવ્યા અનુસાર, લડ્ડીએ કહ્યું છે કે કપિલ શર્માના કોઈ જૂના નિવેદનને કારણે તેણે આ હુમલો કર્યો હતો. જોકે, તે સ્પષ્ટ નથી કે કપિલ શર્માનો કેફે આ હુમલાનો સીધો નિશાન હતો કે તેને ધમકી આપવાનો પ્રયાસ હતો.
તમને જણાવી દઈએ કે ગઈકાલે રાત્રે પ્રખ્યાત હાસ્ય કલાકાર કપિલ શર્માના કેપ્સ કાફે પર ગોળીબાર થયો હતો. કપિલ શર્માએ તાજેતરમાં જ કાફેનું ઉદ્ઘાટન કર્યું હતું. આ કપિલ શર્માનો પહેલો આંતરરાષ્ટ્રીય રેસ્ટોરન્ટ પ્રોજેક્ટ હોવાનું કહેવાય છે. પોલીસ અને ફોરેન્સિક ટીમ ઘટનાસ્થળે હાજર છે, પોલીસ ઘટનાની બારીકાઈથી તપાસ કરી રહી છે. આ હુમલામાં કોઈ ઘાયલ થયાના કોઈ સમાચાર નથી. પ્રત્યક્ષદર્શીઓના જણાવ્યા અનુસાર, હુમલાખોરો કારમાં આવ્યા હતા અને ગોળીબાર કરીને ઘટનાસ્થળેથી ભાગી ગયા હતા.
