ઝારખંડના રાજકારણમાં તેમનું યોગદાન અને આદિવાસી સમાજ પ્રત્યેની તેમની પ્રતિબદ્ધતા હંમેશા યાદ રહેશે. તેમના નિધનથી રાજકીય અને સામાજિક ક્ષેત્રે ઊંડી ખોટ પડી છે.
ઝારખંડ, સોમવાર
ઝારખંડના રાજકારણના દિગ્ગજ નેતા અને પૂર્વ મુખ્યમંત્રી શિબુ સોરેનનું લાંબી માંદગી બાદ આજે દિલ્હીની સર ગંગા રામ હોસ્પિટલમાં નિધન થયું છે. તેઓ 80 વર્ષના હતા અને છેલ્લા કેટલાક સમયથી તેમની તબિયત નાજુક હતી. ‘દિશોમ ગુરુ’ તરીકે લોકપ્રિય શિબુ સોરેન ઝારખંડ મુક્તિ મોરચા (JMM)ના સંસ્થાપક અને પ્રમુખ નેતા હતા, જેમણે આદિવાસીઓના અધિકારો માટે લાંબી લડાઈ લડી હતી.
સ્વાસ્થ્ય અને અંતિમ દિવસો
શિબુ સોરેન જૂન 2025થી દિલ્હીની સર ગંગા રામ હોસ્પિટલમાં દાખલ હતા. તેમને બ્રેઈન સ્ટ્રોક અને કિડની સંબંધિત સમસ્યાઓને કારણે વેન્ટિલેટર સપોર્ટ પર રાખવામાં આવ્યા હતા. તેમના સ્વાસ્થ્યને લઈને દેશભરમાં ચિંતા હતી. થોડા દિવસો પહેલા જ રાષ્ટ્રપતિ દ્રૌપદી મુર્મુ અને કેન્દ્રીય મંત્રી નિતિન ગડકરી પણ ઝારખંડના મુખ્યમંત્રી હેમંત સોરેન સાથે હોસ્પિટલમાં તેમના ખબર અંતર પૂછવા ગયા હતા.
ત્રણ વખત મુખ્યમંત્રી અને ‘દિશોમ ગુરુ’નું બિરુદ
શિબુ સોરેન ઝારખંડના ત્રણ વખત 2005, 2008 અને 2009 મુખ્યમંત્રી રહી ચૂક્યા હતા, જોકે તેઓ ક્યારેય તેમનો કાર્યકાળ પૂરો કરી શક્યા નહોતા. તેમનો જન્મ 11 જાન્યુઆરી 1944ના રોજ ઝારખંડના રામગઢ જિલ્લા (તત્કાલીન બિહારના હજારીબાગ જિલ્લા)ના નેમરા ગામમાં થયો હતો. તેમને તેમના સમર્થકો અને આદિવાસી સમાજમાં ‘દિશોમ ગુરુ’ એટલે કે ‘દેશના ગુરુ’ તરીકે ઓળખવામાં આવતા હતા.
આદિવાસીઓના હક માટેની લડાઈ
શિબુ સોરેને ઝારખંડ રાજ્ય નિર્માણ આંદોલનમાં મુખ્ય ભૂમિકા ભજવી હતી. તેમણે આદિવાસીઓના અધિકારો માટે ‘ધનકટની આંદોલન’ શરૂ કર્યું હતું, જે અંતર્ગત તેમણે શાહુકારો અને મહાજનો સામે આદિવાસીઓને એકજૂટ કર્યા હતા. તેઓ 1980થી 2019 સુધી દુમકાથી લોકસભા સાંસદ રહ્યા હતા અને હાલમાં રાજ્યસભા સાંસદ હતા. તેમની આગેવાની હેઠળ JMMએ અલગ ઝારખંડ રાજ્યની રચનામાં નિર્ણાયક યોગદાન આપ્યું હતું.
